އީރާނުން އިޒްރޭލުގެ ރާމަތު ޑޭވިޑް އެއާބޭސްއަށް މިސައިލް ހަމަލާދީފި

އިޒްރޭލުން ލުބުނާނަށް ދެމުންދާ ހަމަލާތަކުގެ މައި މަރުކަޒު ކަމަށްވާ ރާމަތު ޑޭވިޑް އެއާބޭސްއަށް ބެލިސްޓިކް މިސައިލުން ހަމަލާދީފި ކަމަށް އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރު.ޖީ.ސީ) އިން ބުނެފިއެވެ. އައި.އާރު.ޖީ.ސީގެ އެއަރޯސްޕޭސް ފޯސްއިން މި ހަމަލާ ދީފައިވަނީ، އެ މަރުކަޒަކީ ލުބުނާނުގެ ދެކުނުގެ ސަރަހައްދުތަކާއި، ތަޔަރާއި، ނަބާތިއާގެ އިތުރުން ބެއިރޫތުގެ ދެކުނުގެ ސަރަހައްދުތަކަށް އިޒްރޭލުން ދެމުންދާ އުދުވާނީ ހަމަލާތައް ފޮނުވާލާ މަރުކަޒު ކަމަށްވާތީ ކަމަށް އެ ފަރާތުން ބުނެއެވެ.

އާދީއްތަ ދުވަހުގެ ރޭ އީރާން ގަޑިން ދަންވަރު އައި.އާރު.ޖީ.ސީ އިން ނެރުނު ބަޔާނެއްގައި ބުނެފައިވަނީ، މި އޮޕަރޭޝަނަކީ ޒަޔަނިސްޓް އިޒްރޭލުން ލުބުނާނުގައި ހިންގަމުންދާ ބޮޑެތި ޖަރީމާތަކާއި، އާންމުން މަރައި، އެތައް ބަޔަކު ގެދޮރުން މަހުރޫމްކޮށް ރެފިއުޖީންނަށް ހަދަމުންދާތީ އެކަމަށް ދިން ސީދާ ރައްދެއް ކަމަށެވެ.

"ފޭރިގަނެގެން އުޅޭ ޒަޔަނިސްޓް ރެޖީމުން ލުބުނާނުގެ ދެކުނުގައި ހިންގަމުންދާ ބޮޑެތި ޖަރީމާތަކާއި، ތަޔަރާއި ނަބާތިއާގެ އިތުރުން ބެއިރޫތުގެ ދާހިޔާ ފަދަ ސަރަހައްދުތަކުގެ ނިކަމެތި ރައްޔިތުން މަރައި، މަގުމަތިކުރަމުންދާ ދިއުމަށް ރައްދު ދިނުމުގެ ގޮތުން، މި އުދުވާނުތަކުގެ އަސްލު ކަމުގައިވާ ރާމަތު ޑޭވިޑް އެއާބޭސްއަށް އައި.އާރު.ޖީ.ސީގެ އެއަރޯސްޕޭސް ފޯސްގެ ބެލިސްޓިކް މިސައިލްތަކުން ވަނީ ހަމަލާދީފައި،" އެ ބަޔާނުގައިވެއެވެ.

އައި.އާރު.ޖީ.ސީ އިން އިތުރަށް ބުނެފައިވަނީ، އޭޕްރީލް މަހުގެ 8 ވަނަ ދުވަހު އިއުލާންކުރި ހަނގުރާމަ ހުއްޓާލުމުގެ އެއްބަސްވުމަށް އީރާނުން އެއްބަސްވީ، ހުރިހާ ފަރާތްތަކަކުންވެސް ހަމަލާތައް ހުއްޓާލުމަށް ޝަރުތުކޮށްފައި ކަމަށެވެ.

"ނަމަވެސް އަބަދުވެސް ކަންތައް ކުރާ އުސޫލުން، އެމެރިކާއާއި ޒަޔަނިސްޓް ރެޖީމުން ވަނީ އެމީހުންގެ ވައުދުތަކާ ޚިލާފުވެފައި. އެމީހުން ލުބުނާނުގައި އުދުވާނުތަކާއި ޖަރީމާތައް ކުރިއަށް ގެންދިއުމުގެ އިތުރުން، ހޮރްމޫޒް ކަނޑުއޮޅިއާއި، އޮމާން ކަނޑާއި، އިންޑިއާ ކަނޑުގައިވާ އީރާނުގެ އައްސޭރިފަށުގެ ސަރަހައްދުތަކަށާއި އުޅަނދުފަހަރަށް ހަމަލާދީ، ތަކުރާރުކޮށް ވަނީ ހަނގުރާމަ ހުއްޓާލުމުގެ އެއްބަސްވުމާ ޚިލާފުވެފައި،" އައި.އާރު.ޖީ.ސީގެ ބަޔާނުގައި ބުނެފައިވެއެވެ.

ރޭގެ ވަގުތެއްގައި ދިން މި މިސައިލް ހަމަލާއަކީ އިޒްރޭލަށް ދެވުނު "އިންޒާރެއް" ކަމަށް އައި.އާރު.ޖީ.ސީ އިން ސިފަކޮށްފައިވެއެވެ.

"މިފަދަ އުދުވާނުތައް ތަކުރާރުކޮށްފިނަމަ، މިއަށްވުރެ ފުޅާދާއިރާއެއްގައި ރައްދުދޭނެ ކަމަށާއި، މި ސަރަހައްދުގައި ހުރި އެމެރިކާއާއި ޒަޔަނިސްޓުންގެ ހުރިހާ އަމާޒުފަތްތަކަކަށް ހަމަލާދޭނެ،" ކަމަށްވެސް އެ ބަޔާނުގައި ބުނެފައިވެއެވެ.

ޕާކިސްތާނު މެދުވެރިވެގެން އޭޕްރީލް މަހުގެ ކުރީކޮޅުން ފެށިގެން އީރާނާއި އެމެރިކާއާ ދެމެދު ނާޒުކު ހަނގުރާމަ ހުއްޓާލުމުގެ އެއްބަސްވުމެއް އޮތް ނަމަވެސް، އިޒްރޭލުން ލުބުނާނަށް ހަމަލާދީ އެއްބަސްވުމާ ޚިލާފުވަމުންދާތީ، ތެހެރާނުން މިވަނީ އަމަލީ ފިޔަވަޅު އަޅަން ފަށާފައެވެ.

އާދީއްތަ ދުވަހު އިޒްރޭލުގެ ހަނގުރާމަމަތީ ބޯޓުތަކުން ބެއިރޫތުގެ ދެކުނުގެ ސަރަހައްދުތަކުގެ މީހުން ދިރިއުޅޭ އިމާރާތްތަކަށް ބޮން އެޅުމުގެ ސަބަބުން މަދުވެގެން ދެ މީހުން މަރުވެ، 20 މީހުން ވަނީ ޒަޚަމްވެފައެވެ.

މީގެ އިތުރުން، އިޒްރޭލުން ވަނީ ބައިނަލްއަގުވާމީ ގޮތުން މަނާކޮށްފައިވާ ފޮސްފަރަސް ހަތިޔާރު ލުބުނާނުގެ ދެކުނުގައި ބޭނުންކޮށްފައެވެ. މީގެ ސަބަބުން އާންމުންގެ ހަށިގަނޑު ވަރަށް ބޮޑަށް ފިހި، ތިމާވެއްޓަށް ބޮޑެތި ގެއްލުންތަކެއް ވަނީ ލިބިފައެވެ.

ލުބުނާނުގެ ސިއްހީ އިދާރާތަކުން ހާމަކޮށްފައިވާ ތަފާސްހިސާބުތަކަށް ބަލާއިރު، މާޗް މަހުގެ ކުރީކޮޅުން ފެށިގެން މިހާތަނަށް 3,610 އަށްވުރެ ގިނަ މީހުން މަރުވެ، 11,070 އަށްވުރެ ގިނަ މީހުން ވަނީ ޒަޚަމްވެފައެވެ. އަދި 1.6 މިލިއަނަށްވުރެ ގިނަ މީހުން ވަނީ ގެދޮރު ދޫކޮށް ދާންޖެހިފައެވެ.

އީރާނުން ތަކުރާރުކޮށް ބުނަމުންދަނީ، ހަނގުރާމަ ހުއްޓާލުމުގެ އެއްބަސްވުމަކީ ހުރިހާ ދިމާލަކުންވެސް ހަމަލާތައް ހުއްޓާލާ، އިޒްރޭލުން ލުބުނާނަށް ދޭ ހަމަލާތައް ވަގުތުން ހުއްޓާލުން ހިމެނޭ ފުރިހަމަ އެއްބަސްވުމަކަށް ވާންޖެހޭނެ ކަމަށެވެ.