އީރާނުން ހަމަލާތައް ހުއްޓާލައި އިޒްރޭލަށް އިންޒާރުދީފި
އިޒްރޭލުން ލުބުނާނަށް ދެމުންދާ ހަމަލާތައް ހުއްޓާނުލާނަމަ، ކުރިއަށްވުރެ ވަރުގަދަ އަސްކަރީ ރައްދެއް ދޭނެ ކަމުގެ އިންޒާރު އީރާނުން ވަނީ ދީފައި. އިޒްރޭލުން ހަމަލާ ބަދަލުކުރުން ހުއްޓާލުމުގެ އެއްބަސްވުމާ ޚިލާފުވަމުންދާ ކަމަށް ބުނެ، އީރާނުން އިއްޔެ ވަނީ އެ ގައުމާ ދެކޮޅަށް އަސްކަރީ އޮޕަރޭޝަނެއް ހިންގާފައި. އީރާނުން ދެކޭގޮތުގައި ލުބުނާނުގައި ގާއިމުކޮށްފައިވާ ސުލްހައިގެ އެއްބަސްވުމަކީ އެ ގައުމާވެސް ގުޅިފައިވާ ކަމެއް.
ބޭރޫތުގެ ދެކުނު ސަރަހައްދުގެ އެޕާޓްމަންޓަކަށް އާދީއްތަ ދުވަހު އިސްރާއީލުން ދިން ވައިގެ ހަމަލާއެއް އަމާޒުވި ސަރަހައްދުގައި ސިފައިންގެ މީހަކު ހަރަކާތްތެރިވަނީ. | އީޕީއޭ
އީރާނުގެ އަސްކަރިއްޔާގެ އެންމެ މަތީ ކޮމާންޑް ކަމަށްވާ ޚާތަމް އަލް-އަންބިޔާ ސެންޓްރަލް ހެޑްކުއާޓާޒްއިން ނެރުނު ބަޔާނެއްގައި، އެ ގައުމުގެ ހަތިޔާރު އެޅި ފައުޖުތަކުން ކުރިއަށްގެންދާ އަސްކަރީ އޮޕަރޭޝަންތައް މިހާރު ހުއްޓާލާފައިވާކަން އިއުލާނުކޮށްފިއެވެ.
ނަމަވެސް، އެ ބަޔާނުގައި އީރާނުން ވަނީ އިންޒާރެއްވެސް ދީފައެވެ. އެގޮތުން ލުބުނާނުގެ ދެކުނުގެ ސަރަހައްދުތައް ހިމެނޭހެން އިޒްރޭލުން ދެމުންދާ ހަމަލާތައް ކުރިއަށްގެންދާނަމަ، ކުރިއަށްވުރެ މާ ވަރުގަދަ އަދި ނުރައްކާތެރި ރައްދެއް އީރާނުން ދޭނެ ކަމަށް އެ ގައުމުން ބުނެފައިވެއެވެ.
އީރާނުން އިޒްރޭލާ ދެކޮޅަށް އަސްކަރީ އޮޕަރޭޝަންތައް ފަށާފައިވަނީ އިއްޔެގެ ވަގުތެއްގައެވެ. މިއީ އިޒްރޭލުން ލުބުނާނުގެ ބެއިރޫތުގެ ދެކުނުގެ ސަރަހައްދުތަކަށް ދިން ހަމަލާތަކުގެ ރައްދުގައި އީރާނުން ފެށި އޮޕަރޭޝަނެކެވެ. އީރާނުގެ މި ހަމަލާތަކާ ގުޅިގެން އިސްރާއީލުންވެސް ވަނީ އީރާނަށް ރައްދު ހަމަލާތަކެއް ދީފައެވެ.
އީރާނުގެ ސިޔާސީ އަދި އަސްކަރީ އިސް އޮފިޝަލުން އިއްޔެ އިރުއޮއްސުނު ވަގުތު ވަނީ، ހަމަލާ ބަދަލުކުރުން ހުއްޓާލުމަށް ވެފައިވާ އެއްބަސްވުމާ އިޒްރޭލުން ޚިލާފުވަމުންދާ ކަމަށް ބުނެފައެވެ. އަދި އެފަދަ އަމަލުތަކަށް އަސްކަރީ ގޮތުން ރައްދު ދޭނެ ކަމުގެ އިންޒާރުވެސް އެ އޮފިޝަލުން ވަނީ ދެއްވާފައެވެ.
އީރާނުން ގަބޫލުކުރާ ގޮތުގައި ލުބުނާނުގައި ހަމަލާ ބަދަލުކުރުން ހުއްޓާލުމަށް ވެފައިވާ އެއްބަސްވުމަކީ، އީރާނާއެކުވެސް ހަމަލާ ބަދަލުކުރުން ހުއްޓާލުމަށް ވެފައިވާ އެއްބަސްވުމެއްގެ ބައެކެވެ.
