ވޯލްޑް ކަޕާ ގުޅޭ މަޝްވަރާތައް ކުރުމަށް، ފީފާ އިން އީރާންއާ ބައްދަލު ކުރަނީ

ދުނިޔޭގެ ފުޓުބޯޅައިގެ މައި އިދާރާ (ފީފާ)ގެ ސެކްރެޓަރީ ޖެނަރަލް މަތިއަސް ގްރާފްސްޓްރޯމް އާއި އީރާންގެ ފުޓުބޯޅަ ފެޑެރޭޝަންގެ އިސްވެރިން ބައްދަލު ކުރާ ގޮތަށް ހަމަޖެހިއްޖެ އެވެ.

ރޮއިޓާސްގައި ރިޕޯޓު ކޮށްފައިވާ ގޮތުގައި މި ބައްދަލުވުން ބޭއްވުމަށް ހަމަޖެހިފައި ވަނީ ތުރުކީގެ އިސްތަންބޫލްގަ އެވެ. މިއީ އަންނަ ޖޫން މަހު އެމެރިކާ އާއި މެކްސިކޯ އަދި ކެނެޑާގައި ފަށާ ފީފާ ވޯލްޑް ކަޕާ ގުޅޭ ގޮތުން މަޝްވަރާ ކުރުމަށް ބާއްވާ ބައްދަލުވުމެއް ކަމަށް ރިޕޯޓު ކޮށްފައިވެ އެވެ. 

މި ބައްދަލުވުމުގެ މައިގަނޑު މަޤުސަދަކީ، ވޯލްޑް ކަޕްގައި އީރާން އަށް ވާދަ ކުރުމުގެ ފުރުސަތު އޮތްކަން ޔަޤީންކޮށްދީ، އެކަމުގައި ހުރި ކަންބޮޑުވުން ތަކަށް ޙައްލެއް ހޯދުމެވެ. އީރާން އިން ވޯލްޑް ކަޕްގައި ބައިވެރި ވުމާ މެދު ސުވާލު އުފެދިފައި ވަނީ، މިދިޔަ ފެބްރުވަރީ މަހު އެމެރިކާ އާއި އިޒްރޭލް ގުޅިގެން އީރާންއާ ދެކޮޅަށް ހަނގުރާމަ ފެށުމާ ގުޅިގެންނެވެ.

މިއަހަރުގެ ވޯލްޑް ކަޕް ކުރިއަށް ގެންދިޔުމަށް ފީފާ އިން ތާާވަލު ކޮށްފައި ވަނީ ޖޫން މަހުގެ 11 ވަނަ ދުވަހުން ފެށިގެން، ޖުލައި މަހުގެ 19 ވަނަ ދުވަހުގެ ނިޔަލަށެވެ. މުބާރާތުގައި އީރާން އިން ކުޅެން ޖެހޭ ގުރޫޕް ސްޓޭޖުގެ މެޗުތައް ކުޅުމަށް އޮތީ އެމެރިކާގަ އެވެ. ނަމަވެސް، އެމެރިކާ އާއި އީރާންއާ ދެމެދު އުފެދިފައިވާ ނުތަނަވަސްކަމާއި، ފަހަކަށް އައިސް ހިނގައިދިޔަ އަސްކަރީ ކުރިމަތިލުން ތަކުގެ ސަބަބުން، އީރާނުގެ ޓީމަށް އެމެރިކާ އަށް ދަތުރުުކޮށް މުބާރާތުގައި ބައިވެރިވުމަށް ވަނީ ގޮންޖެހުން ތަކެއް ކުރިމަތިވެފަ އެވެ. 

މި ބައްދަލުވުމުގައި އީރާންގެ ކުޅުންތެރިންނާއި، އޮފިޝަލުންގެ ސަލާމަތާއި ރައްކާތެރިކަން ކަށަވަރު ކުރުމާ ގުޅޭ ގޮތުންނާއި، މުބާރާތުގައި ބައިވެރިވުމަށް ބޭނުންވާ ވިސާގެ ކަންކަމާ ގުޅޭ ގޮތުން ފީފާ އިން މަޝްވަރާ ކުރާނެ އެވެ. ފީފާ އިން އަބަދު ވެސް މަސައްކަތް ކުރަނީ ސިޔާސީ މައްސަލަ ތަކުގެ ތެރެއަށް ފުޓުބޯޅަ ނުވެއްދުން ކަމަށް ވީ ނަމަވެސް، މިފަހަރުގެ ޙާލަތަކީ ސީދާ މުބާރާތް ބާއްވާ ޤައުމާއި ވާދަލުރާ ޤައުމަކާ ދެމެދު އުފެދިފައިވާ އަސްކަރީ ހަމަނުޖެހުމަކަށް ވާތީ، މިއީ ފީފާ އަށް ކުރިމަތިވެފައިވާ ބޮޑު ގޮންޖެހުމެކެވެ. 

ތުރުކީގެ އިސްތަންބޫލްގައި ބާއްވާ މި ބައްދަލުވުމުން ނިކުންނަ ނަތީޖާ އަކަށް އީރާންގެ ފުޓުބޯޅަ ސަޕޯޓަރުންނާއި، ބައިނަލްއަޤުވާމީ ފުޓުބޯޅަ މުޖުތަަމައު އިން އަންނަނީ ވަރަށް ބޮޑަށް އިންތިޒާރު ކުރަމުންނެވެ. އީރާން އަކީ އޭޝިއާ ބައްރުގެ ފުޓުބޯޅައިގެ ގަދަ ބާރަކަށް ވާއިރު، އެ ޤައުމު މުބާރާތުގައި ބައިވެރި ނުވުމަކީ ވޯލްޑް ކަޕްގެ ފޯރި އަށް ވެސް އުނިކަން އަންނާނެ ކަމެއް ކަމަށް ގިނަ ބަޔަކު ޤަބޫލު ކުރެ އެވެ.