އިޒްރޭލް އާއި އީރާން އިން ހަމަލާ ދިނުން ހުއްޓާލައި، މަޝްވަރާގެ މަގު އިސް ކުރުމަށް ކަލާސް ގޮވާލައްވައިފި

އިޒްރޭލް އާއި އީރާންއާ ދެމެދު ހަމަލާ ތަކެއް ބަދަލުކޮށް، ހަނގުރާމަ އިތުރަށް ފުޅާ ވެދާނެ ކަމުގެ ބިރު ބޮޑުވެފައި ވަނިކޮށް، ޔޫރަޕިއަން ޔޫނިއަންގެ ބޭރުގެ ސިޔާސަތާ ބެހޭ އިސްވެރިޔާ ކާޖާ ކަލާސް ވަރުގަދަ އިންޒާރެއް ދެއްވައިފި އެވެ. 

އިޒްރޭލް އާއި އީރާންއާ ދެމެދުގައި ހަމަލާތައް ބަދަލުކުރުމާ ގުޅިގެން ކަލާސް ވަނީ ހުރިހާ ފަރާތް ތަކުން ވެސް މަޝްވަރާ ތަކަށް އަނބުރާ އައުމަށް ގޮވާލައްވައިފަ އެވެ. 

މެދު އިރުމަތީގެ ސަރަހައްދުގައި ހަނގުރާމަ އިތުރަށް ބޮޑު ވުމުގެ ބިރު އިތުރު ވަމުންދާ ދަނޑިވަޅެއްގައި ކަލާސް ވަނީ، ހަނގުރާމައަ ދުރުވުމަށް އިންޒާރު ދެއްވައިފަ އެވެ. އިޒްރޭލް އާއި އީރާންއާ ދެމެދު މި ބަދަލު ކުރަން ފެށި ހަމަލާ ތަކުގެ ސަބަބުން، ސަރަހައްދީ ރައްކާތެރި ކަމަށް ބޮޑު ނުރައްކަލެއް ކުރިމަތި ވެފައިވާ ކަމަށް ބައިނަލްއަޤުވާމީ މާހިރުން އަންނަނީ ފާހަގަ ކުރަމުންނެވެ.  

ކަލާސް ވަނީ ހަނގުރާމަ އިތުރަށް ފުޅާވުމުގެ އެންމެހާ އަމަލު ތަކުން ދުރުވުމަށް ހުރިހާ ފަރާތް ތަކަށް ވެސް ގޮވާލައްވައިފަ އެވެ. އަދި ދިމާވެފައިވާ މައްސަލަތައް ޙައްލު ކުރުމަށް މަޝްވަރާ އާއި ސުލްޙަވެރި ގޮތް ތަކެއް ހޯދުމަށް ވެސް ކަލާސް ވަނީ ގޮވާލައްވައިފަ އެވެ. ޔޫރަޕިއަން ޔޫނިއަން އިން މި ސަރަހައްދުގައި ސުލްހަ އާއި ހަމަޖެހުން ޤާއިމު ކުރުމަށް ބޮޑު އިސްކަމެއް ދޭ ކަމަށް ކަލާސް ފާހަގަ ކުރެއްވި އެވެ. 

މީގެ އިތުރުން ކަލާސް ވިދާޅުވެފައި ވަނީ، މެދު އިރުމަތީގެ ސަރަހައްދުގައި އަމާންކަން ދެމެހެއްޓުމަކީ ބައިނަލްއަޤުވާމީ ސަލާމަތަށް ވެސް މުހިންމު ކަމެއް ކަމަށެވެ. އިޒްރޭލް އާއި އީރާންއާ ދެމެދު ހަނގުރާމަ އިތުރަށް ފުޅާ ވެއްޖެ ނަމަ، އެކަން ސަރަހައްދުގެ އެހެން ޤައުމު ތަކަށް ވެސް ފެތުރިދާނެ ކަމުގެ ކަންބޮޑުވުން އޮތް ކަމަށް ވެސް ކަލާސް ވިދާޅުވެފައިވެ އެވެ. 

ބައިނަލްއަގުވާމީ މުޖުތަމައުން މި މައްސަލައިގައި ހުރިހާ ފަރާތްތަކާ ވެސް މަޝްވަރާ ކުރަމުންދާ ކަމަށާއި، ސަރަހައްދުގައި ސުލްހަ ހަމަޖެއްސުމަށް މަސައްކަތް ކުރަމުންދާ ކަމަށް ކަލާސް ވަނީ ވިދާޅުވެފައި އެވެ. މި ހަނގުރާމަ ހުއްޓުވުމަށް ޑިޕްލޮމެޓިކް މަސައްކަތްތައް ވަރުގަ ދަކުރުމަކީ މިހާރު ކުރަން ޖެހޭ މުހިންމު ކަމެއް ކަމަށް ބައިނަލްއަގުވާމީ ބޭފުޅުން ފާހަގަ ކުރައްވަ އެވެ.