އެމެރިކާ އާއެކު ސުލްހައިގެ އެއްބަސްވުމުގައި ސޮއި ކުރާތީ އީރާނުގެ އެތައް ބަޔަކު އެ ގައުމުގެ ޚާރިޖީ ވަޒީރާ ދެކޮޅަށް މުޒާހަރާ ކޮށްފި

އީރާނުގެ ޚާރިޖީ ވަޒީރު އައްބާސް އަރަގްޗީ، އެމެރިކާއާއެކު ސުލްހައިގެ އެއްބަސްވުމެއްގައި ސޮއިކުރުމާ ގުޅޭގޮތުން ޓީވީ މެދުވެރިކޮށް ދެއްވި އިންޓަވިއުއަކާ ގުޅިގެން، އީރާނުގެ އިރުއުތުރު ސިޓީއެއް ކަމަށްވާ މަޝްހަދުގައި ހުންނަ ޚާރިޖީ ވުޒާރާގެ އޮފީސް ދޮރުމަތީގައި ހޮނިހިރު ދުވަހު އެތައް ބަޔަކު މުޒާހަރާކޮށް، އޭނާއާ ދެކޮޅަށް އަޑުއުފުލައިފިއެވެ.

ފާރްސް ނިއުސް އެޖެންސީން އާންމުކޮށްފައިވާ ވީޑިއޯއަކުން ފެންނަ ގޮތުގައި، ކަޅު ކުލައިގެ ބުރުގާ އަޅައިގެން ތިބި އަންހެނުންތަކެއް އެ އިމާރާތުގެ ކުރިމަތީގައި ރަތް އަދި ކަޅު ކުލައިގެ ދިދަތައް ހޫރުވަމުން، "ޚާއިނު އަރަގްޗީ މަރާލުމަށާއި، އޭނާއަކީ ބޭރުގެ ނުފޫޒު ފަތުރާ މީހެއް" ކަމަށް ބުނެ އަޑުގަދަކޮށްފައިވެއެވެ.

މި މުޒާހަރާތައް ކުރިއަށްދަނީ، އެމެރިކާގެ ރައީސް ޑޮނަލްޑް ޓްރަމްޕާއި މެދުވެރިއެއްގެ ދައުރު އަދާކުރާ ޕާކިސްތާނުން ބާރުއަޅަމުންދާ ސުލްހައިގެ އެއްބަސްވުމާ، އީރާނުގެ ހަރުކަށި ފިކުރުގެ ފަރާތްތަކުން ދެކޮޅު ހަދަމުންދާ ދަނޑިވަޅެއްގައެވެ.

އެ ފަރާތްތަކުން ބުނާ ގޮތުގައި މި އެއްބަސްވުމަކީ އީރާނުގެ މަސްލަހަތު ހިމެނޭ ކަމެއް ނޫނެވެ. އަދި މި އެއްބަސްވުމުގެ ސަބަބުން ހުރްމުޒް ކަނޑުއޮޅީގެ މައްޗަށް އީރާނުން ބާއްވާ ނުފޫޒު ގެއްލިގެންދާނެ ކަމަށްވެސް އެފަރާތްތަކުން ދަނީ ބުނަމުންނެވެ. މީގެ އިތުރުން، މި އެއްބަސްވުން ކާމިޔާބު ކުރުމަށްޓަކައި އީރާނުގެ މަޝްވަރާވެރިން މާ ބޮޑެތި ދޫތަކެއް ދީފައިވާ ކަމަށްވެސް އެ ފަރާތްތަކުން ތުހުމަތު ކުރެއެވެ.

ހުކުރު ދުވަހު ދައުލަތުގެ ޓީވީއަށް ދެއްވި އިންޓަވިއުއެއްގައި އަރަގްޗީ ވިދާޅުވީ، މިހާރު ހުށަހެޅިފައިވާ އެއްބަސްވުމުގެ ދަށުން، ހުރްމުޒް ކަނޑުއޮޅި ބަންދުކުރުމާ ގުޅިގެން އީރާނުގެ ބަނދަރުތަކަށް އެމެރިކާގެ ކަނޑުގެ ސިފައިން ކުރިމަތިކޮށްފައިވާ ހުރަސްތައް ނައްތާލުމަށް ހިމަނާފައިވާ ކަމަށެވެ.

މީގެ އިތުރުން އަރަގްޗީ ވިދާޅުވީ، ހުރްމުޒް ކަނޑުއޮޅި ބެލެހެއްޓުމުގެ ކަންކަން ކުރިއެކޭ އެއްގޮތަށް ދެން ކުރިއަށް ނުދާނެ ކަމަށާއި، އެ ސަރަހައްދަކީ އީރާނުގެ ދިފާއީ ބާރު ދައްކުވައިދޭ އެންމެ މުހިންމު އެއް ވަސީލަތް ކަމަށެވެ.

ސޯޝަލް މީޑިއާގައި ދައުރުވަމުންދާ އަދި އޭއެފްޕީ ނިއުސް އެޖެންސީއަށް މިހާތަނަށް ކަށަވަރު ކުރެވިފައި ނުވާ އެހެން ވީޑިއޯތަކުން ފެންނަ ގޮތުގައި، ތެހެރާންގައި ހުންނަ ޚާރިޖީ ވުޒާރާގެ އިމާރާތް ކުރިމަތީގައި ތިބި މީހުން ދަނީ އަރަގްޗީގެ އިތުރުން، މަޖިލީހުގެ ރައީސް އަދި އިސް މަޝްވަރާވެރިޔާ މުޙައްމަދު ބާގިރު ގާލިބާފް އިސްތިއުފާ ދިނުމަށް ގޮވާލަމުންނެވެ.

ހަނގުރާމަ ނިމުމަކަށް ގެނައުމުގެ މި އެއްބަސްވުމުގައި އާދީއްތަ ދުވަހު ސޮއިކުރެވިދާނެ ކަމަށް ޑޮނަލްޑް ޓްރަމްޕާއި ޕާކިސްތާނުން ހޮނިހިރު ދުވަހު ބުނެފައިވީ ނަމަވެސް، އީރާނުން ވަނީ އެއްބަސްވުމުގައި ސޮއިކުރާނެ ވަގުތަކާ މެދު ވަރަށް ބޮޑަށް ސަމާލުވެ، ރަސްމީކޮށް ވަކި އެއްޗެއް ބުނަން ދެކޮޅު ހަދާފައެވެ.