ރެއާލްގެ ރައީސް ކަމަށް ޕެރޭޒް އިންތިޚާބު ކޮށްފި

ސްޕެއިންގެ ރެއާލް މެޑްރިޑުގެ ރައީސް ކަމުގެ މަގާމަށް، މިހާރު ވެސް އެ މަގާމުގައި ހުންނެވި ފްލޮރެންޓީނޯ ޕެރޭޒް އިންތިޚާބު ކޮށްފި އެވެ. 

ރެއާލްގެ ރައީސް ކަމުގެ އިތުރު ދައުރަކަށް ޕެރޭޒް އިންތިޚާބު ކޮށްފައި ވަނީ އާދީއްތަ ދުވަހު އެވެ. އެ އިންތިޚާބުގައި ޕެރޭޒް ވަނީ، އެންރީކޭ ރިކޭލްމޭގެ މައްޗަށް ކުރި ހޯއްދަވައިފަ އެވެ. އިތުރު ހަތަރު އަހަރަށް ރެއާލްގެ ރައީސްކަން ޕެރޭޒް ހޯއްދެވިއިރު، އޭނާގެ ދައުރު ދެން ހަމަވާނީ 2030 ވަނަ އަހަރު އެވެ. 

ރެއާލްގެ އިންތިޚާބަށް ފަހު ވާހަކަ ދައްކަވަމުން ޕެރޭޒް ވިދާޅުވީ، ކުލަބުގެ ކުރިމަގަށްޓަކައި އޭނާ މަސައްކަތް ކުރައްވާނެ ކަމަށާއި، ރެއާލް ހިމާޔަތް ކުރައްވާނެ ކަމަށެވެ. އަދި ރެއާލް އިން މަސައްކަތް ކުރާނީ ކާމިޔާބީ އާއި ތަށިތައް ހޯދަން ކަމަށް ޕެރޭޒް ވިދާޅުވި އެވެ. ޕެރޭޒް ވިދާޅުވީ 16 ވަނަ ފަހަރަށް ޔުއެފާ ޗެމްޕިއަންސް ލީގު ކާމިޔާބު ކުރުމަށް، ރެއާލް އިން ހުއްޓުމެއް ނެތި މަސައްކަތް ކުރާނެ ކަަމަށެވެ. 

މީގެ އިތުރުން ޕެރޭޒް ވިދާޅުވީ ރެއާލް އަކީ މިނިވަން ކުލަބެއްގެ ގޮތުގައި އަބަދު ވެސް ދެމި އޮންނާނެ ކަމަށެވެ. އަދި ދިމާވާ ގޮންޖެހުންތަކާއި، ހުރަސް ތަކުން ރެއާލް އަރައި ގަންނާނީ ހިތްވަރާ އެކުގައި ކަމަށް ޕެރޭޒް ވަނީ ވިދާޅުވެފައި އެވެ. ރެއާލްގެ ދަނޑަކީ ދުނިޔޭގެ އެންމެ ފަޚުރުވެރި ދަނޑުކަން ފާހަގަ ކުރައްވައި ޕެރޭޒް ވިދާޅުވީ، ރެއާލްގައި ތިބޭނީ ދުނިޔޭގެ ފެންވަރުގައި ފާހަގަ ކޮށްލެވޭ އެންމެ މޮޅު ކުޅުންތެރިން ކަަމަށެވެ. 

އިންތިޚާބުގެ ކާމިޔާބާާ އެކު ޕެރޭޒް ވަނީ، ރެއާލްގެ ކޯޗުކަމާ ދެން ހަވާލުވާނީ ހޯސޭ މޮރީނިއޯ ކަމަށް އިއުލާން ކުރައްވައިފަ އެވެ. މޮރީނިއޯ އަކީ ދުނިޔޭގައި ހުރި އެންމެ މޮޅު އަދި އެންމެ ރަނގަޅު އެއް ކޯޗު ކަމަށާއި، އަލުން ރެއާލްއާ މޮރީނިއޯ ހަވާލު ވާނެ ކަމަށެވެ. ޕެރޭޒް ވިދާޅުވީ އޭނާ ރައީސް ކަމުގައި ހުންނަވައިގެން، އަބަދު ވެސް މަސައްކަތް ކުރައްވާނީ ރެއާލްގެ ކުރިއެރުމާއި ކާމިޔާބަށް ކަމަށެވެ. 

އިތުރަށް ޕެރޭޒް ވިދާޅުވީ އޭނާއާ އިދިކޮޅަށް ވޯޓު ދެއްވި މެމްބަރުންގެ ކަންބޮޑުވުން ތަކެއް ހުރި ކަމަށާއި، އެކަންކަން ޙައްލު ކުރުމަށް މަސައްކަތް ކުރައްވާނެ ކަމަށެވެ. ރެއާލް އަކީ އެންމެންގެ ވެސް ކުލަބު ކަމަށާއި، ރެއާލްގެ ކުރިއެރުމަކީ އެންމެން ވެސް ބޭނުންވާނެ ގޮތް ކަމަށް ޕެރޭޒް ވިދާޅުވި އެވެ.