ސްވެޑެން އަތުން ބަލިވެ، ލެވަންޑޯސްކީގެ ޕޮލެންޑު ވޯލްޑް ކަޕަށް ކޮލިފައި ނުވި

ފީފާ ވޯލްޑް ކަޕް ކޮލިފިކޭޝަންގެ ޕްލޭ އޮފްގައި ސްވެޑެންއާ ދެކޮޅަށް ކުޅުނު މެޗުން ބަލިވެ، ރޮބާޓް ލެވަންޑޯސްކީ ކެޕްޓަންކަން ކުރަމުން އަންނަ ޕޮލެންޑަށް ވޯލްޑް ކަޕްގެ ފުރުސަތު ގެއްލިއްްޖެ އެވެ.

އަންގާރަ ދުވަހުގެ ރޭ ކުޅުނު ޕްލޭ އޮފްގެ މެޗުގައި ސްވެޑެން އިން ވަނީ 3-2 އިން ޕޮލެންޑު ބަލިކޮށްފަ އެވެ. މެޗުގައި ސްވެޑެން އިން ދެ ފަހަރު ލީޑު ނެގިއިރު ވެސް، ޕޮލެންޑުން ނަތީޖާ ހަމަހަމަ ކުރި އެވެ. ނަމަވެސް ސްވެޑެން އިން ވަނީ ފަހު ވަގުތު ލަނޑު ޖަހައިގެން މެޗުން މޮޅުވެފަ އެވެ.

މެޗު ފަށައިގެން 20 ވަނަ މިނެޓުގައި ސްވެޑެން އަށް ލީޑު ނަގައިދިނީ އެންތަނީ އެލަންގާ އެވެ. އޭގެ ފަހުން މެޗުގެ 33 ވަނަ މިނެޓުގައި ނިކޮލާ ޒަލެންސްކީ ވަނީ ލަނޑު ޖަހައި ޕޮލެންޑަށް ނަތީޖާ ހަމަހަމަ ކޮށްދީފަ އެވެ. ފުރަތަމަ ހާފު ނިމެން މިނެޓަކަށް ވެފައި ވަނިކޮށް، ދެ ވަނަ ފަހަރަށް ސްވެޑެން އަށް ލީޑު ނަގައިދިނީ ގުސްޓާފް ލެގަބިއެލްކޭ އެވެ.

ނަމަވެސް، މެޗުގެ ދެ ވަނަ ހާފު ފަށައިގެން 10 ވަނަ މިނެޓުގައި ޕޮލެންޑުން އަނެއްކާ ވެސް ނަތީޖާ ހަމަހަމަ ކުރި އެވެ. ޕޮލެންޑުގެ ޒަލެންސްކީ ތަނަވަސްކޮށްދިން ފުރުސަތެއްގައި އެ ލަނޑު ޖަހައިދިނީ ކެރޯލް ސްވިޑާސްކީ އެވެ. މެޗުގެ ފުރިހަމަ ވަގުތު ހަމަވާން ދެ މިނެޓަށް ވެފައި ވަނިކޮށް، ސްވެޑެންގެ ވިކްޓާ ޔޮކަރޭޝް ވަނީ ލަނޑު ޖަހައި އެ ޓީމު މޮޅު ކޮށްދީފަ އެވެ.

ޕޮލެންޑު ބަލިކޮށް ސްވެޑެން އިން މި ވަނީ އަލުން ވޯލްޑް ކަޕަށް ކޮލިފައިވެފަ އެވެ. އެންމެ ފަހުން 2022 ވަނަ އަހަރު އޮތް ވޯލްޑް ކަޕަށް ސްވެޑެން ކޮލިފައި ނުވެ އެވެ. ސްވެޑެން އަތުން ބަލިވެ، ޕޮލެންޑަށް ވަނީ މިފަހަރުގެ ވޯލްޑް ކަޕްގެ ފުރުސަތު ގެއްލިފަ އެވެ.