އިޒްރޭލުން އިރާނުގެ މުހިންމު ދިފާއީ ނިޒާމުތަކަށް ހަމަލާދީ ހަލާކުކޮށްލާފައިވާ ކަމަށް ބުނެފި
އިޒްރޭލުން "އޮޕަރޭޝަން ރޯރިންގ ލަޔަން" ގެ ނަމުގައި ހިންގި އަސްކަރީ ހަރަކާތެއްގައި، އިރާނުގެ އެކި ސަރަހައްދުތަކުގައި ގާއިމުކޮށްފައިވާ ދިފާއީ އަދި ރާޑަރު ނިޒާމުތައް ބޭނުންނުކުރެވޭ ވަރަށް ހަލާކުކޮށްލާފައިވާ ކަމަށް އެ ގައުމުން ބުނެފި. މި ހަމަލާތައް ދީފައިވަނީ މެދުއިރުމަތީގެ ހަނގުރާމަ ހުއްޓާލުމަށް މަޝްވަރާކުރަމުންދާ ދަނޑިވަޅެއްގައި، ހިޒްބުالله އަށް އަމާޒުކޮށް އިޒްރޭލުން ދިން ހަމަލާއެއްގެ ބަދަލުހިފުމަށް އިރާނުން ހަމަލާދިނުމާ ގުޅިގެން. އެމެރިކާއިން ހަމަލާތައް މަޑުޖައްސާލުމަށް ގޮވާލާފައި ވަނިކޮށް ދިން މި ހަމަލާތަކުގެ ސަބަބުން ސަރަހައްދީ މަސްރަހު ވަނީ އަލުން ނުތަނަވަސްވެފައި.
އިޒްރޭލުން ހިފާފައިވާ ހުޅަނގު އައްސޭރީގެ މެދުތެރޭގެ ސަރަހައްދަކަށް އީރާނުން ދިން ހަމަލާތަކާ ގުޅިގެން، ބިމަށް ހެރިފައިވާ މިސައިލެއްގެ ބައެއް ފެންނަން އޮތް މަންޒަރު، 2026 ޖޫން 8 ވަނަ ދުވަހު. | ރޮއިޓާސް
އިރާނުގެ އެކި ސަރަހައްދުތަކުގައި ގާއިމުކޮށްފައިވާ އެ ގައުމުގެ ދިފާއީ ނިޒާމުތަކަށް ހަމަލާދީ، އެ ނިޒާމުތައް ނައްތާލާފައިވާ ކަމަށް އިސްރާއީލުގެ އަސްކަރިއްޔާއިން ހޯމަ ދުވަހު ބުނެފިއެވެ.
އިޒްރޭލުގެ އަސްކަރިއްޔާއިން ބުނި ގޮތުގައި، "އޮޕަރޭޝަން ރޯރިންގ ލަޔަން" ގެ ތެރޭގައި ހަލާކުވި އިރާނުގެ ދިފާއީ އަދި ރާޑަރުގެ ގާބިލުކަން އަލުން އިއާދަކުރުމަށް އެ ގައުމުގެ ސަރުކާރުން ކުރަމުންދާ މަސައްކަތުގެ ދަށުން، ފަހަކަށް އައިސް އިރާނުގެ ގިނަ ސަރަހައްދުތަކެއްގައި ދިފާއީ ނިޒާމުތައް ވަނީ ގާއިމުކޮށްފައެވެ.
އިޒްރޭލުން ދިން މި ހަމަލާތަކުގައި އެ ނިޒާމުތައް ބޭނުންނުކުރެވޭ ވަރަށް ނައްތާލާފައިވާ ކަމަށާއި، މި އޮޕަރޭޝަނުގައި ގިނަ ހަނގުރާމަމަތީ ބޯޓު ބައިވެރިވެފައިވާ ކަމަށްވެސް އެ ގައުމުގެ އަސްކަރިއްޔާއިން ބުނެފައިވެއެވެ.
މެދުއިރުމަތީގެ ހަނގުރާމަ ހުއްޓާލުމަށް އެއްބަސްވިތާ ދެ މަސް ދުވަސް ފަހުން، އެމެރިކާގެ ރައީސް ޑޮނަލްޑް ޓްރަމްޕް ހަމަލާތައް މަޑުޖައްސާލުމަށް ގޮވާލައްވާފައި ވަނިކޮށް، ހޯމަ ދުވަހު އިޒްރޭލާއި އިރާނުން ވަނީ ފުރަތަމަ ފަހަރަށް އެއްބަޔަކު އަނެއްބަޔަކަށް ހަމަލާ ބަދަލުކޮށްފައެވެ.
ސަރަހައްދީ އެހެން ގައުމުތަކަށްވެސް އޭގެ އަސަރު ފޯރި މި ކުރިމަތިލުންތައް ފެށުނީ، ބޭރޫތުގެ ދެކުނު ސަރަހައްދުގައި ހަރަކާތްތެރިވާ ހިޒްބުالله އަށް އަމާޒުކޮށް އިޒްރޭލުން ދިން ވައިގެ ހަމަލާއެއްގެ ބަދަލު ހިފުމުގެ ގޮތުން އިރާނުން އިޒްރޭލަށް ހަމަލާދިނުމާ ގުޅިގެން، ރައްދުގައި އިޒްރޭލުން އިރާނަށް ހަމަލާދިނުމުންނެވެ.
މި ހަމަލާތައް ދީފައި މިވަނީ، ފެބްރުއަރީ މަހުގެ 28 ވަނަ ދުވަހު އެމެރިކާއާއި އިޒްރޭލުން އިރާނަށް ދިން ހަމަލާތަކާ ގުޅިގެން ފެށުނު ސަރަހައްދީ ހަނގުރާމަ އެއްކޮށް ހުއްޓާލުމަށް ހަފުތާތަކެއް ވަންދެން މަޝްވަރާތައް ކުރަމުންދަނިކޮށެވެ.
