ޖޯޑަންގައި ހުންނަ އެމެރިކާގެ އަސްކަރީ މަރުކަޒަށް އަމާޒުކޮށް އީރާން އިން ހަމަލާ ދީފި

ޖޯޑަންގައި ހުންނަ އެމެރިކާގެ އަސްކަރީ މަރުކަޒަކަށް އަމާޒުކޮށް އީރާންގެ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ) އިން ވަރުގަދަ މިސައިލް ހަމަލާ ތަކެއް ދީފި އެވެ.

އީރާންގެ އެއަރޯސްޕޭސް ފޯސް އިން އިސް ނަގައިގެން ކުރިއަށް ގެންދިޔަ މި އޮޕަރޭޝަނުގައި ބޭނުން ކޮށްފައި ވަނީ ދުރު ރާސްތާގެ ސޮލިޑް ފިއުލް މިސައިލް ތަކެއް ކަމަށް އެ ޖަމާއަތުން ނެރުނު ބަޔާނެއްގައި ބުނެފައިވެ އެވެ.

އައިއާރުޖީސީ އީން ހާމަކުރި ގޮތުގައި މި ހަމަލާ ތަކުގައި އެމެރިކާގެ ސިފައިން ތިބޭ އެއާ ބޭސްގެ މުހިންމު ހަތަރު އަމާޒަކަށް ވަނީ ސީދާ ހަމަލާދީ ސުންނާފަތި ކޮށްލާފައި އެވެ. މީގެ ތެރޭގައި އެމެރިކާގެ އެންމެ ޒަމާނީ އެފް-35 މަރުކާގެ ފައިޓާ ޖެޓުތައް ބާއްވާ ހޭންގަރު ތަކާއި، އެ މަރުކަޒުގެ މައި ކޮމާންޑް އެންޑް ކޮންޓްރޯލް ސެންޓަރު ހިމެނޭ ކަމަށް އީރާން އިން ބުނެ އެވެ.

މި ހަމަލާ އަކީ އީރާން އިން ބަދަލު ހިފުމުގެ ގޮތުން ފަށާފައިވާ ފުޅާ އޮޕަރޭޝަނެއްގެ ފަހު މަރުހަލާ ކަމަށް އައިއާރުޖީސީ އިން ސިފަ ކުރެ އެވެ. މި އޮޕަރޭޝަނުގެ ދަށުން ސަރަހައްދީ ގައުމު ތަކުގައި ހުރި އެމެރިކާގެ ވައިގެ އަދި ކަނޑުގެ އަސްކަރީ މަރުކަޒު ތަކުގެ 21 އަމާޒަކަށް ހަމަލާ ދީފައިވާ ކަމަށް އީރާން އިން ވަނީ ބުނެފައި އެވެ. މީގެ އިތުރުން އީރާންގެ ވައިގެ ސަރަހައްދަށް ވަތް އެމެރިކާގެ އެމްކިއު-9 މަރުކާގެ ޑްރޯނެއް ވައްޓާލާފައިވާ ކަމަށް ވެސް އެ ގައުމުން ހާމަ ކުރި އެވެ.

އީރާންގެ އަސްކަރިއްޔާ އިން ވަނީ އެމެރިކާ އަށް ވަރުގަދަ އިންޒާރެއް ވެސް ދީފައި އެވެ. އެގޮތުން އެމެރިކާގެ ފަރާތުން އިތުރު އަސްކަރީ ހަރަކާތެއް ހިންގައިފި ނަމަ، އޭގެ ރައްދުގައި ވަރުގަދަ އަދި ނުރައްކާތެރި ހަމަލާ ތަކެއް ދިނުމަށް އީރާންގެ ފައުޖުތައް ފުރިހަމަ އަށް ތައްޔާރު ވެފައިވާ ކަމަށް ބަޔާނުގައިވެ އެވެ. އަދި މަސްރަހު އިތުރަށް ގޯސްވެގެން ހިނގައިދާނެ ކޮންމެ ނަތީޖާއެއްގެ ފުރިހަމަ ޒިންމާ އެމެރިކާ އިން އުފުލަން ޖެހޭނެ ކަމަށް ވެސް އައިއާރުޖީސީ އިން ބުނެފައިވެ އެވެ.