އީރާން އަށް "ވަރުގަދަ" ހަމަލާ ތަކެއް ދޭނެ ކަމުގެ އިންޒާރު ޓްރަމްޕް ދެއްވައިފި

އީރާންއާ ދެކޮޅަށް އެމެރިކާ އިން ވަރުގަދަ ހަމަލާ ތަކެއް ދޭނެ ކަމުގެ އިންޒާރު އެމެރިކާގެ ރައީސް ޑޮނަލްޑް ޓްރަމްޕް ދެއްވައިފި އެވެ.

ބުދަ ދުވަހު ޓްރަމްޕް މި އިންޒާރު ދެއްވާފައި ވަނީ، އޭގެ ކުރިން ވެސް އެމެރިކާ އިން އީރާންއާ ދެކޮޅަށް ހަމަލާ ތަކެއް ދީފައި ވަނިކޮށެވެ. އެއީ ހޮރްމޫޒް ކަނޑު އޮޅި ކައިރިން އެމެރިކާގެ އަޕާޗޭ ހެލިކޮޕްޓަރެއް ވައްޓާލުމުގައި އީރާންގެ ބައިވެރިވުމެއް އޮތް ކަމަށް ބުނެ އެވެ. 

އެމެރިކާގެ ރިޔާސީ ގަނޑުވަރުގައި ނޫސްވެރިންނާ ވާހަކަ ދައްކަވަމުން ޓްރަމްޕް ވިދާޅުވީ، އީރާން އަށް ވަރަށް ބާރަށް އަދި ވަރުގަދަ ހަމަލާ ތަކެއް ދޭނެ ކަމަށެވެ. އެގޮތުން އަންގާރަ ދުވަހު ވެސް އެމެރިކާ އިން އީރާން އަށް ވަރުގަދަ ހަމަލާ ތަކެއް ދީފައިވާ ކަމަށާއި، އެ ހަމަލާ ދިނުން އަދިވެސް ކުރިއަށް ގެންދަވާނެ ކަމަށް ޓްރަމްޕް ވިދާޅުވި އެވެ. 

އެއާ އެކު ޓްރަމްޕް ވިދާޅުވީ، އެމެރިކާ އާއި އީރާންއާ ދެމެދު އެއްބަސްވުމަކަށް އައުމަށް ވެސް ތައްޔާރަށް ހުންނެވި ކަމަށެވެ. ނަމަވެސް، އެމެރިކާ އިން އެއްވެސް އެއްބަސްވުމެއް ހަދާނީ މާނަހުރި ގޮތެއްގައި ކަމަށާއި، އެއްބަސްވުން ތަންފީޒު ކުރެވޭނެ ގޮތެއްގައި ކަމަށް ވެސް ޓްރަމްޕް ވަނީ ވިދާޅުވެފައި އެވެ. 

މީގެ އިތުރުން ޓްރަމްޕް ވިދާޅުވީ، ހަމަ ހަގީގަތުގައި ވެސް މާނަހުރި އަދި ތަންފީޒު ކުރެވޭނެ އެއްބަސްވުމެއް ބޭނުންވާ ކަމަށެވެ. ނަމަވެސް، އީރާންގެ އަމަލުތައް ފެންނަނީ އެމެރިކާއާ ކުރިމަތިލާން ބޭނުންވާ ގޮތެއްގައި ކަމަށް ޓްރަމްޕް ވިދާޅުވި އެވެ. އަދި އީރާން އިން ކަންތައްތައް ކުރަމުން އަންނަނީ އޭނާ ވަރަށް ފޫހިވާ ގޮތަކަށް ކަމަށް ވެސް ޓްރަމްޕް ވިދާޅުވެފައި އެވެ. 

އިތުރަށް ވާހަކަ ދައްކަވަމުން ޓްރަމްޕް ވިދާޅުވީ، އެމެރިކާާ އިން އީރާން އަށް ސިއްރުން އެ ޤައުމުގެ އެތައް މިލިއަން ތެޔޮ ބެރަލްގެ ތެޔޮ ނަގާފައިވާ ކަމަށެވެ. އެކަމުގެ ސަބަބުން ތެޔޮ ފީފާއެއްގެ އަގު 250 އެމެރިކާ ޑޮލަރަށް އެރުމުގެ ބަދަލުގައި، 85 އެމެރިކާ ޑޮލަރާއި 90 ޑޮލަރާ ދެމެދުގައި ހުރި ކަމަށް ވެސް ޓްރަމްޕް ފާހަގަ ކުރެއްވި އެވެ. 

އީރާން އަށް ވަރުގަދަ ހަމަލާ ތަކެއް ދޭނެ ކަމުގެ އިންޒާރު ޓްރަމްޕް ދެއްވާފައިވާއިރު، ދެ ޤައުމުގެ ދެ މެދުގައި ނުތަނަވަސްކަން ވަނީ ބޮޑުވެފައި އެވެ.