އިޒްރޭލް އަކީ އެމެރިކާާގެ ދަށުވެފައި އޮތް ޤައުމެއް ނޫން ކަމަށް ވިދާޅުވެ، ބެން ގްވީރްގެ ރުޅިގަނޑު ޓްރަމްޕް އަށް

އެމެރިކާ އާއި އީރާންއާ ދެމެދު ޤާއިމު ކުރާ އެއްބަސްްވުމެއްގެ ސަބަބުން އިޒްރޭލް ނުބަނދެވޭނެ ކަމަށް ވިދާޅުވެ، އިޒްރޭލްގެ ޤައުމީ ސަލާމަތާ ބެހޭ މިނިސްޓަރު އިޓަމާ ބެން ގްވީރްގެ ރުޅިގަނޑު އެމެެރިކާގެ ރައީސް ޑޮނަލްޑް ޓްރަމްޕް އަށް އަމާޒު ކޮށްފި އެވެ. 

އެކްސްގައި ކުރެއްވި ޕޯސްޓެއްގައި ބެން ގްވީރް ވިދާޅުވީ، އިޒްރޭލް އަކީ އެމެރިކާގެ ދަށުގައި އޮންނަ ޤައުމެއް ނޫން ކަމަށާއި، އިޒްރޭލް އަކީ މިނިވަން އަދި އަމިއްލަ ސިޔާދަތު ލިބިފައިވާ ޤައުމެއް ކަމަށެވެ. 

އެ ޕޯސްޓުގައި ބެން ގްވީރް ވިދާޅުވީ، ލުބުނާންގެ ހިޒްބުﷲ ޖަމާއަތާ ދެކޮޅަށް ކުރަމުން އަންނަ މަސައްކަތުގައި އިޒްރޭލް އިން ފަސް ނުޖެހޭނެ ކަމަަށެވެ. އަދި އޭނާ ވިދާޅުވީ އެމެރިކާގެ ރައީސް ޓްރަމްޕްގެ އެއްބަސްވުމުން، އިޒްރޭލް އަށް ބާރު ފޯރުވޭނެ އެއްވެސް ގޮތެއް ނެތް ކަމަށާއި، އިޒްރޭލް އަކީ އެމެރިކާގެ ދަށުވެފައި އޮންނަ ޤައުމެއް ނޫން ކަމަށެވެ. 

އިޒްރޭލް އަކީ މިނިވަން ސިޔާދަތެއް ލިބިފައިވާ ޤައުމެއް ކަމަށާއި، އެ ޤައުމުގެ ސަލާމަތާއި ރައްކާތެރިކަން ކަށަވަރު ނުކުރާ އެއްބަސްވުމެއްގައި އިޒްރޭލް އިން ބައިވެރި ނުވާނެ ކަމަށް ވެސް ބެން ގްވީރް ވިދާޅުވި އެވެ. އަދި އިޒްރޭލްގެ ހަނގުރާމަވެރިން ލުބުނާންގައި ކޮންޓްރޯލް ކުރާ ސަރަހައްދު ތަކުން، އެއްވެސް ވަރަކަށް ފަހަތަށް ނުޖެހޭނެ ކަމުގެ އިންޒާރު ވެސް ބެން ގްވީރް ވަނީ ދެއްވައިފަ އެވެ. 

ބެން ގްވީރް މިހެން ވިދާޅުވެފައި ވަނީ، އެމެރިކާ އާއި އިޒްރޭލްގެ ދެ މެދުގައި ލުބުނާންއާ ގުޅޭ ވާހަކަތައް ދައްކަމުން އަންނަ ދަނޑިވަޅެއްގައި އެވެ. އިޒްރޭލްގެ ސަލާމަތާއި ރައްކާތެރި ކަަަމަށް ކުރިމަތިވާ ނުރައްކާތައް ނައްތާލުމަށް ކަމަށް ބުނެ، އެ ޤައުމުން ކުރިއަށް ގެންދާ އަސްކަރީ އޮޕަރޭޝަންތަކާ ގުޅިގެން ބައިނަލްއަޤުވާމީ މުޖުތަމައުގެ ފާޑު ކިޔުން އިޒްރޭލް އަށް އަންނަނީ އަމާޒު ވަމުންނެވެ. 

އެމެރިކާ އާއި އިޒްރޭލްއާ ދެމެދު ގާތް ގުޅުމެއް އޮތް ނަމަވެސް، އެމެރިކާ އިން ވަނީ އީރާާން އާއެކު ސުލްޙައިގެ އެއްބަސްވުމަކަށް އައިސްފައި އެވެ. ހުކުރު ދުވަހު އެ އެއްބަސްވުމުގައި ރަސްމީކޮށް ސޮއި ކުރުމަށް ހަމަޖެހިފައިވާއިރު، މިއީ އިޒްރޭލް އިން ޤަބޫލު ވާނެ ކަމެއް ނޫން ކަމަށް މަސްރަހު ދިރާސާ ކުރާ ފަރާތް ތަކުން ބުނެފައިވެ އެވެ.