އީރާނުގެ އިންފްރާސްޓްރަކްޗަރަށް ހަމަލާދޭން ޓްރަމްޕް ވިސްނަވަނީ
އެއްބަސްވުމަކަށް އައުމަށް އީރާނުން މާ ގިނަ ވަގުތު ނަގަމުންދާތީ، އެ ގައުމުން މިހާރު އޭގެ "އަގު އަދާކުރަން ޖެހޭނެ" ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ. އީރާނަކީ ހަމައެކަނި ވާހަކަ ދައްކާ ބައެއްގެ ގޮތުގައި ސިފަކުރައްވައި، އެ ގައުމުގެ މުހިންމު ވަސީލަތްތަކަށް ހަމަލާދީފާނެ ކަމުގެ އިންޒާރު ޓްރަމްޕް ވަނީ ދެއްވާފައި. މި އިންޒާރުތައް އައިސްފައިވަނީ އެއްބަސްވުމަކާ ގުޅޭގޮތުން މަޝްވަރާ ކުރުމަށް ގަތަރުގެ މަންދޫބުން ތެހެރާނަށް ވަޑައިގެންފައިވާ ދަނޑިވަޅެއްގައި.
އެމެރިކާގެ ރައީސް ޑޮނަލްޑް ޓްރަމްޕް. | ރޮއިޓާސް
ތެހެރާނުން އެއްބަސްވުމަކަށް އައުމަށް މާ ގިނަ ދުވަސް ނަގަމުންދާތީ، އީރާނުގެ ކަރަންޓު އުފައްދާ މަރުކަޒުތަކަށާއި ފާލަންތަކަށް އާ ހަމަލާތަކެއް ދިނުމަށް އަމުރުކުރައްވައިފާނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެއެވެ. ޓްރަމްޕް މިހެން ވިދާޅުވީ ފޯނުން ދެއްވި އިންޓަވިއުއަކާ ހަވާލާދީ ފޮކްސް ނިއުސްއިން ބުދަ ދުވަހު ރިޕޯޓުކޮށްފައެވެ.
ބުދަ ދުވަހުގެ ކުރީކޮޅު ޓްރަމްޕް ވިދާޅުވީ، އެއްބަސްވުމަކާ ގުޅޭގޮތުން މަޝްވަރާ ކުރުމަށް އީރާނުން މާ ގިނަ ވަގުތު ނަގާފައިވާ ކަމަށެވެ. އަދި މަޝްވަރާތައް ކުރިއަށް ގެންދިއުމަށް މަސައްކަތް ކުރަމުންދާ ކަމަށް ރިޕޯޓުތައް ބުނަމުންދަނިކޮށް، އީރާނާއި އެމެރިކާއާ ދެމެދު ސަރަހައްދީ ފެންވަރުގައި ހަމަލާތަކެއް ބަދަލުކޮށްފައިވާތީ، އީރާނުން މިހާރު އޭގެ "އަގު އަދާކުރަން ޖެހޭނެ" ކަމަށްވެސް ޓްރަމްޕް ވިދާޅުވިއެވެ.
ސޯޝަލް މީޑިއާގައި ކުރެއްވި ޕޯސްޓެއްގައި ޓްރަމްޕް ވިދާޅުވީ އީރާނަކީ ހަމައެކަނި ވާހަކަ ދައްކާ، އަމަލީ އެއްވެސް މަސައްކަތެއް ނުކުރާ ބައެއް ކަމަށެވެ. އަދި އީރާނަށް ވަރަށް ފައިދާހުރި އެއްބަސްވުމަކާ ގުޅޭގޮތުން މަޝްވަރާކުރަން އެ ގައުމުން މާ ގިނަ ދުވަސް ނަގާފައިވާ ކަމަށާއި، އެހެންކަމުން މިހާރު އޭގެ އަގު އަދާކުރަން ޖެހޭނެ ކަމަށް ޓްރަމްޕް ލިޔުއްވާފައިވެއެވެ.
ޓްރަމްޕް މިފަދަ މޭރުމަކުން ވާހަކަދައްކަވާފައި މިވަނީ، އެމެރިކާއާއެކު ކުރެވުނު މަޝްވަރާތަކަށްފަހު އެއްބަސްވުމެއް ނިންމުމަށްޓަކައި ގަތަރުގެ މަންދޫބުން ބުދަ ދުވަހުގެ ހެނދުނު ތެހެރާނަށް ދަތުރުކުރައްވާފައިވާ ކަމަށް، މިކަމުގެ މައުލޫމާތު އެނގޭ އޮފިޝަލަކާ ހަވާލާދީ ރޮއިޓާސްއިން ރިޕޯޓުކޮށްފައިވާ ދަނޑިވަޅެއްގައެވެ.
ޓްރަމްޕްގެ މި ޕޯސްޓާ ގުޅޭގޮތުން ނުވަތަ މަންދޫބުންގެ މަޝްވަރާތަކާއި ދަތުރުތަކާ ގުޅޭގޮތުން ވައިޓް ހައުސްގެ ބަހެއް ހޯދުމަށް ކުރި މަސައްކަތް ވަނީ އަދި ކާމިޔާބުވާ ގޮތް ނުވެފައެވެ.
