އީރާާންއާ ދެކޮޅަށް ޓްރަމްޕް ކުރީ ބޭކާރު ހަނގުރާމައެއް ކަމަށް، އޮބާމާގެ ސަރުކާރުގެ އިސް އޮފިޝަލަކު ވިދާޅުވެއްޖެ

އެމެރިކާގެ ރައީސް ޑޮނަލްޑް ޓްރަމްޕްގެ ސަރުކާރުން އީރާންއާ ދެކޮޅަށް ކުރި ހަނގުރާމަ އަކީ ވަރަށް ބޭކާރު އަދި އިސްރާފެއް ކަމަށް ވިދާޅުވެ، އެމެރިކާގެ ކުރީގެ ރައީސް ބަރަކް އޮބާމާގެ ސަރުކާރުގައި އިސްކޮށް މަސައްކަތް ކުރެއްވި އޮފިޝަލަކު ފާޑު ވިދާޅުވެއްޖެ އެވ.

އޮބާާމާގެ ވެރި ކަމުގެ ތެރޭގައި 2015 ވަނަ އަހަރު އީރާން އާއެކު އެމެރިކާ އިން ސޮއި ކުރި ނިއުކްލިއާ އެއްބަސްވުމުގައި އިސްކޮށް އުޅުއްވި ބޭފުޅުން މިހެން ވިދާޅުވެފައި ވަނީ، އީރާން އާއެކު އެއްބަސްވުމެއްގައި ސޮއި ކުރުމަށް އެމެރިކާ އިން ނިންމާފައި ވަނިކޮށެވެ. 

އެމެރިކާގެ ފަރާތުން މީގެ ކުރިން މަޝްވަރާ ތަކުގައި ބައިވެރިވެފައިވާ، އަދި އީރާން އަށް ކަނޑަ އަޅުއްވާފައި ހުންނެވި ޚާއްސަ މަންދޫބު ރޮބަޓް މާލީ ވިދާޅުވީ، އަލަށް ސޮއި ކުރެވުނު ފަހުމުނާާމާ އަކީ މުހިންމު ކުރިއެރުމެއް ކަމަށެވެ. ނަމަވެސް، އީރާންއާ ދެކޮޅަށް ކުރީ ވަރަށް ފަރުވާ ކުޑަ ހަނގުރާމައެއް ކަމަށާއި، އެއީ ވަރަށް ބޮޑު ބޭކާރު ޚަރަދެއް ކަމަށް ވެސް އޭނާ ސިފަ ކުރެއްވި އެވެ. 

އެކްސްގައި ކުރެއްވި ޕޯސްޓެއްގައި މާލީ ވިދާޅުވީ، މި ފަހުމުނާމާގެ ސަބަބުން ހޮރްމޫޒް ކަނޑު އޮޅި އަލުން ހުޅުވިގެން ދާނެ ކަމަށާއި، އެ ސަރަހައްދު ބަންދުވެފައި އޮތުމުގެ ސަބަބުން ދުނިޔޭގެ އެތައް މިލިއަން މީހުންނަށް ބޮޑެތި ގެއްލުން ތަކެއް ވެފައިވާ ކަަމަށެވެ. 

މީގެ އިތުރުން މާލީ ފާހަގަ ކުރެއްވި ގޮތުގައި، މި ފަހުމުނާމާ އަކީ އެމެރިކާ އިން ކުރި ހަނގުރާމައިގެ ނާާކާާމިޔާބީ ހާމަ ކޮށްދޭ ހެއްކެއް ކަމަށެވެ. ސަބަބަކީ، މި އެއްބަސްވުމުގެ އެންމެ ބޮޑު ކާމިޔާބީ އަކީ، ހަނގުރާމައިގެ ސަބަބުން ބަންދުވި ކަނޑުގެ މަގެއް އަލުން ހުޅުވުން ކަަމަށް ވާތީ ކަމަށް، މާލީ ވިދާޅުވި އެވެ. 

އީރާންގެ ނިއުކްލިއާ ޕްރޮގްރާމް އާއި، ޔުރޭނިއަމް މުއްސަނދި ކުރުން އަދި ދަތި ކުރުމުގެ ފިޔަވަޅު ތަކަށް ލުއި ދިނުން ފަދަ މުހިންމު މައްސަލަތައް އަދި ވެސް އޮތީ ހައްލު ނުވެ ކަމަށާއި، ހަނގުރާމައިގެ ކުރިއަށް ވުރެ މިހާރު މި މައްސަލަތައް ޙައްލު ކުރަން މާ އުނދަގޫ ވާނެ ކަމަށް ވެސް އޭނާ ވަނީ ވިދާޅުވެފައި އެވެ. 

އޮބާމާ ސަރުކާރުގެ ޑެޕިއުޓީ ނެޝަނަލް ސެކިއުރިޓީ އެޑްވައިޒަރުގެ މަގާމު ފުރުއްވި ބެން ރޯޑްސް ވެސް ވަނީ މި މޭރުމުން ވާހަކަ ދައްކަވައިފަ އެވެ. އޭނާ ވިދާޅުވީ، މި އެއްބަސްވުމުގެ ސަބަބުން އަލުން ހުޅުވިގެން މިދިޔައީ ހަނގުރާމައިގެ ކުރިން ވެސް ހުޅުވިފައި އޮތް ކަނޑުގެ ސަރަހައްދެއް ކަމަށެވެ. އަދި މިހާރު ފެށިފައިވާ ނިއުކްލިއާ މަޝްވަރާ ތަކަކީ، ހަނގުރާމައިގެ ކުރިން އެމެރިކާގެ ރައީސް ޓްރަމްޕް ބޭނުންފުޅުވި މިންވަރަށް ވުރެ މާ ހަނި ދާއިރާއެއްގެ މަޝްވަރާ ތަކެއް ކަމަށް ވެސް އޭނާ ފާހަގަ ކުރެއްވި އެވެ. 

ބެން ރޯޑްސް އިތުރަށް ވިދާޅުވީ، މި ހަނގުރާމައިގެ ސަބަބުން މުޅި ދުނިޔެ އަށް ބޮޑެތި ގެއްލުން ތަކެއް ލިބިފައިވާ އިރު، އީރާންގެ އިސްލާމިކް ރިވޮލިއުޝަނަރީ ގާޑްސް (އައިއާރުޖީސީ) އިން އިސްވެ އޮންނަ އެ ގައުމުގެ ސަރުކާރު މިހާރު އޮތީ ކުރިއަށް ވުރެ ވަރުގަދަކޮށް ކަމަށް އެ ގައުމަށް އިހުސާސް ކުރެވޭ ކަމަށެވެ.

މިއީ އެމެރިކާގެ ރައީސް ޓްރަމްޕް، 2015 ވަނަ އަހަރުގެ ނިއުކްލިއާ އެއްބަސްވުން އުވާލައްވައި، އީރާންއާ ދެކޮޅަށް ގެންގުޅުއްވި ހަރުކަށި ސިޔާސަތު ތަކަށް އަމާޒުވި ބޮޑު ފާޑު ކިޔުމެކެވެ.