އިޒްރޭލް އަށް ވަރުގަދަ ހަމަލާ ތަކެއް ދީފައިވާ ކަމަށް ހޫތީން އިން ބުނެފި

އިޒްރޭލް އަށް އަމާޒުކޮށް ވަރުގަދަ ހަމަލާ ތަކެއް ދީފައިވާ ކަމަށް، ޔަމަންގައި ޙަރަކާތްތެރިވާ ހޫތީން އިން ކަށަވަރު ކޮށްދީފި އެވެ.

ހޫތީން އިން ބުނި ގޮތުގައި މި ހަމަލާތައް އަމާޒު ކޮށްފައި ވަނީ އިޒްރޭލް އިން ހިފާފައިވާ ޖައްފާ ސަރަހައްދުގައި ހުރި އިޒްރޭލްގެ ނާޒުކު އަދި މުހިންމު ތަންތަނަށެވެ.

ޓެލެގްރާމް މެދުވެރިކޮށް ހޫތީން އިން ނެރުނު ބަޔާނެއްގައި ބުނެފައި ވަނީ، ރަތް ކަނޑުގެ ތެރެއިން އިޒްރޭލްގެ އުޅަނދު ފަހަރު ދަތުރު ކުރުން މިހާރު މުޅިން މަނާ ކޮށްފައިވާ ކަމަށެވެ. އަދި އިޒްރޭލް އިން ދެމުންދާ ހަމަލާތައް ވަރުގަދަ ކުރާ ނަމަ، އެއަށްވުރެ ވަރުގަދަ ރައްދު ހަމަލާ ތަކެއް ހޫތީންގެ ފަރާތުން ކުރިމަތި ވާނެ ކަމުގެ އިންޒާރު ވެސް އެ ޖަމާއަތުން ވަނީ ދީފައި އެވެ.

މި ބަޔާނުގައި ހޫތީން އިން އިތުރަށް ބުނެފައި ވަނީ، ފަލަސްޠީނާއި، ޣައްޒާ އާއި އީރާން އާއި ލުބުނާން އަދި އިރާގުގެ ރައްޔިތުންނާ ދެކޮޅަށް ހިންގަމުންދާ ބޭއިންސާފު އަމަލުތަކާއި، ކުރިމަތި ކުރުވާފައިވާ ހުރަސް ތަކަށް ބަލަހައްޓައިގެން އެ ޖަމާއަތް މަޑުން ނޯންނާނެ ކަމަށެވެ. އަދި މިއީ އިސްލާމީ ޖިހާދާއި، ދެކޮޅުވެރިކަމުގެ ރޫހުގައި ތިބި އެންމެހާ މުސްލިމުންނަށްޓަކައި ކުރާ މަސައްކަތެއްގެ ގޮތުގައި އެ ޖަމާއަތުން ސިފަ ކޮށްފައިވެ އެވެ.

ހޫތީންގެ މި ހަމަލާ ތަކަކީ ސަރަހައްދީ ހަމަ ނުޖެހުން ތަކުގެ ތެރެއިން އިޒްރޭލް އަށް ދިން ސީދާ ހަމަލާ ތަކެކެވެ. އިޒްރޭލް އިން ޣައްޒާގައި ހިންގަމުންދާ އުދުވާނާ ގުޅިގެން ހޫތީން އިން ދަނީ މީގެ ކުރިން ވެސް ރަތް ކަނޑުން ދަތުރު ކުރާ އިޒްރޭލްއާ ގުޅުންހުރި އުޅަނދު ފަހަރަށް އަމާޒުކޮށް ހަމަލާތައް ދެމުންނެވެ. ނަމަވެސް މިފަހަރުގެ ހަމަލާއަކީ ސީދާ އިޒްރޭލްގެ އެތެރޭގެ ސަރަހައްދު ތަކަށް އަމާޒުކޮށް ދީފައިވާ ހަމަލާއެއްކަން ފާހަގަ ކުރެވެ އެވެ.

މި ހަމަލާއާ ގުޅިގެން މެދު އިރުމަތީގެ މަސްރަހު އިތުރަށް ނުތަނަވަސް ވެފައިވާއިރު، ހޫތީން އިން ބުނަމުން ދަނީ ފަލަސްޠީނުގެ ރައްޔިތުންނަށް ދެމުންދާ އަނިޔާތައް ހުއްޓާނުލަނީސް އެ ޖަމާއަތުގެ ހަމަލާތައް ވެސް ނުހުއްޓޭނެ ކަމަށެވެ. އަދި ކުރިއަށް އޮތް ތަނުގައި ވެސް އިޒްރޭލްގެ މަސްލަހަތު އޮތް ކޮންމެ ތަނަކަށް ހަމަލާ ދިނުމުގެ ގާބިލުކަން އެ ޖަމާއަތަށް ލިބިގެންވާ ކަމަށް ވެސް ބަޔާނުގައި ބުނެފައިވެ އެވެ.