ވަރުގަދަ ހަމަލާ ތަކަކަށް ތައްޔާރު ވަމުން އަންނަ ކަމަށް އިޒްރޭލް އިން ބުނެފި

ކުރިއަށް އޮތް މަދު ގަޑިއިރު ތަކެއްގެ ތެރޭގައި އެ ޤައުމަށް އަމާޒުކޮށް ވަރުގަދަ ހަމަލާ ތަކެއް އަތުވެދާނެ ކަމަށް ބަލައި، އެކަމަށް ފުރިހަމަ އަށް ތައްޔާރު ވަމުން އަންނަ ކަމަށް އިޒްރޭލްގެ އަސްކަރިއްޔާ އިން ހާމަ ކޮށްފި އެވެ. 

އިޒްރޭލްގެ އަސްކަރިއްޔާ އިން ނެރުނު ބަޔާނެއްގައި ބުނެފައި ވަނީ، އިޒްރޭލްގެ ސަރަހައްދު ތަކަށް އަމާޒުކޮށް ހަމަލާ ތަކެއް ދީފާނެ ކަމުގެ ފުރުސަތު ބޮޑު ކަމަށް ފާހަގަ ކުރެވިފައިވާ ކަމަށެވެ. އެހެން ކަމުން، ކުރިއަށް އޮތް ވަގުތު ތަކުގައި ދީފާނެ ކޮންމެ ހަމަލާ އަކުން ދިފާއުވުމަށާއި، އެފަދަ ހަމަލާ އަކަށް ރައްދު ދިނުމަށްޓަކައި އަސްކަރީ ގޮތުން އަޅަން ޖެހޭ ހުރިހާ ފިޔަވަޅު ތަކެއް މިހާރު އަޅަމުންދާ ކަމަށް އެ ގައުމުން ވަނީ ހާމަ ކޮށްފައި އެވެ.

މި ނުރައްކާތެރި ހާލަތާ ގުޅިގެން އިޒްރޭލްގެ ދިފާއީ ބާރު ތަކުން ވަނީ ސަމާލުކަން އިތުރުކޮށް، ގައުމުގެ އެކި ސަރަހައްދު ތަކުގައި ސަލާމަތީ ފިޔަވަޅުތައް ވަރުގަދަ ކޮށްފައި އެވެ. އަދި ކުރިއަށް އޮތް ގަޑިއިރު ތަކަކީ ނުރައްކާތެރި ވަގުތު ތަކަކަށް ވެދާނެތީ، އަސްކަރިއްޔާގެ ހުރިހާ ގުނަވަން ތަކެއް މިހާރު އޮތީ އެންމެ މަތީ ދަރަޖައިގެ ތައްޔާރީ ހާލަތެއްގައި ކަމަށް ވެސް އެ ގައުމުގެ އަސްކަރީ ތަރުޖަމާނާ ހަވާލާދީ ރިޕޯޓުތައް ބުނެ އެވެ.

އިޒްރޭލް އިން މިފަދަ އިންޒާރެއް ނެރެފައި މިވަނީ، މެދު އިރުމަތީގެ މަސްރަހު ނުހަނު ބޮޑަށް ގޯސްވެ، ސަރަހައްދީ ހަމަނުޖެހުންތައް އިތުރު ވެފައިވާ ދަނޑިވަޅެއްގައި އެވެ. ނަމަވެސް، މި ހަމަލާތައް އަންނާނެ ކަމަށް ބެލެވެނީ ކޮން ފަރާތަކުން ކަމެއް ނުވަތަ ކޮން ގައުމަކުން ކަމެއް އިޒްރޭލްގެ އަސްކަރިއްޔާ އިން ސީދާ ހާމަ ކޮށްފައި ނުވެ އެވެ.

މި ހާލަތާ ގުޅިގެން އިޒްރޭލްގެ އާންމު ރައްޔިތުންނަށް ސަލާމަތީ އިރުޝާދުތައް ދެމުންދާއިރު، އަސްކަރިއްޔާ އިން ބުނެފައި ވަނީ ހަމަލާއެއް އަތުވެއްޖެ ނަމަ އެކަމަށް ދޭން ޖެހޭ ރައްދު ދިނުމުގައި ފަސް ނުޖެހޭނެ ކަމަށެވެ. އަދި ކުރިއަށް އޮތް ގަޑިއިރު ތަކުގައި މަސްރަހަށް އަންނަ ބަދަލުތައް ވަރަށް ގާތުން ބަލަމުން ދާނެ ކަމަށް ވެސް އިޒްރޭލް އިން ބުނެ އެވެ.