"ނަތަންޔާހޫ އަށް ނާކާމިޔާބުވެ" އީރާނާއި އެމެރިކާއާ ދެމެދު ވެވޭ އެއްބަސްވުމުގެ ސަބަބުން އިޒްރޭލުގެ ހަނގުރާމައިގެ މަގްސަދުތައް ހާސިލްނުވާނެ: ލެޕިޑް

އީރާނާއި އެމެރިކާއާ ދެމެދު ވެވޭ ސުލްހައިގެ އެއްބަސްވުމުގެ ސަބަބުން، އިޒްރޭލުގެ ސަރުކާރުން ކަނޑައަޅާފައިވާ ހަނގުރާމައިގެ މަގްސަދުތައް ހާސިލްނުވާނެ ކަމަށް އިޒްރޭލުގެ ކުރީގެ ބޮޑުވަޒީރު އަދި މިހާރުގެ އިދިކޮޅު ސިޔާސީ ލީޑަރު ޔައީރު ލެޕިޑް ބުނެފިއެވެ.

ހޮނިހިރު ދުވަހު އެކްސްގައި ކުރި ޕޯސްޓެއްގައި ލެޕިޑް ބުނީ، މިފަދަ އިންތިޒާމެއް ހަމަޖެހިއްޖެ ނަމަ، އީރާނުގެ މިހާރުގެ ސަރުކާރު ދެމިއޮންނާނެ ކަމަށާއި، އަދި އިސްލާމީ ޖުމްހޫރިއްޔާގެ މިސައިލް ޕްރޮގްރާމަށް ވެސް އެއްވެސް ބަދަލެއް ނައިސް ކުރިއަށްދާނެ ކަމަށެވެ.

ލެޕިޑް މިހެން ބުނެފައިވަނީ، އެމެރިކާ އާއި އިޒްރޭލުން އީރާނަށް ދިން ހަމަލާތަކާ ގުޅިގެން އުފެދިފައިވާ ނުތަނަވަސްކަން ނިމުމަކަށް ގެނައުމަށްޓަކައި، ތެހެރާނާއި ވޮޝިންޓަނާ ދެމެދު ކައިރި މުސްތަގުބަލެއްގައި ފަހުމުނާމާއެއްގައި ސޮއިކޮށްފާނެ ކަމަށް ބެލެވޭ ދަނޑިވަޅެއްގައެވެ. މި ފަހުމުނާމާގައި ސޮއިކޮށްފި ނަމަ، އޭގެ ފަހުން ދެ ގައުމުގެ ދެމެދުގައި ރަސްމީ އެއްބަސްވުމެއް ގާއިމުކުރެވޭނެއެވެ.

ފެބްރުއަރީ 27 ގައި ދިން ހަމަލާތަކާއި، މިދިޔަ ޖޫން މަހު ދިން ހަމަލާތަކަކީ ވެސް އިޒްރޭލުގެ ބާރުއެޅުމުގެ މަތިން ދީފައިވާ ހަމަލާތަކެއް ކަމަށް ގިނަ ރިޕޯޓުތަކެއް ބުނެއެވެ.

އީރާނުން ދިން ވަރުގަދަ ރައްދު ހަމަލާތަކާ ގުޅިގެން، އެމެރިކާގެ ރައީސް ޑޮނަލްޑް ޓްރަމްޕް އަމިއްލަފުޅަށް ހަނގުރާމަ ހުއްޓާލުމަށް އިއުލާން ކުރެއްވިތާ އެއްދުވަސް ފަހުން، އޭޕްރީލް 8 ވަނަ ދުވަހު ވެސް ލެޕިޑް ވަނީ އެ ނިންމުމަށް ވަރަށް ބޮޑަށް ފާޑުކިޔާފައެވެ. އޭނާ އެދުވަހު ބުނީ އެ ނިންމުމަކީ ނަތަންޔާހޫއަށް ކުރިމަތިވި "ސިޔާސީ ކާރިސާއެއް" ކަމަށެވެ.

އޭނާ އިތުރަށް ބުނެފައިވަނީ، އިޒްރޭލުގެ ސަލާމަތީ ކަންކަމާ ގުޅޭ އެންމެ މުހިންމު ނިންމުންތައް ނިންމި އިރު، ތެލް އަވީވް އޮތީ އެ މަޝްވަރާގެ މޭޒުދޮށުގައި ވެސް ނޫން ކަމަށެވެ.

މީގެ އިތުރުން، ނަތަންޔާހޫ އަމިއްލައަށް ކަނޑައެޅި މަގްސަދުތަކުގެ ތެރެއިން އެންމެ މަގްސަދެއް ވެސް ހާސިލްކުރުމުގައި އޭނާ ސިޔާސީ ގޮތުންނާއި ސްޓްރެޓެޖިކް ގޮތުން ނާކާމިޔާބުވެފައިވާ ކަމަށް ލެޕިޑް ފާހަގަކުރިއެވެ.

އީރާނާ ދެކޮޅަށް ކުރިން ކުރެވުނު ހަނގުރާމަތަކެކޭ އެއްފަދައިން، މިފަހަރުގެ ހަނގުރާމައިގައި ވެސް އީރާނުގެ ސަލާމަތީ ބާރުތަކުން ވަނީ އެ ސަރަހައްދުގައި ހުރި އެމެރިކާ އާއި އިޒްރޭލުގެ ނާޒުކު އަދި މުހިންމު އަމާޒުފަތްތަކަށް ވަރުގަދަ ރައްދު ހަމަލާތަކެއް ދީފައެވެ.

މި ރައްދު ހަމަލާތައް 100 އަށްވުރެ ގިނަ ފަހަރު ދީފައިވާއިރު، ކޮންމެ ހަމަލާއަކާއެކު އިޒްރޭލުގެ މިލިއަނަކަށްވުރެ ގިނަ ވަޒަންވެރިން ރައްކާތެރިކަން ހޯދުމަށް ބަންކަރުތަކަށް ވަންނަން ޖެހުނެވެ. އަދި އިޒްރޭލުން ހިފާފައިވާ ބިންތަކަށް ލިބުނު ބޮޑެތި ގެއްލުންތަކުގެ ފޮޓޯ އާއި ވީޑިއޯތައް ވަނީ އާންމުވެފައެވެ.

މީގެ އިތުރުން، އީރާނަށް ދިން ގާނޫނާ ޚިލާފު ހަމަލާތަކުގެ ބަދަލުހިފުމެއްގެ ގޮތުން، ތެހެރާނުން ވަނީ ދަތުރުފަތުރުގައި މުހިންމު ހުރުމުޒް ކަނޑުއޮޅި ދުޝްމަނުންނާއި އެމީހުންގެ ބައިވެރިންނަށް ބަންދުކޮށްފައެވެ. މި ނިންމުމުގެ ސަބަބުން ދުނިޔޭގެ ހަކަތައިގެ ބާޒާރަށް ބޮޑު ލޮޅުމެއް އެރިއެވެ.