އީރާން އިން ހޮރްމޫޒް ކަނޑު އޮޅި ބަންދު ކޮށްފި

އީރާން އަށް އަމާޒުކޮށް އެމެރިކާ އިން ހަމަލާ ތަކެއް ދީފައި ވަނިކޮށް، ހޮރްމޫޒް ކަނޑު އޮޅި ބަންދު ކޮށްފައިވާ ކަމަށް އީރާންގެ އިސްވެރިން ހާމަ ކޮށްފި އެވެ. 

އީރާން އިން ބުނެފައި ވަނީ ހޮރްމޫޒް ކަނޑު އޮޅިން ދަތުރު ކުރުމަށް މަސައްކަތް ކުރާ ކޮންމެ ބަޔަކަށް ވެސް އީރާން އިން ހަމަލާ ދޭނެ ކަމަށެވެ. އެމެރިކާ އިން އީރާން އަށް ހަމަލާ ދިނުމުގެ ސަބަބުން، ޑިޕްލޮމަސީގެ ފުރުސަތު އިތުރަށް ހަނި ވެފައިވާ ކަމަށް ވެސް އީރާން އިން ވަނީ ބުނެފައި އެވެ. 

އީރާންގެ އިންޤިލާބީ ގާޑު ތަކުގެ ވެރިޔާ ވިދާޅުވެފައި ވަނީ، ހޮރްމޫޒް ކަނޑު އޮޅި މިހާރު ވާނީ ފުރިހަމަ އަށް ބަންދު ކޮށްފައިވާ ކަމަށާއި، އެ ސަރަހައްދުން ދަތުރު ކުރަން އުޅޭ އެއްވެސް ކުންފުންޏަކަށް، ނުވަތަ ޤައުމަކަށް ނިސްބަތްވާ އުޅަނދަކަށް ވެސް ހަމަލާ ދޭނެ ކަމަށެވެ. ހޮރްމޫޒް ކަނޑު އޮޅި އަކީ ދުނިޔޭގެ ތެލުގެ ވިޔަފާރީގައި ވަރަށް މުހިންމު މަގަކަށް ވާއިރު، އެ ކަނޑު އޮޅިން ގިނަ އުޅަނދު ތަކެއް ދަތުރު ކުރަމުން ގެންދެ އެވެ. 

އީރާންގެ ފޮރިން މިނިސްޓްރީ އިން ނެރުނު ބަޔާނެއްގައި ބުނެފައި ވަނީ، އެމެރިކާގެ ހަމަލާ ތަކަކީ ބައިނަލްއަޤުވާމީ ޤާނޫނާ ޚިލާފު އަމަލު ތަކެއް ކަމަށާއި، މިކަމުގެ ސަބަބުން ސުލްހައިގެ މަޝްވަރާތައް ކުރިއަށް ގެންދިޔުމުގެ ފުރުސަތު ވަރަށް ދުރަށް ގޮސްފައިވާ ކަމަށެވެ. އެމެރިކާ އިން އީރާންގެ ސިފައިންގެ ބައެއް ތަންތަނަށް ހަމަލާ ދީފައިވާއިރު، މި ހަމަލާ ތަކުގައި އެތައް ބަޔަކު މަރުވެފައިވާ ކަމަށް އީރާން އިން ބުނެ އެވެ.

ބައިނަލްއަޤުވާމީ މުޖުތަމައުން ވަނީ މި ހާލަތާ ގުޅިގެން ވަރަށް ބޮޑަށް ކަންބޮޑުވުން ފާޅު ކޮށްފައި އެވެ. ޔޫރަޕިއަން ޔޫނިއަންގެ ބޭފުޅުން ވަނީ ދެ ޤައުމަށް ވެސް ހަމަ ހަމަކަމާ އެކު ވާހަކަ ދައްކައި މައްސަލަ ހައްލު ކުރުމަށް ގޮވާލާފައި އެވެ. ޗައިނާ އާއި ރަޝިޔާ އިން ވެސް ވަނީ މި ހާލަތު ވީހާ ވެސް އަވަހަކަށް ހައްލު ކުރުމަށް ގޮވާލާފައި އެވެ.

ހޮރްމޫޒް ކަނޑު އޮޅި ބަންދު ކުރުމުގެ ސަބަބުން ދުނިޔޭގެ ތެލުގެ ބާޒާރު ތަކުގައި ވަނީ ބޮޑެތި ދަތި ތަކެއް ދިމާވެފައި އެވެ. އެކަމުގެ ސަބަބުން ތެލުގެ އަގު ވަނީ އިންތިހާ އަށް މައްޗަށް ގޮސްފައި އެވެ. އިޤްތިޞާދީ ތަޖުރިބާކާރުން ބުނާ ގޮތުގައި މި ހާލަތު ދިގުލައިފި ނަމަ، ދުނިޔޭގެ އިޤްތިޞާދަށް ވަރަށް ބޮޑު ނޭދެވޭ އަސަރު ތަކެއް ކުރާނެ އެވެ.

އެމެރިކާގެ ޕެންޓަގަން އިން ނެރުނު ބަޔާނެއްގައި ބުނެފައި ވަނީ އީރާން އިން ހޮރްމޫޒް ކަނޑު އޮޅި ބަންދު ކުރުމަކީ ބައިނަލްއަޤުވާމީ ވިޔަފާރި އަށް ހުރަސް އެޅުމެއް ކަމަށާއި، މި ކަނޑު އޮޅި ހުޅުވާލުމަށް ބޭނުންވާ ހުރިހާ ފިޔަވަޅެއް އަޅާނެ ކަމަށެވެ.