ޓްރަމްޕްގެ އިންޒާރެއް ނަތަންޔާހޫ އަށް، އިޒްރޭލް އެކަނިވެރި ވެދާނެ!
އެގޮތުން ޓްރަމްޕް ވިދާޅުވީ، ވަރަށް ބޮޑަށް ސަމާލުވާން ޖެހޭ ކަމަށް ނަތަންޔާހޫ އަށް އަންގަވާފައިވާ ކަމަށް. އެހެން ނޫން ނަމަ، އިޒްރޭލް އާއި ނަތަންޔާހޫ ހުންނަން ޖެހޭނީ އެކަނިވެރި ކަމެއްގެ ތެރޭގައި ކަމަށާއި، އެ ޙާލަތުގައި އެމެރިކާގެ އެއްވެސް އެހީތެރި ކަމެއް ނޯންނާނެ ކަމަށް ވެސް ޓްރަމްޕް ވަނީ ވިދާޅުވެފައިވޭ.
އެމެރިކާގެ ރައީސް ޑޮނަލްޑް ޓްރަމްޕް އާއި އިޒްރޭލްގެ ބޮޑު ވަޒީރު ބެންޖަމިން ނަތަންޔާހޫ. | ގެޓީ އިމޭޖަސް
އިރާންްއާ އެކު އޮތް ނުތަނަވަސްކަން އިތުރަށް ބޮޑު ނުކުރުމަށް އަންގަވައި، އެމެރިކާގެ ރައީސް ޑޮނަލްޑް ޓްރަމްޕް، އިޒްރޭލްގެ ބޮޑު ވަޒީރު ބެންޖަމިން ނަތަންޔާހޫ އަށް ވަރުގަދަ އިންޒާރެއް ދެއްވައިފި އެވެ.
ހޯމަ ދުވަހު ޓްރަމްޕް ދެއްވި މި އިންޒާރުގައި، މަސްލަހަތު ގޯސްވާ ނަމަ އިޒްރޭލް އިން އަމިއްލަ އަށް ކަންކަމާ ކުރިމަތިލާން ޖެހިދާނެ ކަމުގެ އިޝާރާތެއް ވަނީ ކުރައްވާފައި އެވެ.
އެގޮތުން ޓްރަމްޕް ވިދާޅުވީ، ވަރަށް ބޮޑަށް ސަމާލުވާން ޖެހޭ ކަމަށް ނަތަންޔާހޫ އަށް އަންގަވާފައިވާ ކަމަށެވެ. އެހެން ނޫން ނަމަ، އިޒްރޭލް އާއި ނަތަންޔާހޫ ހުންނަން ޖެހޭނީ އެކަނިވެރި ކަމެއްގެ ތެރޭގައި ކަމަށާއި، އެ ޙާލަތުގައި އެމެރިކާގެ އެއްވެސް އެހީތެރި ކަމެއް ނޯންނާނެ ކަމަށް ވެސް ޓްރަމްޕް ވަނީ ވިދާޅުވެފައި އެވެ.
ނަތަންޔާހޫގެ ސިޔާސަތު ތަކާ މެދު ހިތްހަމަ ނުޖެހުން ފާޅު ކުރައްވަމުން ޓްރަމްޕް ވަނީ، އިރާން އާއި އިޒްރޭލް އިން ވެސް ހަމަލާ ބަދަލު ކުރުން ހުއްޓާލައި، މަސްލަހަތު އިސްކުރުމަށް ގޮވާލައްވައިފަ އެވެ. އަދި ސަރަހައްދީ ސުލްހައަށްޓަކައި ކުރެވޭ "ފަހުގެ މަޝްވަރާތައް" ކުރިއަށް ދާނީ، އެކަމަށް ހުރަސްއަޅާ ޖާހިލު ކަމެއް، ނުވަތަ މޮޔަ އަމަލެއް ކުރިމަތި ނުވާ ނަމަ ކަމަށް ވެސް ޓްރަމްޕް ވިދާޅުވި އެވެ.
ނަމަވެސް، ޓްރަމްޕްގެ މި ވާހަކަތަކާ ގުޅިގެން އިޒްރޭލްގެ ބޮޑު ވަޒީރު ނަތަންޔާހޫ ވަނީ ޓީވީ މެދުވެރިކޮށް ބަޔާނެއް ދެއްވާފައި އެވެ. ނަތަންޔާހޫ ވިދާޅުވީ، އަމިއްލަ ނަފްސު ދިފާއު ކުރުމުގެ ފުރިހަމަ ހައްގު އިޒްރޭލް އަށް ލިބިގެންވާ ކަމަށާއި، ބޭނުންވާ ހާލަތް ތަކުގައި އެ ހައްގުގެ ބޭނުން ހިފަމުންދާނެ ކަމަށް ޓްރަމްޕް އަރިހުގައި ދަންނަވާފައި ވާނެ ކަމަށެވެ.
މީގެ އިތުރުން، ފާއިތުވި ހަފުތާގައި "ޕޮޑް ފޯސް ވަން" ޕޮޑްކާސްޓުގައި ވާހަކަ ދައްކަވަމުން ޓްރަމްޕް ވަނީ، ނަތަންޔާހޫ އަކީ "މޮޔައެއް" ކަމަށް ސިފަ ކުރައްވައި، އޭނާގެ ކިބައިގައި އެއްވެސް ޝުކުރުވެރި ކަމެއް ނެތް ކަމަށް ތުހުމަތު ކުރައްވާފައި އެވެ. އެ ޕޮޑްކާސްޓުގައި ޓްރަމްޕް ވިދާޅުވީ އޭނާ ހުންނެވީ ކޮންމެހެން ރުޅި އައިސްފައި ނޫން ކަމަށާއި، ނަމަވެސް ލުބުނާންއާ ދެކޮޅަށް މެދު ކެނޑުމެއް ނެތި ނަތަންޔާހޫ ކުރަމުން އަންނަ ހަނގުރާާމައާ މެދު ކަންބޮޑުވާ ކަމަށް ވެސް ޓްރަމްޕް ވިދާޅުވެފައިވެ އެވެ.
ޓްރަމްޕް އާއި ނަތަންޔާހޫގެ ގުޅުން ގޯސް ވެފައިވާކަން ހާމަވެފައި މިވަނީ، މެދު އިރުމަތީގެ މަސްލަހަތު ގޯސްވެ، ހަނގުރާމައިގެ ނުރައްކާ ބޮޑު ވެފައިވާ ދަނޑިވަޅެއްގައި އެވެ. ޓްރަމްޕްގެ މި އިންޒާރަކީ ކުރިއަށް އޮތް ތަނުގައި އެމެރިކާ އިން އިޒްރޭލް އަށް ދޭ އެހީތެރިކަމަށް ބަދަލު ތަކެއް އަތުވެދާނެ ކަމުގެ އިޝާރާތެއް ކަމަށް މަސްރަހު ދިރާސާކުރާ ފަރާތް ތަކުން ދެކެ އެވެ.
މަސްދަރު: އަލް އަރަބިއްޔާ
