ވޭވަށު ކައުންސިލް ހުވާކުރުމުގެ ކަންކަން ފަނޑިޔާރަކު ހަމަޖެހުނުހާ އަވަހަކަށް ކުރިއަށް ދާނެ: އެލްޖީއޭ
11 ޖޫން 2026 | ބުރާސްފަތި 14:50މ. ވޭވަށު ކައުންސިލް އިންތިޚާބުގެ ބާތިލު ވޯޓުތަކާ ގުޅޭގޮތުން ހައިކޯޓުން ކުރި ހުކުމް ސުޕްރީމް ކޯޓުން ބާތިލުކުރުމާއެކު، އެ ކައުންސިލްގެ ރަސްމީ ނަތީޖާ އިލެކްޝަންސް ކޮމިޝަނުން ގެޒެޓްކޮށްފައިވޭ.
އެލްޖީއޭގެ އޮފީސް | ގޫގުލް
މ. ވޭވަށު ކައުންސިލަށް މެންބަރުން އިންތިހާބު ކުރުމަށް ބާއްވާފައިވާ ވޯޓާ ގުޅިގެން ހައި ކޯޓުން ކުރި ހުކުމް ބާތިލު ކުރުމަށް ސުޕްރީމް ކޯޓުން މިއަދު އަމުރުކޮށްފައި ވާތީ ވޭވަށު ކައުންސިލް ހުވާކުރުމުގެ ކަންކަން ފަނޑިޔާރަކު ހަމަޖެހުނުހާ އަވަހަކަށް ކުރިއަށް ދާނެ ކަމަށް ލޯކަލް ގަވަރމަންޓް އޮތޯރިޓީ އިން ބުނެފި އެވެ.
އެލްޖީއޭގެ އޮފިޝަލަކު ރާއްޖެ އެމްވީ އަށް މައުލޫމާތުދެއްވަމުން ވިދާޅުވީ އާދިއްތަ ދުވަހު ހުވާ ލައިދިނުމަށް ފަނޑިޔާރަކު ހަމަޖައްސާ ދިނުމަށް ކަމާއި ގުޅުން ހުރި އިދާރާތަކުގައި އެދޭނެ ކަމަށެެވެ. ސުޕްރީމްކޯޓުގެ ހުކުމާއި ގުޅިގެން މ. ވޭވަށް ކައުންސިލްގެ ރަސްމީ ނަތީޖާ އިލެކްޝަންސް ކޮމިޝަނުން ވަނީ ގެޒެޓްކޮށްފަ އެވެ.
މި މައްސަލައިގައި ހިލާފު އުފެދިފައިވަނީ ބާތިލު ވޯޓު ކަނޑައެޅުމުގައި އެވެ. އީސީން އަލުން ވޯޓު ގުނި މާލަމުގައި އެ ވޯޓުތައް ސައްޙަކަމަށް ކަނޑައަޅާފައިވަނީ ކިހިނެއްކަން ސާފުކޮށް ކިޔާދީފައިވާ ކަން ފާހަގަކޮށްލެވެ އެވެ. އެގޮތުން ވޯޓު ކަރުދާހުގައި ފާހަގަވެފައި ހުރީ ކުރެހުމެއް ނޫނެވެ. އެއީ ވޯޓު ކަރުދާސް ޕްރިންޓު ކުރުމުގައި ދެލި ފޭދިފައިވާ ކަރުދާސްކަމަށްވާތީ އީސީން ވަނީ އެ ކަރުދާސްތައް ސައްޙަކަމަށް ބަލައިގެންފައެވެ. އެއީ އެމްޑީޕީ ކެންޑިޑޭޓަށް ލިބިފައިވާ 3 ވޯޓުގެ ވޯޓު ކަރުދާހެކެވެ.
ޙުކުމް ކުރައްވަމުން ސުޕްރީމް ކޯޓުގައި މައްސަލަ ބެއްލެވި ފަނޑިޔާރުން ވިދާޅުވީ، އިންތިޚާބުގެ ނަތީޖާއަށް ބަދަލު އަންނަ ފަދަ ނިންމުމެއް ފަނޑިޔާރު ނިންމަވާއިރު، ރިއާޔަތްކުރަންޖެހޭ ގިނަ ކަންތައްތަކެއް ހުންނާނެ ކަމަށެވެ. އެހެންނަމަވެސް ހައިކޯޓުން ގޮތް ނިންމާފައިވަނީ އެ ޤާނޫނީ ނައްސުތަކާއި، ސުޕްރީމް ކޯޓުގެ ކުރީގެ ނިންމުންތަކާވެސް ޚިލާފަށްކަމަށް ފަނޑިޔާރުން ވިދާޅުވި އެވެ.
މީގެ އިތުރުން، ވޯޓު ކަރުދާހުގައި ޗާޕުދެލި ހުންނަ ކޮންމެ ކަރުދާހަކީ ބާތިލު ވޯޓެއްކަމަށް ނިންމާނަމަ، އިންތިޚާބުގެ ނިޒާމަށް ގެއްލުންވެ، އޭގެ ނޭދެވޭ އަސަރު ކުރާނެކަމަށް ޤަބޫލު ކުރެވޭކަމަށްވެސް ފަނޑިޔާރުން ވިދާޅުވި އެވެ.
