މެދު އިރުމަތީގެ ސަރަހައްދަކީ އެމެރިކާ އަށް "ނަރަކަ" އަށް ވާނެ ކަމަށް ބުނެ، އީރާންގެ ވަރުގަދަ އިންޒާރެއް

އީރާން އަށް އަމާޒުކޮށް އެމެރިކާ އިން އިތުރު ހަމަލާ ތަކެއް ދީފައިވާ މި ދަނޑިވަޅުގައި، މެދު އިރުމަތީގެ ސަރަހައްދަކީ އެމެރިކާ އަށް "ނަރަކަ" އަށް ވާނެ ކަމަށް ބުނެ އީރާން އިން ވަރުގަދަ އިންޒާރެއް ދީފި އެވެ. 

މި އިންޒާރު ދީފައި ވަނީ އީރާންގެ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ) އިންނެވެ. އީރާންގެ ތަސްނީމް ނިއުސް އެޖެންސީ އިން ރިޕޯޓު ކޮށްފައިވާ ގޮތުގައި، މި އިންޒާރު ދެއްވީ އައިއާރުޖީސީގެ އެއަރޯސްޕޭސް ފޯސްގެ ކޮމާންޑަރު މާޖިދު  މޫސަވީ އެވެ. މޫސަވީ މިހެން ވިދާޅުވެފައި ވަނީ، އެމެރިކާ އިން ދެ ދުވަހެއްގެ މަތިން އީރާން އަށް ހަމަލާ ތަކެއް ދީފައި ވަނިކޮށެވެ. 

މޫސަވީ ވިދާޅުވީ، ހޮރްމޫޒް ކަނޑު އޮޅީގެ އަމާންކަން ނަގާލުމަށް އެމެރިކާ އިން މަސައްކަތް ކުރަމުންދާ ކަމަށެވެ. އަދި އީރާންގެ ހުރިހާ ސަރަހައްދު ތަކުން އެމެރިކާ އަށް ހަމަލާ ދީ، މުޅި ސަރަހައްދަކީ އެމެރިކާގެ ސިފައިންނަށް ނަރަކައެއް ފަދަ ތަނަކަށް ބަދަލުކުރުމަށް ހަމަލާ ދޭނެ ކަމުގެ އިންޒާރު މޫސަވީ ވަނީ ދެއްވައިފަ އެވެ. 

މީގެ އިތުރުން މޫސަވީ ވިދާޅުވީ، މިއީ މެދު އިރުމަތީގައި އެމެރިކާ އިން ދެމުންދާ ހަމަލާ ތަކާއި، ކުރަމުންދާ ކަންތައް ތަކަށް ދޭނީ އެކަށީގެންޗާ ރައްދެއް ކަމަށެވެ. އަދި ކުރިއަށް އޮތް ތަނުގައި އެމެރިކާގެ އަމަލު ތަކަށް ހަރުކަށި ޖަވާބު ތަކެއް ލިބިގެން ދާނެ ކަމަށް ވެސް މޫސަވީ ވަނީ އިންޒާރު ދެއްވައިފަ އެވެ. 

އެމެރިކާ އާއި އީރާންއާ ދެމެދު މަސްލަޙަތު ގޯސްވެފައިވާ މި ދަނޑިވަޅުގައި، އީރާންގެ އަސްކަރީ އިސްވެރިން މިފަދަ ވަރުގަދަ ބަހުގެ ހަމަލާ ތަކެއް ދީފައި ވަނީ، ސަރަހައްދީ ރައްކާތެރިކަމާ ގުޅޭ ގޮތުން ބައިނަލްއަޤުވާމީ ދުނިޔެ އިން ކަންބޮޑުވުން ފާޅު ކުރަމުން އަންނަ ވަގުތެއްގަ އެވެ. ޚާއްސަކޮށް ތެޔޮ އުފުލާ މައި މަގު ކަމަށްވާ ހޮރްމޫޒް ކަނޑު އޮޅީގެ ސަލާމަތާ މެދު މިހާރު ވަނީ ސުވާލު އުފެދިފަ އެވެ.