ސުލްޙައިގެ އެއްބަސްވުމާ މެދު އީރާން އިން ވަކި ގޮތެއް ނުނިންމާ ކަމަށް ބުނެފި
ފާރްސް ނިއުސް އެޖެންސީ އިން ބުނެފައިވާ ގޮތުގައި، އެމެރިކާ އާއެކު ސުލްހައިގެ އެއްބަސްވުމަކަށް އައުމަށް ކުރެވޭ މަޝްވަރާ ތަކުގައި އީރާންގެ އެންމެ މަތީ މަސްލަހަތުތައް ހިމާޔަތް ކުރުމަށް އިސްކަން ދޭނެ ކަމަށް. ނަމަވެސް، މިހާތަނަށް އެއްވެސް ކަމެއް ނިމުމަކަށް އައިސްފައި ނުވާ ކަމަށާއި، އެފަދަ އެއްބަސްވުމަކާ މެދު ގޮތެއް ނިންމާނީ ގައުމުގެ އެންމެ މަތީ ފަންތީގެ ވެރިންގެ މެދުގައި ފުޅާ ދާއިރާއެއްގައި މަޝްވަރާ ކުރުމަށް ފަހު ކަމަށް އެ އެޖެންސީ އިން ވަނީ ފާހަގަ ކޮށްފައިވޭ.
އީރާންގެ ވެރި ރަށް ތެހެރާންގެ އިންގިލާބު މައިދާނުގައި ހަރު ކޮށްފައިވާ އީރާންގެ ގައުމީ ދިދަ ފެންނަ ބޮޑު ބޯޑެއްގެ ކައިރިން އެ ގައުމުގެ ރައްޔިތުން އުޅަނދު ފަހަރުގައި ދަތުރު ކުރަނީ. | ރޮއިޓާސް
އެމެރިކާ އާއެކު ސުލްހައިގެ އެއްބަސްވުމެއް ގާއިމު ކުރުމާ ގުޅޭ ގޮތުން އީރާނުގެ ސަރުކާރުން މިހާތަނަށް ވަކި ފައިނަލް ނިންމުމެއް ނިންމާފައި ނުވާ ކަމަށް, އެ ގައުމުގެ ރަސްމީ ނިއުސް އެޖެންސީ ފާރްސް އިން ރިޕޯޓު ކޮށްފއެވެ.
މިކަން ހާމަ ކޮށްފައި ވަނީ ދެ ގައުމުގެ ދެމެދުގައި އުފެދިފައިވާ ނުތަނަވަސްކަން ކުޑަ ކުރުމަށް މަޝްވަރާ ތަކެއް ކުރެވެމުންދާ ކަމަށް ބައިނަލްއަގުވާމީ މީޑިއާ ތަކުން ރިޕޯޓު ކުރަމުންދާ ދަނޑިވަޅެއްގައި އެވެ.
ފާރްސް ނިއުސް އެޖެންސީ އިން ބުނެފައިވާ ގޮތުގައި، އެމެރިކާ އާއެކު ސުލްހައިގެ އެއްބަސްވުމަކަށް އައުމަށް ކުރެވޭ މަޝްވަރާ ތަކުގައި އީރާންގެ އެންމެ މަތީ މަސްލަހަތުތައް ހިމާޔަތް ކުރުމަށް އިސްކަން ދޭނެ ކަމަށެވެ. ނަމަވެސް، މިހާތަނަށް އެއްވެސް ކަމެއް ނިމުމަކަށް އައިސްފައި ނުވާ ކަމަށާއި، އެފަދަ އެއްބަސްވުމަކާ މެދު ގޮތެއް ނިންމާނީ ގައުމުގެ އެންމެ މަތީ ފަންތީގެ ވެރިންގެ މެދުގައި ފުޅާ ދާއިރާއެއްގައި މަޝްވަރާ ކުރުމަށް ފަހު ކަމަށް އެ އެޖެންސީ އިން ވަނީ ފާހަގަ ކޮށްފައި އެވެ.
އީރާން އާއި އެމެރިކާގެ ގުޅުން ފާއިތުވި އަހަރު ތަކުގައި ވަރަށް ބޮޑަށް ގޯސް ވެފައި ވަނީ، އީރާންގެ ނިއުކްލިއާ ޕްރޮގްރާމް އާއި، އެ ގައުމަށް އަޅާފައިވާ އިގްތިސާދީ ދަތި ކުރުމުގެ ފިޔަވަޅުތަކާ ގުޅިގެންނެވެ. މީގެ އިތުރުން މެދު އިރުމަތީގެ ސަރަހައްދީ ހަމަޖެހުމާ ގުޅޭ ގޮތުން ދެ ގައުމުގެ މެދުގައި ބޮޑެތި ހިޔާލު ތަފާތުވުން ތަކެއް ހުރިކަން ފާހަގަ ކުރެވެ އެވެ.
މި މައްސަލައިގައި އީރާންގެ ސަރުކާރުން ގެންގުޅޭ ރަސްމީ ސިޔާސަތަކީ، އެ ގައުމުގެ މައްޗަށް އަޅާފައިވާ ދަތި ކުރުމުގެ ފިޔަވަޅުތައް އުވާލައި، އީރާންގެ ހައްގުތައް ކަށަވަރުވާ ފަދަ އުސޫލެއްގެ މަތިން މަޝްވަރާ ކުރުމެވެ. އެހެން ކަމުން، އެމެރިކާ އާއެކު އެއްބަސްވުމަކަށް ދިޔުމުގެ ކުރިން އީރާން އިން ބަލާނީ އެ ގައުމުގެ އިގްތިސާދީ އަދި ސިޔާސީ މަސްލަހަތުތައް ފުރިހަމަ އަށް ހިމާޔަތް ކުރެވޭތޯ އެވެ.
އެމެރިކާގެ ސަރުކާރުން ވެސް މީގެ ކުރިން ބުނެފައި ވަނީ އީރާން އާއެކު ޑިޕްލޮމެޓިކް މަގުން މައްސަލަތައް ހައްލު ކުރުމަށް ތައްޔާރަށް އޮތް ނަމަވެސް، އެ ގައުމުގެ ނިއުކްލިއާ ހަރަކާތްތަކާ މެދު ކަންބޮޑުވުން ތަކެއް ހުރި ކަމަށެވެ. މި ދަނޑިވަޅުގައި އީރާންގެ މީޑިއާ ތަކުން މިފަދަ މޭރުމަކުން ރިޕޯޓު ކުރުމަކީ، ދެ ގައުމުގެ މެދުގައި ކުރިއަށްދާ ސިއްރު މަޝްވަރާ ތަކެއްގެ ނަތީޖާއާ މެދު އީރާން އިން އަދިވެސް ވަރަށް ބޮޑަށް ސަމާލުވެ އޮތްކަން ހާމަ ކޮށްދޭ ކަމެކެވެ.
މަސްދަރު: އަލް ޖަޒީރާ
