ސުލްޙައިގެ މަޝްވަރާ ތަކަށް ޤަތަރުގެ ވަފުދެއް އީރާން އަށް

އީރާން އާއި އެމެރިކާއާ ދެމެދު މެދު އިރުމަތީގައި ހިނގަމުންދާ ހަމަނުޖެހުން ތަކާއި ހަނގުރާމަ ހުއްޓުވުމަށް ކުރަމުންދާ މަސައްކަތުގެ ތެރެއިން، ޤަތަރުގެ މަތީ ފަންތީގެ ވަފުދެއް އާދީއްތަ ދުވަހު އީރާންގެ ވެރި ރަށް ތެހެރާން އަށް ޒިޔާރަތް ކޮށްފި އެވެ.

މިއީ ދެ ގައުމުގެ ދެމެދުގައި އޮތް ނުތަނަވަސްކަން ކުޑަކޮށް، ސުލްހަ ގާއިމު ކުރުމަށް ޤަތަރުން މެދުވެރިއެއްގެ ދައުރު އަދާ ކުރުމަށް ކުރަމުންދާ މަސައްކަތުގެ ބައެއް ކަމަށް އީރާންގެ މީޑިއާ ތަކުން ވަނީ ރިޕޯޓު ކޮށްފައި އެވެ.

އީރާންގެ އިސްނާ ނިއުސް އެޖެންސީ އިން ބުނެފައިވާ ގޮތުގައި، މި ދަތުރުފުޅުގައި އީރާން އަށް ވަޑައިގެންނެވީ ޤަތަރުގެ ފޮރިން މިނިސްޓަރުގެ މުޝީރެކެވެ. މި ވަފުދުގެ ބޭނުމަކީ މަސްރަހު ފިނި ކުރުމަށް ކުރެވޭ މަޝްވަރާތައް ކުރިއަށް ގެންދިއުން ކަމަށް އެ ނޫހުން މައުލޫމާތު ދީފައިވެ އެވެ.

މީގެ އިތުރުން އީރާންގެ ތަސްނީމް ނިއުސް އެޖެންސީ އިން ރިޕޯޓު ކޮށްފައިވާ ގޮތުގައި، ޤަތަރުގެ ވަފުދުން އީރާންގެ އިސްވެރިންނާ ބައްދަލު ކުރައްވައި، ޑިޕްލޮމެޓިކް ދާއިރާ އިން މިހާރު ކުރިއަށްދާ މަސައްކަތް ތަކުގެ އެންމެ ފަހުގެ މައުލޫމާތުތަކާ ގުޅޭ ގޮތުން ފުޅާ ދާއިރާއެއްގައި މަޝްވަރާ ކުރައްވާނެ އެވެ. މި ބައްދަލުވުން ތަކުގައި މައިގަނޑު ގޮތެއްގައި އަލި އަޅުވާލާނީ ސަރަހައްދީ ހަމަޖެހުން ގާއިމު ކުރުމަށެވެ.

މެދު އިރުމަތީގައި އީރާން އާއި އެމެރިކާއާ ދެމެދު އުފެދިފައިވާ ހަނގުރާމައިގެ ހާލަތަށް ނިމުމެއް ގެނައުމަށް ޤަތަރުން ދަނީ މުހިންމު ދައުރެއް އަދާ ކުރަމުންނެވެ. މި މަޝްވަރާ ތަކަކީ އެތައް މަހަކަށް ދެމިގެން ގޮސްފައިވާ ނުތަނަވަސް ކަމަށް ސިޔާސީ ހައްލެއް ހޯދުމަށް ކުރެވޭ އުންމީދީ މަސައްކަތެއްގެ ގޮތުގައި މަސްރަހު ދިރާސާ ކުރާ ފަރާތް ތަކުން ސިފަ ކުރެ އެވެ.

އީރާންގެ މީޑިއާ ތަކުން މި ދަތުރުފުޅުގެ މައުލޫމާތު ހާމަކުރި ނަމަވެސް، މި ބައްދަލުވުން ތަކުން ނިންމާ ނިންމުންތަކާ ގުޅޭ ގޮތުން ޤަތަރުގެ ސަރުކާރުން ރަސްމީކޮށް އަދި ވަކި އެއްޗެއް ހާމަ ކޮށްފައި ނުވެ އެވެ. ނަމަވެސް މިފަދަ މަތީ ފަންތީގެ ދަތުރު ތަކަކީ ސަރަހައްދީ ރައްކާތެރި ކަމަށް އެޅޭ މުހިންމު ފިޔަވަޅެއްގެ ގޮތުގައި ބެލެވެ އެވެ.