ފަހަތުން އަރައި ކެނެޑާ އިން ބޮސްނިއާއާ އެއްވަރު ކޮށްފި

މިހާރު ކުރިއަށްދާ ފީފާ ވޯލްޑް ކަޕްގެ ގުރޫޕް ބީގައި ބޮސްނިއާއާ ދެކޮޅަށް ކުޅުނު މެޗުން، ފަހަތުން އަރައި ކެނެޑާ އެއްވަރު ކޮށްފި އެވެ.

ކެނެޑާގެ ޓޮރޮންޓޯ ސްޓޭޑިއަމްގައި ހުކުރު ދުވަހުގެ ރޭ ދަންވަރު ކުޅުނު މެޗު ނިމުނީ 1-1 އިން އެއްވަރު ވެގެންނެވެ. މެޗުގައި ބޮސްނިއާ އިން ލަނޑު ޖަހައި ކުރި ހޯދާފައި ވަނިކޮށް، ކެނެޑާ އިން ވަނީ ފަހަތުން އަރައި ލަނޑު ޖަހައިގެން ނަތީޖާ ހަމަހަމަ ކޮށްފަ އެވެ.

މެޗުގެ ފުރަތަމަ ހާފުގެ 21 ވަނަ މިނެޓުގައި ބޮސްނިއާ އިން ވަނީ ކެނެޑާ ކޮޅަށް ލަނޑު ޖަހައި ލީޑު ނަގައިފަ އެވެ. އެ ލަނޑު ބޮސްނިއާ އަށް ޖަހައިދިނީ ޖޯވޯ ލުކިޗް އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ ސީޑް ކޮލާސިނަޗް އެވެ. އެ ލަނޑާ އެކު ބޮސްނިއާ އިން ފުރަތަމަ ހާފު ނިންމާލީ ލީޑުގައި އޮވެގެންނެވެ. 

މެޗުގެ ދެ ވަނަ ހާފުގައި ކެނެޑާ އިން ވަނީ ލަނޑު ޖަހައި ނަތީޖާ ހަމަހަމަ ކުރުމަށް ވަރަށް ބޮޑަށް މަސައްކަތް ކޮށްފައި އެވެ. އެގޮތުން އެ ޓީމަށް މެޗުގެ ނަތީޖާ ހަމަހަމަ ކުރެވުނީ 78 ވަނަ މިނެޓުގައި ކައިލް ލަރިން ޖެހި ލަނޑުންނެވެ. މެޗުގައި އޭނާ ކުޅެން ނިކުތީ ވެސް ބަދަލު ކުޅުންތެރިޔެއްގެ ގޮތުގައި އެވެ. އެ ލަނޑު ޖަހަން ލަރިން އަށް ފުރުސަތު ތަނަވަސްކޮށްދިނީ ޖޮނަތަން ޑޭވިޑް އެވެ.

މިފަހަރުގެ ވޯލްޑް ކަޕް ހޯސްޓު ކުރާ އެއް ޤައުމަކީ ކެނެޑާ އެވެ. އެގޮތުން މުބާރާތް ބާއްވަނީ ކެނެޑާގެ އިތުރުން އެމެރިކާ އާއި މެކްސިކޯ އެކުވެގެންނެވެ. މުބާރާތުގެ ގުރޫޕް ސްޓޭޖުގައި ދެން ކެނެޑާ ނިކުންނާނީ ޤަތަރާ ދެކޮޅަށެވެ. އަދި ގުރޫޕް ސްޓޭޖުގެ ފަހު މެޗުގައި ކެނެޑާ ނިކުންނާނީ ސްވިޒަލެންޑާ ދެކޮޅަށެވެ.