އިރާނުގެ ޚާރިޖީ ވަޒީރު އީޔޫ، ސަރަހައްދީ ވަޒީރުންނާ މަޝްވަރާކުރައްވައިފި

އިރާނުގެ ޚާރިޖީ ވަޒީރު އައްބާސް އަރާގްޗީ، މެދުއިރުމަތީގެ މަސްރަހުގައި މިހާރު ހިނގަމުންދާ ކަންކަމާ ގުޅޭގޮތުން އިނގިރޭސިވިލާތް، ފަރަންސޭސިވިލާތް އަދި ތުރުކީވިލާތުގެ ޚާރިޖީ ވަޒީރުންގެ އިތުރުން، ގަތަރުގެ ބޮޑުވަޒީރާއި ޕާކިސްތާނުގެ މެދުވެރިންނާ އާދީއްތަ ދުވަހުގެ ރޭ މަޝްވަރާ ކުރައްވައިފިއެވެ.

އިރާނުގެ ޚާރިޖީ ވުޒާރާއިން ނެރުނު ބަޔާނެއްގައި ބުނެފައިވަނީ، ވަކިވަކިން ކުރިއަށްދިޔަ މި ފޯނު ކޯލްތަކުގައި މައިގަނޑު ގޮތެއްގައި މަޝްވަރާކޮށްފައިވަނީ، ލުބުނާނުގައި ގާއިމުކޮށްފައިވާ ހަނގުރާމަ ހުއްޓާލުމުގެ އެއްބަސްވުމާ އިޒްރޭލުން ތަކުރާރުކޮށް ޚިލާފުވަމުންދާތީ، އެކަމަށް އިރާނުން ދޭނެ ރައްދާ ގުޅޭގޮތުންނެވެ. ނަމަވެސް މިކަމާ ގުޅޭ އިތުރު ތަފްސީލެއް އެ ވުޒާރާއިން ހާމަކޮށްފައެއް ނުވެއެވެ.

އިރާނުގެ ޚާރިޖީ ވުޒާރާއާ ހަވާލާދީ އެ ގައުމުގެ ރަސްމީ ނިއުސް އެޖެންސީ "އިރްނާ" އިން ރިޕޯޓްކޮށްފައިވާ ގޮތުގައި، މި މަޝްވަރާތައް ކުރިއަށްދިޔައީ ބައިރޫތުގެ ދެކުނު ސަރަހައްދުތަކަށް އިޒްރޭލުން ދިން ހަމަލާތަކާ ގުޅިގެން، އިރާނުން އިޒްރޭލަށް އަމާޒުކޮށް ގިނަ އަދަދެއްގެ މިސައިލް ހަމަލާތަކެއް ފޮނުވާލާފައިވާ ދަނޑިވަޅެއްގައެވެ.

ޚާރިޖީ ވަޒީރު އަރާގްޗީ ވަނީ ގަތަރުގެ ބޮޑުވަޒީރު މުހައްމަދު ބިން އަބްދުއްރަހްމާން އައްޘާނީ އާއި، ފަރަންސޭސިވިލާތް، އިނގިރޭސިވިލާތް އަދި ތުރުކީވިލާތުގެ ޚާރިޖީ ވަޒީރުންނާ ފޯނުން ގުޅުއްވައި ވާހަކަދައްކަވާފައެވެ. މީގެ އިތުރުން މެދުއިރުމަތީގެ ހަނގުރާމަ ހުއްޓުމަކަށް ގެނައުމަށްޓަކައި ތެހެރާނާއި ވޮޝިންގޓަނާ ދެމެދު އެއްބަސްވުމަކަށް އައުމަށް މަސައްކަތްކުރާ ޕާކިސްތާނުގެ މެދުވެރިންގެ ޓީމާވެސް އެމަނިކުފާނު ވަނީ މަޝްވަރާ ކުރައްވާފައެވެ.