ޕެރަގުއޭ ބަލިކޮށް، އެމެރިކާ އަށް ވަރުގަދަ ފެށުމެއް

މިހާރު ކުރިއަށްދާ ފީފާ ވޯލްޑް ކަޕްގެ ގުރޫޕް ޑީގައި ޕެރަގުއޭއާ ދެކޮޅަށް ކުޅުނު މެޗުން މޮޅުވެ، މުބާރާތް ބާއްވާ އެއް ޤައުމު ކަމަށްވާ އެމެރިކާ އިން ވަރުގަދަ ފެށުމެއް ހޯދައިފި އެވެ.

އެމެރިކާގެ ލޮސް އެންޖެލެސް ސްޓޭޑިއަމްގައި ހޮނިހިރު ދުވަހުގެ ފަތިހު ކުޅުނު މެޗުގައި އެމެރިކާ އިން ވަނީ 4-1 އިން ޕެރަގުއޭ ބަލިކޮށްފަ އެވެ. މެޗުގެ ފުރަތަމަ ހާފުގައި އެމެރިކާ އިން ވަނީ ތިން ލަނޑު ޖަހައި، މެޗުގެ ކޮންޓްރޯލް ހޯދައިފަ އެވެ. ޕެރަގުއޭގެ ހަމައެކަނި ލަނޑު އެ ޓީމުން ޖެހީ މެޗުގެ ދެ ވަނަ ހާފުގައި އެވެ.

މެޗު ފަށައިގެން ހަތް ވަނަ މިނެޓުގައި އެމެރިކާ އަށް ލީޑު ލިބުނީ ޕެރަގުއޭގެ ޑެމިއަން ބޮބަޑިލާ އަތުން ބައި ކޮޅަށް ވަތް ލަނޑުންނެވެ. އޭގެ ފަހުން މެޗުގެ ފުރަތަމަ ހާފުގެ 31 ވަނަ މިނެޓުގައި އެމެރިކާގެ ދެ ވަނަ ލަނޑު ޖަހައި ލީޑު ފުޅާ ކޮށްދިނީ ފޮލަރިން ބަލޮގަން އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ ކްރިސްޓިއަން ޕުލިސިޗް އެވެ.

މެޗުގެ ފުރަތަމަ ހާާފުގެ އިތުރު ވަގުތުގައި ބަލޮގަން ވަނީ އިތުރު ލަނޑެއް ޖަހައި، އެމެރިކާ އަށް ތިން ލަނޑުގެ ލީޑެއް ހޯދައި ދީފައި އެވެ. އެ ލަނޑު ޖަހަން ބަލޮގަން އަށް ފުރުސަތު ތަނަވަސްކޮށްދިނީ މަލިކް ޓިލްމަން އެވެ. މެޗުގައި ޕެރަގުއޭގެ ހަމައެކަނި ލަނޑު އެ ޓީމުން ޖެހީ 73 ވަނަ މިނެޓުގަ އެވެ. އެ ލަނޑު އެ ޓީމަށް ޖަހައިދިނީ މައުރީސިއޯ އެވެ. މެޗުގައި އޭނާ ކުޅެން ނިކުތީ ވެސް ބަދަލު ކުޅުންތެރިޔެއްގެ ގޮތުގައި އެވެ.

އޭގެ ފަހުން މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި އެމެރިކާ އިން ވަނީ ހަތަރު ވަނަ ލަނޑެއް ޖަހައިފަ އެވެ. އެ ލަނޑު އެމެރިކާ އަށް ޖަހައިދިނީ ބަދަލު ކުޅުންތެރިޔެއްގެ ގޮތުގައި ކުޅެން ނިކުތް ޖިއޮވާނީ ރޭނާ އެވެ. 

މުބާރާތުގެ ގުރޫޕް ސްޓޭޖުގައި އެމެރިކާގެ ދެ ވަނަ މެޗުގައި ނިކުންނާނީ އޮސްޓްރިއާއާ ދެކޮޅަށެވެ. އަދި ފަހު މެޗުގައި ނިކުންނާނީ ތުރުކީއާ ދެކޮޅަށެވެ. އެންމެ ފަހުން 2022 ވަނަ އަހަރު ޤަތަރުގައި އޮތް ވޯލްޑް ކަޕްގައި އެމެރިކާ އިން ވަނީ ގަދަ 16 ވަނަ ބުރުގައި ވާދަކޮށްފައި އެވެ. ނަމަވެސް ގަދަ 16 ވަނަ ބުރުގައި ނެދަލެންޑްސް އަތުން ބަލިވެ މުބާރާތުން ކެޓީ އެވެ.