ދޮގާއި މަކަރު ހެދުމާއި ފުށުއަރާ ސިޔާސަތުތައް ތަކުރާރު ކުރުން ހުއްޓާލުމަށް އީރާނުން އެމެރިކާ އަށް ގޮވާލައިފި

އެމެރިކާގެ އަމަލުތަކުގައި ހުރި ދޮގާއި ފުށުއެރުންތައް ތަކުރާރު ކުރުން ހުއްޓާލުމަށް ގޮވާލައި އީރާނުގެ އިސް ކޮމާންޑަރަކު އެމެރިކާ އަށް އިންޒާރު ދެއްވައިފިއެވެ. އީރާނުގެ ޚާތަމުލް އަންބިޔާ ސެންޓްރަލް ހެޑްކުއާޓާޒްގެ ކޮމާންޑަރު މި އިންޒާރު ދެއްވީ، އީރާނުގެ ހަކަތައާ ބެހޭ އުމްރާނީ ވަސީލަތްތަކަށް ހަމަލާދޭނެ ކަމުގެ އިންޒާރު ވޮޝިންޓަނުން ދިނުމަށްފަހު، މަޝްވަރާތަކަށް އެއްބަސްވެފައިވާ ކަމަށް ބުނެ އެމެރިކާއިން ދައްކަމުންދާ ވާހަކަތަކާ ގުޅިގެންނެވެ.

މޭޖަރ ޖެނެރަލް އަލީ އަބްދުﷲ ބުރާސްފަތި ދުވަހު ނެރުއްވި ބަޔާނެއްގައި ވިދާޅުވީ، އެމެރިކާއިން އެއްކޮޅުން އެއްބަސްވުންތަކާއި މަޝްވަރާގެ ވާހަކަ ދައްކާއިރު، އަނެއްކޮޅުން ދަނީ ނުބައި އަމަލުތައް ހިންގަމުން ކަމަށެވެ.

އޭނާ މިފަދަ އިންޒާރެއް ދެއްވީ، އީރާނުގެ ޚާރްގް އައިލެންޑް ހިފައި، އެ ގައުމަށް "ވަރަށް ވަރުގަދަ ހަމަލާއެއް" ދޭނެ ކަމަށް ރައީސް ޑޮނަލްޑް ޓްރަމްޕް އިންޒާރު ދެއްވުމަށްފަހު، އޭގެ މަދު ގަޑިއިރުތަކެއް ފަހުން އެ ހަމަލާތައް ކެންސަލް ކުރިކަން އިއުލާނު ކުރެއްވުމާ ގުޅިގެންނެވެ. ޓްރަމްޕް ވިދާޅުވީ މަޝްވަރާތައް އީރާނުގެ އެންމެ މަތީ ލީޑަޝިޕާ ހަމައަށް ގެންގޮސް، އެކަމަށް ހުއްދަ ލިބިފައިވާ ކަމަށެވެ.

ޖެނެރަލް އަބްދުﷲ ވިދާޅުވީ، އެމެރިކާގެ ބަހާއި އަމަލުގައި ހުރި މި ސާފު ފުށުއެރުންތަކަކީ ސަރަހައްދީ ނުތަނަވަސްކަމުގެ މައިގަނޑު ސަބަބު ކަމަށެވެ. އަދި މީގެ ސަބަބުން ބައިނަލްއަގުވާމީ ވިޔަފާރިއާއި އިގްތިސާދަށް، ޚާއްސަކޮށް ހުރްމުޒް ކަނޑުއޮޅީގެ ސަލާމަތަށް ނުރައްކާވެފައިވާ ކަމަށް އޭނާ ވިދާޅުވިއެވެ.

ބުދަ ދުވަހުގެ ރޭ އެމެރިކާއިން ވަނީ އީރާނުގެ ދެކުނު ހުރްމުޒްގާން ޕްރޮވިންސްގެ ބައެއް ސަރަހައްދުތަކަށް ވައިގެ މަގުން ހަމަލާދީފައެވެ. މީގެ ތެރޭގައި ހުރްމުޒް ކަނޑުއޮޅީގައި އޮންނަ ޖާސްކް އާއި ސިރިކް ސިޓީގެ އިތުރުން ގޭޝްމް އައިލެންޑް ހިމެނެއެވެ.

ބުރާސްފަތި ދުވަހު ޓްރަމްޕް ވިދާޅުވީ، މާ ދުރު ނޫން މުސްތަގުބަލެއްގައި ޚާރްގް އައިލެންޑާއި ތެލުގެ އެހެނިހެން ވަސީލަތްތައް އެމެރިކާގެ ބާރުގެ ދަށަށް ގެންގޮސް، އީރާނުގެ ތެލާއި ގޭހުގެ މާކެޓް އެއްކޮށް ކޮންޓްރޯލް ކުރާނެ ކަމަށެވެ. ނަމަވެސް އޭގެ ފަހުން ވަނީ ރޭވި ބޮން އެޅުމުގެ ހަމަލާތައް ކެންސަލް ކުރިކަން އިއުލާނު ކުރައްވާފައެވެ.

ތެހެރާންގެ ފާސް ނިއުސް އެޖެންސީން، އީރާނުގެ މަޝްވަރާ ޓީމާ ގާތް މަސްދަރަކާ ހަވާލާދީ ރިޕޯޓްކޮށްފައިވާ ގޮތުގައި، އެމެރިކާއާއެކު އެއްވެސް ކަހަލަ ފަހުމުނާމާއެއްގެ ދެލިކޮޕީއެއް މިހާތަނަށް ކަށަވަރު ކުރެވިފައެއް ނުވެއެވެ.

އަބްދުﷲ ވިދާޅުވީ، އެމެރިކާގެ ލީޑަރުންނަށް އީރާނުގެ ފަޚުރުވެރި ރައްޔިތުންނާއި ބާރުގަދަ ހަތިޔާރު އެޅި ފައުޖުތަކުގެ ހަގީގަތް ރަނގަޅަށް ފަހުމް ނުވާތީ، އެ ގައުމުން ދަނީ ބޭކާރު އަދި ދޮގު ސިޔާސަތުތަކެއްގެ ތެރޭގައި އެނބުރެމުން ކަމަށެވެ.

އޭނާ އިތުރަށް ވިދާޅުވީ، އެމެރިކާއިން ތަކުރާރުކޮށް ހަދަމުންދާ ދޮގުތަކަކީ މި ބޭކާރު ސިޔާސަތުގެ ހެއްކެއް ކަމަށާއި، ޕްރޮޕަގަންޑާ އާއި މީޑިއާ ހަނގުރާމައިގެ ޒަރީއާއިން އެމެރިކާއަށް ލިބެމުންދާ "ނާކާމިޔާބީތަކާއި ލަދުވެތިކަން" ދުވަހަކުވެސް ފޫނުބެއްދޭނެ ކަމަށެވެ.

ކޮމާންޑަރު އިންޒާރު ދެއްވި ގޮތުގައި، އެމެރިކާއިން އީރާނަށް އިތުރު ހަމަލާއެއް ދީފިނަމަ، ސަރަހައްދީ ނުތަނަވަސްކަމުގެ އިތުރުން ހަނގުރާމައިގެ އަލިފާންގަނޑު މުޅި ސަރަހައްދަށް ފެތުރި، ބޮޑުވެގެންދާނެއެވެ.

"އެމެރިކާއިން އަނެއްކާވެސް އީރާނަށް ހަމަލާދޭން ބޭނުންވާނަމަ، ކުރިއަށްވުރެ މާ ވަރުގަދަ ރައްދެއް އެ ގައުމަށް ލިބޭނެ،" ޖެނެރަލް އަބްދުﷲ އިންޒާރު ދެއްވިއެވެ.

"އީރާނުގެ ތެލުގެ އުމްރާނީ ވަސީލަތްތަކަށް އެމެރިކާއިން ދެމުންދާ އިންޒާރުތަކާ ގުޅިގެން ބުނަން އޮތީ، ތެލާއި ގޭހުގެ އެކްސްޕޯޓްގެ ފުރުސަތު އޮންނާނީ ހުރިހާ އެންމެންނަށް، ނޫނީ އެއްވެސް ބަޔަކަށް އެ ފުރުސަތެއް ނޯންނާނެ،" އޭނާ ވިދާޅުވިއެވެ.

ދުނިޔޭގެ ތެލުގެ 20 އިންސައްތަ ހުރްމުޒް ކަނޑުއޮޅިން ދަތުރުކުރާއިރު، އަބްދުﷲގެ މި އިންޒާރަކީ ބައިނަލްއަގުވާމީ ގޮތުން ބޮޑު ނުރައްކަލެއް އޮތް ކަމެއްގެ ގޮތުގައި ބެލެވެއެވެ.

ކޮމާންޑަރު ފާހަގަކުރެއްވި ގޮތުގައި އީރާނުގެ ހަތިޔާރު އެޅި ފައުޖުތައް އޮތީ "ފުރިހަމަ ތައްޔާރީ ހާލަތެއްގައި، ހޭލާ އަދި ޖާސޫސީ ގޮތުން ކުރިހޯދައިގެން" ކަމަށެވެ. އަދި ގައުމުގެ ސަލާމަތާއި، މިނިވަންކަމާއި، ސަރަހައްދީ ފުރިހަމަކަމަށް ކުރިމަތިވާ ކޮންމެ ނުރައްކަލަކަށް، ހިތާމަކުރަންޖެހޭ ފަދަ ވަރުގަދަ ރައްދެއް ދޭނެ ކަމަށް އޭނާ ވިދާޅުވިއެވެ.

އަދި އެމެރިކާގެ މީޑިއާ ހަނގުރާމައަކީ ހަނގުރާމައިގެ މައިދާނުގައި އެ ގައުމަށް ލިބެމުންދާ ނާކާމިޔާބީތައް ފޮރުވުމަށް ކުރާ ކަމެއްގެ ގޮތުގައި އޭނާ ސިފަކުރެއްވިއެވެ. "އިސްލާމީ އީރާނާއެކު ކުރާ ހަނގުރާމައިގައި އެމީހުންނަށް ލިބެމުންދާ ނާކާމިޔާބީތަކާއި ލަދުވެތިކަން ޕްރޮޕަގަންޑާއަކުން ފޫނުބެއްދޭނެ،" އަބްދުﷲ ވިދާޅުވިއެވެ.

މީގެ އިތުރުން، އީރާނުގެ ޑިފެންސް މިނިސްޓްރީން ވަނީ 2025 ޖޫން 23 ގައި އެމެރިކާ އާއި އިސްރާއީލުން ފެށި އުދުވާނަށް އެއް އަހަރު ފުރުމާ ގުޅިގެން ބަޔާނެއް ނެރެފައެވެ. އީރާނުން މި ހަނގުރާމައަށް ކިޔަނީ "ދެވަނައަށް މަޖުބޫރުކުރުވި ހަނގުރާމަ" ނުވަތަ "12 ދުވަހުގެ ހަނގުރާމަ" އެވެ.

މިނިސްޓްރީން ބުނި ގޮތުގައި މި ހަނގުރާމައަކީ "ޖަރީމާ ހިންގާ ޒަޔަނިސްޓް ސަރުކާރާއި އެމެރިކާ ގުޅިގެން" އީރާނު ބައިބައިކޮށް، ގައުމުގެ މިނިވަންކަމާއި ސަލާމަތަށް ހަމަލާދިނުމަށް ފެށި ހަނގުރާމައެކެވެ. އަދި މި ހަމަލާ ދިނީ ދެ ފަރާތުން ޑިޕްލޮމެޓިކް މަޝްވަރާތަކުގައި ތިއްބާ ކަމަށްވެސް ބުނެފައިވެއެވެ.

"މި ހަނގުރާމައިގައި ހަތިޔާރު އެޅި ފައުޖުތަކުގެ އިސް ކޮމާންޑަރުންނާއި، ސައިންސްވެރިންނާއި، އިލްމީ ބޭފުޅުންގެ އިތުރުން ކުށެއް ނެތް ކުޑަކުދިންނާއި އަންހެނުން ޝަހީދުވި،" މިނިސްޓްރީގެ ބަޔާނުގައިވެއެވެ.

"ނަމަވެސް މި އަނިޔާވެރިކަމާއެކުވެސް ދުޝްމަނުންގެ މަގްސަދު ހާސިލެއް ނުވި. މި 12 ދުވަހުގެ ދިފާއު ވެގެންދިޔައީ ގައުމީ ބާރާއި، ސިފައިންގެ އެއްބައިވަންތަކަމާއި، އީރާނު ރައްޔިތުންގެ ގުޅުން ދައްކުވައިދީ، ދުޝްމަނުންގެ ހިސާބުތައް ކުށްވެރިވި ކަމަކަށް،" ބަޔާނުގައި އިތުރަށް ބުނެފައިވެއެވެ.

މިނިސްޓްރީން ފާހަގަކުރި ގޮތުގައި، އިސްލާމީ އިންގިލާބާއި ސިފައިންނަށް ތާއީދުކޮށް ރައްޔިތުން 100 އަށްވުރެ ގިނަ ރޭ ތިބި ތިބުމަކީ ދުޝްމަނުންގެ ރޭވުންތައް ނާކާމިޔާބު ކުރުމުގެ މައިގަނޑު ސަބަބެވެ.

މިދިޔަ ފެބްރުއަރީ 28 ގައި އީރާނުގެ ރޫހާނީ ލީޑަރު އާޔަތުﷲ ސައްޔިދު އަލީ ޚާމަނާއީ އަވަހާރަކޮށްލުމާ ގުޅިގެން ފެށުނު މި އެއްވުންތަކުގައި، ތެހެރާންގެ އިންގިލާބު މައިދާނުން ފެށިގެން އިސްފަހާން، ތަބްރީޒް، ޝީރާޒް އަދި ބިރްޖަންޑް ފަދަ ސިޓީތަކުގެ މައިދާންތަކަށް މިލިއަނުން މީހުން އެއްވެފައިވެއެވެ.

މި އެއްވުންތަކުގެ ބައިވެރިން ކޮންމެ ރެޔަކު އީރާނުގެ ދިދަ ހިފައިގެން ނުކުމެ، ސިފައިންނަށާއި އާ ރޫހާނީ ލީޑަރު އާޔަތުﷲ ސައްޔިދު މުޖުތަބާ ޚާމަނާއީއަށް ތާއީދުކޮށް އަޑުއުފުލަމުންދެއެވެ. އަދި ދުޝްމަނުން ބަލިވަންދެން މަގުމަތީގައި ތިބޭނެ ކަމަށް އެމީހުން ދަނީ ބުނަމުންނެވެ.

"ގައުމުގެ ސަލާމަތާއި ސަރަހައްދީ ފުރިހަމަކަމަށް އަރައިގަތުމަށް ކުރާ ކޮންމެ ކަމަކަށް، ދުޝްމަނުންގެ އަންދާޒާތަކަށްވުރެ މާ ވަރުގަދަ އަދި ހިތާމަކުރަންޖެހޭ ފަދަ ރައްދެއް ދޭނެ،" މިނިސްޓްރީން އިންޒާރު ދިނެވެ.