އެމެރިކާ އާއި އީރާންއާ ދެމެދު ކުރިއަށް އޮތް ދުވަސް ތަކުގައި ރަސްމީކޮށް އެއްބަސްވުމުގައި ސޮއި ކުރަނީ

އެމެރިކާ އާއި އީރާންއާ ދެމެދު އުފެދިފައިވާ މައްސަލަ ތަކަށް ހައްލެއް ހޯދުމަށް ކުރަމުންދާ މަސައްކަތުގެ ދަށުން، ދެ ގައުމުގެ ދެމެދުގައި އެއްބަސްވުމަކާ ހަމައަށް އާދެވިފައިވާ ކަމަށާއި، ކުރިއަށް އޮތް މަދު ދުވަސްކޮޅެއްގެ ތެރޭގައި މި އެއްބަސްވުމުގައި ސޮއި ކުރެވޭނެ ކަމަށް ބެލެވޭ ކަމުގައި އެމެރިކާގެ ސަރުކާރުގެ އިސް އޮފިޝަލަކު ހުކުރު ދުވަހު ވިދާޅުވެއްޖެ އެވެ.

ނަން ހާމަ ނުކުރުމަށް އެދި މީޑިއާ ތަކަށް މައުލޫމާތު ދެއްވަމުން އެ އޮފިޝަލް ވިދާޅުވީ، މަޝްވަރާ ކުރާ ޓީމުން މިހާރު ވަނީ ވަރަށް ރަނގަޅު ހިސާބަކަށް ކަންކަން ގެންގޮސްފައި ކަމަށެވެ. އަދި މުޅިން އެއްބަސްވުން ފައިނަލް ނުވުމުގެ ރޮނގާ ހަމައަށް އަދި ނުދެވުނު ނަމަވެސް، އެއްބަސްވުމަކާ ވަރަށް ގާތަށް ދެވިފައިވާ ކަމަށް އޭނާ ފާހަގަ ކުރެއްވި އެވެ.

މި އެއްބަސްވުމުގައި ހިމެނޭ ކަންކަމަކީ އެމެރިކާގެ ރައީސް ޑޮނަލްޑް ޓްރަމްޕް ބޭނުންފުޅުވާ މައިގަނޑު މަގުސަދުތައް ހާސިލު ވާނެ ކަންކަން ކަމަށާއި، މީގެ ސަބަބުން ކަންކަން ވަރަށް ރަނގަޅު މިސްރާބަކަށް ދާނެ ކަމަށް ވެސް އެމެރިކާގެ އޮފިޝަލް ވިދާޅުވި އެވެ.

މި އެއްބަސްވުމުގެ ދަށުން އެކުލަވާލާ ފަހުމުނާމާ ނުވަތަ މެމޮރެންޑަމް އޮފް އަންޑަސްޓޭންޑިން (އެމްއޯޔޫ) ގެ ދަށުން، ހޮރްމޫޒް ކަނޑު އޮޅި އަލުން ހުޅުވާލުމަށާއި، އީރާންގެ ބަނދަރު ތަކަށް އެމެރިކާ އިން ކުރިމަތި ކޮށްފައިވާ ހުރަސްތައް ނައްތާލުމަށް ވަނީ ނިންމާފައި އެވެ. މީގެ އިތުރުން، އީރާންގެ ނިއުކްލިއާ ޕްރޮގްރާމް ހުއްޓާލުމާއި، އެ ގައުމުގައި މަތީ ދަރަޖަ އަކަށް ފައްކާކޮށްފައިވާ ޔުރޭނިއަމް އެ ގައުމުގައި ބަހައްޓައިގެން ނައްތާލުމަށް ފަހު، ގައުމުން ބޭރު ކުރުމަށް ވެސް މި އެއްބަސްވުމުގައި ހިމެނެ އެވެ.

އެއްބަސްވުމުގެ ކަންކަން ދިގު މުއްދަތަކަށް ދެމެހެއްޓެނިވި ގޮތެއްގައި ކުރިއަށްދާކަން ކަށަވަރު ކުރުމަށްޓަކައި، އީރާންގެ ނިއުކްލިއާ މަރުކަޒުތައް ބަލައި ފާސް ކުރެވޭނެ ހަރުދަނާ ނިޒާމެއް ގާއިމު ކުރުމަށް ވެސް ވަނީ ހަމަޖެހިފައި އެވެ. އީރާން އިން މި އެއްބަސްވުމަށް ފުރިހަމަ އަށް އަމަލު ކުރާ ނަމަ، އެ ގައުމަށް ކުރިމަތި ވެފައިވާ އިގްތިސާދީ ދަތި ތަކުން ސަލާމަތްވުމަށްޓަކައި، ހިފަހައްޓާފައިވާ ފައިސާތައް ދޫކޮށްލުމާއި ދަތި ކުރުމުގެ ފިޔަވަޅު ތަކަށް ލުއި ދިނުމަށް ވަނީ ނިންމާފައި އެވެ.

އެމެރިކާގެ އޮފިޝަލް އިތުރަށް ވިދާޅުވީ، ހަމައެކަނި އެމްއޯޔޫގައި ސޮއި ކުރުމުން ނުވަތަ މަޝްވަރާ ކުރުމުން އީރާން އަށް އެއްވެސް މާލީ ފައިދާއެއް ނުލިބޭނެ ކަމަށެވެ. އިގްތިސާދީ ގޮތުން އީރާން އަށް ލުއި ތަކެއް ލިބޭނީ އެއްބަސްވުމުގެ ދަށުން އެ ގައުމުން އުފުލަން ޖެހޭ ޒިންމާތައް އަދާ ކުރުމުން ކަމަށް އޭނާ ވިދާޅުވި އެވެ.

އެގޮތުން ވައުދު ވެފައިވާ ގޮތަށް ނިއުކްލިއާ މާއްދާތައް ހަވާލު ކުރުމާއި، ނިއުކްލިއާ މަރުކަޒުތައް އުވާލުމުން އެކަންކަމަށް ވަކިވަކިން އިނާޔަތްތައް ލިބިގެން ދާނެ ކަމަށް އޮފިޝަލް މައުލޫމާތު ދެއްވި އެވެ.