އިންޑިއާގެ ޓަމިލްނާޑޫގެ ޗީފް މިނިސްޓަރު ކަމުގެ ހުވާ ވިޖޭ ކުރައްވައިފި

އިންޑިއާގެ ތަމަޅަ ފިލްމީ ތަރި ސީ ޖޯސެފް ވިޖޭ، ޓަމިލްނާޑޫގެ އައު ޗީފް މިނިސްޓަރު ކަމުގެ ހުވާ ކުރައްވައިފި އެވެ.

ޗީފް މިނިސްޓަރުގެ ހުވާ ވިޖޭ ކުރައްވާފައި ވަނީ އާދީއްތަ ދުވަހު އެވެ. މިއާ އެކު، އެ ސްޓޭޓުގެ ސަރުކާރު އެކުލަވާލުމާ މެދު އުފެދިފައި އޮތް ސިޔާސީ ނުތަނަވަސްކަން ވަނީ ނިމުމަކަށް އައިސްފަ އެވެ. 

ޗެންނާއީގެ ޖަވާހަރްލާލް ނެހުރޫ ސްޓޭޑިއަމްގައި ބޭއްވި ކުލަ ގަދަ ރަސްމިއްޔާތެއްގައި ވިޖޭ އާއެކު، ނުވަ މިނިސްޓަރަކު ވަނީ މަގާމުގެ ހުވާ ކުރައްވައިފަ އެވެ. މި ރަސްމިއްޔާތުގައި އިންޑިއާގެ އިދިކޮޅު ލީޑަރު ރާހުލް ގާންދީގެ އިތުރުން، ފިލްމީ ދާއިރާގެ މަޝްހޫރު ފަރާތްތަކާއި ވިޔަފާރިވެރިން ވެސް ވަނީ ބައިވެރިވެފަ އެވެ. 

އުމުރުން 51 އަހަރުގެ ވިޖޭ އަށް ސަރުކާރު އެކުލަވާލުމުގެ ފުރުސަތު ލިބުނީ، ގަވަރުނަރު ރާޖެންދުރަ ވިޝްވަނާތު އަރްލޭކަރްއާ ހަތަރު ދުވަސް ތެރޭގައި، ހަތަރު ފަހަރު ބައްދަލު ކުރައްވައި ބޭނުންވާ އަދަދަށް މެމްބަރުންގެ ތާއީދު އޮތް ކަމަށް ސާބިތު ކޮށްދެއްވުމުންނެވެ. 

މިދިޔަ ހަފުތާގައި ބޭއްވި އިންތިޚާބުގައި ވިޖޭ އަލަށް އުފެއްދި ޕާޓީ، ތަމަޅަގަ ޕެޓްރީ ކަޒަގަމް (ޓީވީކޭ) އިން ވަނީ 108 ގޮނޑި ކާމިޔާބު ކޮށްފަ އެވެ. ނަމަވެސް، 234 މެމްބަރުން ހިމެނޭ އެސެމްބްލީގެ އަޣުލަބިއްޔަތު ހޯދުމަށް ބޭނުންވާ 118 ގޮނޑި ހަމަ ކުރުމަށް ވިޖޭގެ ޕާޓީ އަށް 10 ގޮނޑި މަދުވި އެވެ. 

އެހެންކަމުން ގަވަރުނަރު އެންމެ ފުރަތަމަ ނިންމެވީ ސަރުކާރު އެކުލަވާލުމުގެ ކުރިން ތާއީދު އޮތް ކަމުގެ ލިޔުންތައް ހުށަހެޅުމަށެވެ. ވިޖޭ އަށް ސަރުކާރު އެކުލަވާލުމުގެ ފުރުސަތު ލިބުނީ ކޮންގްރެސް ޕާޓީ އާއި، ސީޕީއައި، ސީޕީއައި-އެމް، ވީސީކޭ އަދި އައިޔޫއެމްއެލް ފަދަ ކުދި ޕާޓީ ތަކުގެ ތާއީދާ އެކު ޖުމުލަ 120 މެމްބަރުންގެ ތާއީދު ހަމަ ކުރެއްވުމުންނެވެ. 

ޓަމިލް ނާޑޫގެ ސިޔާސީ މަސްރަހުގައި އެތައް އަހަރެއް ވަންދެން ރަސްކަން ކުރަމުން އައި ޑީއެމްކޭ އަދި އޭއައިއޭޑީއެމްކޭގޭ ބާރު ވިޖޭ ވަނީ އިންތިޚާބުގައި ގެއްލުވާލައްވައިފަ އެވެ. ޚާއްސަކޮށް މިހާރު ވެރިކަމުގަައި އޮތް އެމްކޭ ސްޓާލިންގެ ޑީއެމްކޭ ބަލިކޮށް، ޓީވީކޭ އިން ހޯދި ކާމިޔާބީ އަކީ ސިޔާސީ ދާއިރާގެ ތަޖުރިބާކާރުން ހައިރާން ކޮށްލި ނަތީޖާ އެކެވެ. ވިޖޭގެ މި ކުރިއެރުން ގިނަ ބަޔަކު މިސާލު ކުރަނީ، 1977 ވަނަ އަހަރު އަމިއްލަ ޕާޓީއެއް އުފައްދަވައި، ވެރިކަމަށް ވަޑައިގެންނެވީ މަޝްހޫރު އެކްޓަރު އެމްޖީ ރާމަޗަންދުރަންއާ އެވެ. 

އާންމުންގެ މެދުގައި "ތަލަޕަތީ" ނުވަތަ ކޮމާންޑަރުގެ ނަމުން މަޝްހޫރުވެފައިވާ ވިޖޭ އަކީ، އިންޑިއާގައި އެންމެ ބޮޑު އާމްދަނީއެއް ލިބޭ އެއް ފިލްމީ ތަރި އެވެ. އޭނާ ވަނީ މިހާތަނަށް 69 ފިލްމެއްގައި މަސައްކަތް ކުރައްވައިފަ އެވެ. 2024 ވަނަ އަހަރު ޓީވީކޭ އުފެއްދެވުމަށް ފަހު ވިޖޭ އިއުލާން ކުރެއްވީ، ސިޔާސީ ދާއިރާ އަށް ފުރިހަމަ އަށް ވަގުތު ދެއްވުމަށްޓަކައި ފިލްމީ މަސައްކަތް ތަކުން ރިޓަޔާ ކުރައްވާނެ ކަމަށެވެ. ޒުވާނުންނާއި، އަންހެނުންގެ މެދުގައި ބޮޑު މަޤުބޫލު ކަމެއް އޮތް ވިޖޭ އަކީ، ޓަމިލް ނާޑޫގެ ސިޔާސީ ތާރީޚުގައި ފިލްމީ ދާއިރާ އިން ވެރި ކަމަށް ވަޑައިގެންނެވި އެލްޖީއާރު އަދި ޖަޔަލަލީތާ ފަދަ ޝަޚުސިއްޔަތު ތަކުގެ ފިޔަވަޅު މަތިން ހިންގަވާ ބޭފުޅެކެވެ.