ނޭމާ ބްރެޒިލްގެ ޤައުމީ ޓީމަށް، އަންޗެލޮޓީ ބުނީ ވޯލްޑް ކަޕް ކާމިޔާބު ކުރެވޭނެ ކަމަށް

އަންނަ ޖޫން މަހު އެމެރިކާ އާއި މެކްސިކޯ އަދި ކެނެޑާގައި ފަށާ ފީފާ ވޯލްޑް ކަޕަށް ބްރެޒިލްގެ ޤައުމީ ޓީމުން އެކުލަވާލި ސްކޮޑުގައި، ބްރެޒިލްގެ ތަރި ނޭމާ ޖޫނިއާ ހިމަނައިފި އެވެ.

ކާލޯ އަންޗެލޮޓީ އެކުލަވާލި ސްކޮޑުން ނޭމާ އަށް ފުރުސަތު ދީފައިވާއިރު، މިއީ ގިނަ ބަޔަކު އިންތިޒާރު ކޮށްގެން ތިބި ކަމެކެވެ. ބްރެޒިލްގެ ޤައުމީ ޓީމުގައި ނޭމާ ހިމެނުމުން، މިއީ ތިން އަހަރު ދުވަހަށް ފަހު ބްރެޒިލްގެ ފައިނަލް ސްކޮޑުގައި ނޭމާ ހިމެނުނު ފުރަތަމަ ފަހަރެވެ. ފާއިތުވި ދުވަސް ތަކުގައި ނޭމާ އަށް ވަނީ އަނިޔާގެ ގިނަ މައްސަލަ ތަކެއް ކުރިމަތިވެފަ އެވެ.

ބްރެޒިލްގެ ސްކޮޑުން ނޭމާ އަށް ފުރުސަތު ދިނުމަށް ފަހު އަންޗެލޮޓީ ބުނީ، ނޭމާ އަކީ ވޯލްޑް ކަޕްގައި ބްރެޒިލް އަށް ވަރަށް މުހިންމު ކުޅުންތެރިޔަކަށް ވާނެ ކަމަށް ޤަބޫލު ކުރާ ކަމަށެވެ. އެގޮތުން އަންޗެލޮޓީ ބުނީ ނޭމާގެ ޙާލަތު ވަރަށް ގާތުން ބަލަމުން ގެންދިޔަ ކަމަށާއި، ފާއިތުވި އެއް އަހަރުގެ ތެރޭގައި އެކަން ކުރަމުން އައި ކަމަށެވެ. އަދި މި ފަހުން އައިސް ނޭމާ ހުރީ ވަރަށް ފިޓުކޮށް ކަމަށާއި، އޭނާ ދައްކަމުން އައީ މޮޅު ކުޅުމެއް ކަމަށް ވެސް އަންޗެލޮޓީ ބުންޏެވެ.

މިއީ އަންޗެލޮޓީގެ އިރުޝާދުގެ ދަށުން ބްރެޒިލް ކުޅޭ ފުރަތަމަ ވޯލްޑް ކަޕަށް ވާނެ އެވެ. އޭނާއާ ހަވާލު ކޮށްފައިވާ އެންމެ ބޮޑު މަސައްކަތަކީ ވެސް ވޯލްޑް ކަޕްގައި ބްރެޒިލް އަށް ރަނގަޅު ނަތީޖާއެއް ހޯދައި ދިނުމެވެ. ވޯލްޑް ކަޕާ ގުޅޭ ގޮތުން އަންޗެލޮޓީ ބުނީ، ބްރެޒިލް އަށް ވޯލްޑް ކަޕް ކާމިޔާބު ކުރެވޭނެ ކަމަށެވެ. އަދި އެ ވާހަކަ އެހެން ބުނަން އެއްވެސް ގޮތަކަށް ބިރު ނުގަންނަ ކަމަށް ވެސް އަންޗެލޮޓީ ބުނެފައިވެ އެވެ. 

ނޭމާ ވަނީ ބްރެޒިލްގެ ޤައުމީ ޓީމަށް މިހާތަނަށް ކުޅެދިން 128 މެޗުގައި 79 ލަނޑު ޖަހައިފަ އެވެ. ނޭމާ އަކީ ބްރެޒިލްގެ ޤައުމީ ޓީމަށް އެންމެ ގިނަ ލަނޑު ޖަހައިދިން ކުޅުންތެރިޔާ އެވެ. ނޭމާާ ވަނީ މީގެ ކުރިން 2014 ވަނަ އަހަރާއި، 2018 ވަނަ އަހަރު އަދި 2022 ވަނަ އަހަރު އޮތް ވޯލްޑް ކަޕްގައި ވެސް ބްރެޒިލްއާ އެކު ކުޅެފަ އެވެ. އެހެންކަމުން މިފަހަރު މިއީ ނޭމާ ކުޅޭނެ ހަތަރު ވަނަ ވޯލްޑް ކަޕް އެވެ.