ވޯލްޑް ކަޕްގެ އިނާމު ފައިސާގެ އަދަދު ބޮޑު ކުރަން ފީފާ އިން ވިސްނަނީ

ފީފާ ވޯލްޑް ކަޕްގެ އިނާމު ފައިސާގެ ގޮތުގައި ދެމުން އަންނަ އަަދަދު އިތުރު ކުރުމަށް، ދުނިޔޭގެ ފުޓުބޯޅައިގެ މައި އިދާރާ (ފީފާ) އިން މަޝްވަރާ ކުރަމުން އަންނަ ކަމަށް ބުނެފި އެވެ.

ފީފާ އިން މަޝްވަރާ ކުރަމުން އަންނަނީ، މިއަހަރުގެ ޖޫން މަހު އެމެރިކާ އާއި މެކްސިކޯ އަދި ކެނެޑާގައި އޮންނަ ވޯލްޑް ކަޕްގެ ފައިސާގެ އިނާމުގެ އަަދަދު އިތުރު ކުރުމަށެވެ.

އެގޮތުން މިއަހަރުގެ މުބާރާތުގައި ޖުމުލަ 48 ޓީމެއް ބައިވެރިވާއިރު، ބައިވެރިވާ ކޮންމެ ޓީމަކަށް 10 މިލިއަން އެމެރިކާ ޑޮލަރުގެ އަދަދެއް ދިނުމަށް އަންނަނީ މަޝްވަރާ ކުރަމުންނެވެ. ހަމަ އެހެންމެ، މުބާރާތް ކާމިޔާބު ކުރާ ޗެމްޕިއަން ޓީމަށް ފައިސާގެ އިނާމުގެ ގޮތުގައި 50 މިލިއަން އެމެރިކާާ ޑޮލަރުގެ އަދަދެއް ދިނުމަށް ވެސް ފީފާ އިން އަންނަނީ މަޝްވަރާ ކުރަމުންނެވެ. 

ފީފާ އިން މިގޮތަށް މަޝްވަރާ ކުރަމުން އަންނައިރު، މީގެ ކުރިން ފީފާ އިން ވަނީ ވޯލްޑް ކަޕްގެ އިނާމު ފައިސާ އިތުރު ކުރާނެ ކަމަށް މީގެ ކުރިން ބުނެފަ އެވެ. މީޑިއާ ތަކުގައި ބުނެފައިވާ ގޮތުން މި ހަފުތާގެ ބުރާސްފަތި ދުވަހު އޮންނަ ފީފާގެ ކޮންގްރެސްގައި މިކަމަށް ގޮތެއް ނިންމާނެ އެވެ. ފީފާގެ 76 ވަނަ ކޮންގްރެސް ބުރާސްފަތި ދުވަހު އޮންނާނީ މުބާރާތް ބާއްވާ ޤައުމެއް ކަމަށްވާ ކެނެޑާގަ އެވެ.

ފީފާ އިން އަންނަނީ މިއަހަރުގެ ވޯލްޑް ކަޕް އަކީ ހުރިހާ ގޮތަކުން ވެސް ކާމިޔާބު، އަދި ފުރިހަމަ މުބާރާތަކަށް ހެދުމަށް މަސައްކަތް ކުރަމުންނެވެ. އެގޮތުގެ ތެރެއިން ފީފާ އިން ވަނީ ގިނަ އިންތިޒާމު ތަކެއް ހަމަޖައްސަމުންނެވެ.