އެމެރިކާ އާއި އީރާން އިން ސުލްޙައިގެ އެއްބަސްވުމުގައި ސޮއި ކުރުމަށް ފްރާންސް އިން ގޮވާލައިފި

އެމެރިކާ އާއި އީރާންއާ ދެމެދު އުފެދިފައިވާ ނުތަނަވަސްކަން ހައްލު ކުރުމަށްޓަކައި ސުލްހައިގެ އެއްބަސްވުމެއްގައި ސޮއި ކުރުމަށް ފްރާންސް އިން ގޮވާލައިފި އެވެ.

ފްރާންސްގެ ފޮރިން މިނިސްޓަރު ޖީން ނޮއެލް ބަރޮޓް ވިދާޅުވީ، ދެ ޤައުމުގެ ދެ މެދުގައި އޮތް މައްސަލަ ތަކަށް ޙައްލެއް ހޯދުމަށް ދެ ފަރާތުގެ މެދުގައި ވެސް އިޚުލާސްތެރި ނިޔަތެއް އޮތް ކަމަށް ޤަބޫލު ކުރައްވާ ކަމަށެވެ. 

ފްރާންސްގެ މީޑިއާއެއް ކަމަށްވާ އެލްސީއައި އަށް ދެއްވި އިންޓަވިޔުއެއްގައި ބަރޮޓް ވިދާޅުވީ، މިހާރު އޮތް ޙާލަތަކީ އެއްވެސް ބަޔަކަށް އޭގެއިން ފައިދާއެއް ނެތް، އަދި ދެ ފަރާތަށް ވެސް ގެއްލުން ހުރި ޙާލަތެއް ކަމަށެވެ. އެހެންކަމުން މި ފުރުސަތުގެ ބޭނުން ހިފައި، މިހާރު އޮތް ނުތަނަވަސްކަން ނިމުމަކަށް ގެނައުމަށް ބަރޮޓް ވަނީ ދެ ޤައުމަށް ގޮވާލައްވައިފަ އެވެ. 

މި މައުލޫމާތު ހިއްސާ ކުރައްވަމުން ބަރޮޓް ވިދާޅުވީ، އޭނާ އާއި އީރާންގެ ފޮރިން މިނިސްޓަރު އައްބާސް އަރާގްޗީއާ މަޝްވަރާ ކުރެއްވި ކަމަށެވެ. އެގޮތުން ފޯނުން ގުޅުއްވައި، އަރާގްޗީއާ ވާހަކަ ދައްކަވާފައިވާ ކަމަށް ވެސް ބަރޮޓް ވިދާޅުވި އެވެ. ހަމަ އެހެންމެ، މިކަމުގައި ފްރާންސް އިން ގެންގުޅޭ ސްޓޭންޑް، އަދި ފްރާންސްގެ މެސެޖު އީރާންގެ ފޮރިން މިނިސްޓަރު އަރާގްޗީއާ ހިއްސާ ކުރައްވާފައި ވާނެ ކަމަށް ވެސް ބަރޮޓް ވިދާޅުވި އެވެ.

މީގެ އިތުރުން، އެމެރިކާ އާއި އީރާންއާ ދެމެދު އެއްބަސްވުމަކަށް އާދެވިދާނެ ކަމުގެ އުންމީދު އެބަ އޮތް ކަމަށް ފާހަގަ ކުރައްވަމުން ބަރޮޓް ވިދާޅުވީ، މިކަމުގައި އޭނާ ހުންނެވީ ވަރަށް ބޮޑަށް ސަމާލު ވެގެން ކަމަށެވެ. ނަމަވެސް، މިހާރު ފެންނަމުންދާ ހެޔޮ ބަދަލުތަކާ އެކު، ދެ ފަރާތުން ވެސް މި އެއްބަސްވުމަށް ވާސިލުވުމުގެ ޝައުޤުވެރިކަން ގެން ގުޅޭކަން އިޙުސާސް ކުރެވޭ ކަމަށް އޭނާ ވިދާޅުވި އެވެ. 

ފްރާންސްގެ ފޮރިން މިނިސްޓަރު ބަރޮޓް އިތުރަށް ވިދާޅުވީ، ސަރަހައްދީ ހަމަޖެހުމަށްޓަކައި މި އެއްބަސްވުމަކީ ކޮންމެހެން މުހިންމު އެއްބަސްވުމެއް ކަމަށާއި، މި ފުރުސަތު ދޫކޮށް ނުލުމަށް ދެ ޤައުމުގެ ސަރުކާރަށް ބާރު އަޅުއްވާ ކަމަށެވެ. މި މަޝްވަރާ ތަކަކީ، ބައިނަލްއަޤުވާމީ މަސްރަހުގައި އުފެދިފައިވާ ނުތަނަވަސްކަން ކުޑަ ކުރުމަށް އެޅޭ މުހިންމު ފިޔަވަޅެއްގެ ގޮތުގައި ފްރާންސް އިން ދެކެ އެވެ.