ވޯލްޑް ކަޕަށް ދިޔަ އިރާގުގެ އައިމަން ޙުސެއިން އެމެރިކާގެ އެއާޕޯޓުގައި ހަތް ގަޑިއިރު ވަންދެން މަޑު ކުރުވައިފި

ފީފާ ވާރލްޑް ކަޕްގައި ވާދަ ކުރުމަށް އިރާގުގެ ޤައުމީ ޓީމު އެމެރިކާ އަށް ދިޔުމުން، އެ ޓީމުގެ އައިމަން ޙުސެއިން އެމެރިކާގެ އެއާޕޯޓުގައި ހަތް ގަޑިިއިރު ވަންދެން މަޑު ކުރުވައި ސުވާލު ކޮށްފި އެވެ.

އިރާގުގެ އޮލިމްޕިކް ކޮމެޓީގެ އޮފިޝަލަކާ ހަވާލާދީ މީޑިއާ ތަކުން ރިޕޯޓު ކޮށްފައިވާ ގޮތުގައި، ހޮނިހިރު ދުވަހުގެ ހެނދުނުގެ ވަގުތެއްގައި ޗިކާގޯގެ އޯހެއާ އެއާޕޯޓަށް އިރާގުގެ ޓީމު ފޭބުމާ އެކު، އައިމަން ޙުސެއިން ވަނީ ހިފަހައްޓައިފަ އެވެ. އޭނާ ހިފެހެއްޓުމަށް ފަހު، ގާތް ގަނޑަކަށް ހަތް ގަޑިއިރު ވަންދެން އޭނާއާ ސުވާލު ކޮށްފައިވާ ކަމަށް ވެސް ވަނީ ބުނެފައި އެވެ. 

އައިމަން ޙުސެއިންއާ ސުވާލު ކުރުމުގެ ތެރޭގައި އޭނާގެ ފޯނު ވެސް ބަލައި ޗެކްކޮށްފައިވާ ކަމަށް ރިޕޯޓުތައް ބުނެ އެވެ. ގިނަ އިރު ތަކެއް ވަންދެން ސުވާލު ކުރުމަށް ފަހު އައިމަން ޙުސެއިން އެމެރިކާ އަށް އެތެރެވުމުގެ ހުއްދަ ދިން ނަމަވެސް، ޓީމާ އެކު ދިޔަ ފޮޓޯގްރާފަރު ޠަލާލް ޞަލާޙު ވަނީ އެމެރިކާ އަށް އެތެރެވިޔަ ނުދީ ހިފަހައްޓައިފަ އެވެ. 

އޮފިޝަލް މައުލޫމާތު ދިން ގޮތުގައި ފޮޓޯގްރާފަރު ޠަލާލް، 10 ގަޑިއިރަށް ވުރެ ގިނައިރު ހިފެހެއްޓުމަށް ފަހު، އޭނާގެ ފޯނު ވެސް ބަލައި ފާސްކޮށް، އެންމެ ފަހުން ވަނީ އެމެރިކާ އަށް އެތެރެވުން މަނާކޮށް އަނބުރާ ފޮނުވާލައިފަ އެވެ. މި ހާދިސާއާ ގުޅިގެން އިރާގުގެ ފުޓުބޯޅަ އެސޯސިއޭޝަން އާއި، އައިމަން ޙުސެއިންގެ ފަރާތުން މިހާތަނަށް ރަސްމީ އެއްޗެއް ބުނެފައި ނުވެ އެވެ. އަދި އެމެރިކާގެ އިމިގްރޭޝަން އެންޑް ކަސްޓަމްސް އެންފޯސްމަންޓް އަދި ހޯމްލޭންޑް ސެކިއުރިޓީ ޑިޕާޓްމަންޓް އިން ވެސް މިކަމާ ގުޅޭ ގޮތުން އެއްޗެއް ބުނެފައި ނުވެ އެވެ. 

އިރާގުގެ ޓީމު އެމެރިކާ އަށް ދިޔަ ވަގުތަކީ ވަރަށް ހެނދުނުގެ ވަގުތަކަށް ވީ ނަމަވެސް، ގިނަ އަދަދެއްގެ ސަޕޯޓަރުން ވަނީ އިރާގުގެ ޤައުމީ ދިދަ ހިފައިގެން ޓީމަށް މަރުޙަބާ ކިޔުމަށް އެއާޕޯޓަށް ގޮސްފައި އެވެ. ސޯޝަލް މީޑިއާގައި ދައުރުވާ ވީޑިއޯ ތަކުން ފެންނަ ގޮތުގައި ސަޕޯޓަރުން ވަނީ ކުޅުންތެރިންނާ އެކު ފޮޓޯ ނަގައި ހިތްވަރު ދީފައި އެވެ. 

އުމުރުން 30 އަހަރުގެ އައިމަން ޙުސެއިން އަކީ އިރާގު ވޯލްޑް ކަޕަށް ކޮލިފައި ކޮށްދިނުމުގައި އެންމެ މުހިންމު ދައުރެއް އަދާ ކުރި ކުޅުންތެރިޔާ އެވެ. މިއީ ވޭތުވެ ދިޔަ 40 އަހަރުގެ ތެރޭގައި އިރާގުން ވޯލްޑް ކަޕްގައި ވާދަ ކުރާ ފުރަތަމަ ފަހަރެވެ. އިރާގުގެ ފޯވާޑް ލައިންގައި އައިމަން ޙުސެއިންގެ އިތުރުން، އިޕްސްވިޗް ޓައުންގެ އަލީ އަލް ހަމާދީ އާއި ހުނަރުވެރި ޒުވާން ކުޅުންތެރިން ކަމަށްވާ އަލީ ޖާސިމް އަދި ޔޫސުފް އަމީން ހިމެނެ އެވެ.

އެމެރިކާ އާއި ކެނެޑާ އަދި މެކްސިކޯ ގުޅިގެން ބާއްވާ ވޯލްޑް ކަޕް ބުރާސްފަތި ދުވަހު ފެށުމަށް ހަމަޖެހިފައިވާއިރު، އިރާގު ހިމެނެނީ ގުރޫޕް އައިގަ އެވެ. މި ގުރޫޕުގައި އިރާގުގެ އިތުރުން ދެން ހިމެނެނީ ފްރާންސް، ސެނެގާލް އަދި ނޯވޭ އެވެ.