ދެކުނު އެފްރިކާ ބަލިކޮށް، މެކްސިކޯ އަށް ފުރަތަމަ މޮޅު

ފީފާ ވޯލްޑް ކަޕްގެ ފުރަތަމަ މެޗުގައި ދެކުނު އެފްރިކާ ބަލިކޮށް، މެކްސިކޯ އިން ފުރަތަމަ މޮޅު ހޯދައިފި އެވެ.

ބުދަ ދުވަހުގެ ރޭ ދަންވަރު ކުޅުނު މެޗު މެކްސިކޯ އިން ކާމިޔާބު ކުރީ 2-0 އިންނެވެ. މެޗުގެ ފުރަތަމަ ހާފުގައި މެކްސިކޯ އިން އެއް ލަނޑު ޖެހިއިރު، އަނެއް ލަނޑު އެ ޓީމުން ޖެހީ ދެ ވަނަ ހާފުގައި އެވެ. 

މެޗު ފަށައިގެން ނުވަ ވަނަ މިނެޓުގައި މެކްސިކޯ އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު މެކްސިކޯ އަށް ޖަހައިދިނީ  ޖޫލިއަން ކުއިނޯނޭސް އެވެ. އޭގެ ފަހުން ވެސް މެޗުގައި މެކްސިކޯ އިން ލަނޑު ޖަހަން މަސައްކަތް ކުރި އެވެ.

މެޗުގެ ދެ ވަނަ ހާފު ފަށައިގެން ކުރީ ކޮޅު ދެކުނު އެފްރިކާގެ ސްޕެޕޭލޯ ސިޓޯލް އަށް ސީދާ ރަތް ކާޑު ދެއްކުމުން، އެ ޓީމު ކުޅެން ޖެހުނީ އެއް ކުޅުންތެރިޔަކު މަދުކޮށެވެ. އޭގެ ފަހުން މެޗުގެ 67 ވަނަ މިނެޓުގައި މެކްސިކޯގެ ރައުލް ހިމިނޭޒް ވަނީ އެ ޓީމުގެ ދެ ވަނަ ލަނޑު ޖަހައި ލީޑު ފުޅާ ކޮށްފައި އެވެ. 

މެޗުގެ ފުރިހަމަ ވަގުތު ހަމަވާން ހަ މިނެޓަށް ވެފައި ވަނިކޮށް، ދެކުނު އެފްރިކާގެ ތެމްބާ ޒްވާނޭ އަށް ވެސް ރަތް ކާޑު ދެއްކި އެވެ. އޭގެ ފަހުން މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި މެކްސިކޯގެ ސެޒާ މޮންޓޭސް އަށް ވެސް ވަނީ ސީދާ ރަތް ކާޑު ދައްކައިފަ އެވެ. 

މިފަހަރުގެ ވޯލްޑް ކަޕް ބާއްވަނީ މެކްސިކޯގެ އިތުރުން އެމެރިކާާ އާއި ކެނެޑާ އެކުވެގެންނެވެ.