ހޮރްމޫޒް ކަނޑު އޮޅި ކައިރި އަށް ވެއްޓުނު އެމެރިކާގެ ހެލިކޮޕްޓަރުގެ ޕައިލެޓުން ސަލާމަތް ކޮށްފި

ހޮރްމޫޒް ކަނޑު އޮޅި ކައިރި އަށް ވެއްޓުނު އެމެރިކާގެ ސިފައިންގެ އަޕާޗީ ހެލިކޮޕްޓަރުގެ ޕައިލެޓުން ސަލާމަތް ކޮށްފައިވާ ކަމަށް، އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ. 

އެމެރިކާގެ ވެރި ރަށް ވޮޝިންޓަން ޑީސީ އަށް ވަޑައިގަތުމުގެ ކުރިން ޖޯން އެފް ކެނެޑީ ބައިނަލްއަގުވާމީ ވައިގެ ބަނދަރުގައި ހުންނަވައި ނޫސްވެރިންނާ ވާހަކަ ދައްކަވަމުން ޓްރަމްޕް ވިދާޅުވީ، އެ ހާދިސާގައި އެއްވެސް މީހަކަށް އަނިޔާއެއް ލިބިފައި ނުވާ ކަމަށެވެ. އެއާ އެކު ޓްރަމްޕް ވިދާޅުވީ، އަންގާރަ ދުވަހުގެ ފަހުގެ ވަގުތެއްގައި އެ ހާދިސާއާ ގުޅޭ ރިޕޯޓެއް އެމެރިކާގެ ސަރުކާރުން ނެރޭނެ ކަމަށެވެ. 

ނިއު ޔޯކް ޓައިމްސް އިން ހޯމަ ދުވަހުގެ ރޭ ރިޕޯޓު ކޮށްފައިވާ ގޮތުގައި އެމެރިކާގެ ސިފައިންގެ އަޕާޗީ ހެލިކޮޕްޓަރެއް ހޯމަ ދުވަހު ހޮރްމޫޒް ކަނޑު އޮޅި ކައިރި އަށް ވެއްޓިފައިވާއިރު، އެ ހެލިކޮޕްޓަރުގައި ތިބި ދެ ކްރޫ މެމްބަރުން ސަލާމަތް ކޮށްފައިވާ ކަމަށް މި ހާދިސާއާ ގުޅޭ މައުލޫމާތު ލިބިފައިވާ ދެ މީހަކު ބުނެފައިވެ އެވެ. 

އެމެރިކާގެ އަޕާޗީ ހެލިކޮޕްޓަރު ވެއްޓުނީ އީރާން އިން ހަމަލާދީގެން ތޯ، ނުވަތަ މެކޭނިކަލް މައްސަލައެއް ދިމާވެގެން ތޯ، ނުވަތަ އެހެން މައްސަލައެއް ދިމާވެގެން ތޯ ވަގުތުން ސާފު ވެފައި ނުވާ ކަމަށް ވެސް އެ ރިޕޯޓުގައި ވަނީ ބުނެފައި އެވެ. އެމެރިކާގެ ސްޓޭޓް ޑިޕާޓްމަންޓް އާއި އެމެރިކާގެ ސެންޓްރަލް ކޮމާންޑް އިން މި ހާދިސާއާ ގުޅޭ ގޮތުން ވަގުތުން އެއްޗެއް ބުނެފައި ނުވެ އެވެ. 

މި ހާދިސާ ހިނގާފައިވަ ނީ އެމެރިކާ އާއި އީރާންއާ ދެމެދު އޮތް ނުތަނަވަސްކަން އިތުރު ވަމުން އަންނަ ވަގުތެއްގައި އެވެ. ހޮރްމޫޒް ކަނޑު އޮޅި އޮންނަނީ މެދު އިރުމަތީގެ ވަރަށް މުހިންމު ސަރަހައްދެއްގައި ކަމަށްވާތީ، މި ސަރަހައްދުގައި ހިނގާ އެންމެ ކުދި ހާދިސާ ތަކަށް ވެސް ބައިނަލްއަގުވާމީ ސަމާލުކަން ލިބެ އެވެ.

އެމެރިކާގެ ސިފައިންގެ ހެލިކޮޕްޓަރު މި ސަރަހައްދުގައި ވެއްޓުމުން، މި ސަރަހައްދުގެ ރައްކާތެރިކަމާ ބެހޭ ކަންބޮޑުވުންތައް އިތުރު ވެފައިވެ އެވެ. ނަމަވެސް ކްރޫ މެމްބަރުން ސަލާމަތް ކޮށްފައިވާތީ މި ހާދިސާގައި ބޮޑެތި ގެއްލުން ތަކެއް ލިބިފައި ނުވާނެ ކަމަށް ރިޕޯޓު ތަކުގައި ވަނީ ފާހަގަ ކޮށްފައި އެވެ.

އެމެރިކާގެ ސަރުކާރުން މި ހާދިސާއާ ގުޅޭ ތަފްސީލީ ރިޕޯޓެއް ނެރުމަށް ތައްޔާރުވަމުން އަންނައިރު، މި ހާދިސާގެ ސަބަބާއި ތަފްސީލު އެ ރިޕޯޓުން އިތުރަށް ސާފު ވާނެ އެވެ.