ރެއާލް އިން އެސްޕަންޔޯލް ބަލިކޮށްފި، ބާސެލޯނާ އަށް އިތުރު އިންތިޒާރެއް

ސްޕެނިޝް ލީގުގައި އެސްޕަންޔޯލްއާ ދެކޮޅަށް ކުޅުނު މެޗުން ރެއާލް މެޑްރިޑް މޮޅުވުމާ އެކު، ލީގުގެ ޗެމްޕިއަންކަން ޔަޤީން ކުރުމަށް ބާސެލޯނާ އަށް އިތުރު އިންތިޒާރެއް ކުރަން ޖެހިއްޖެ އެވެ.

އާދީއްތަ ދުވަހުގެ ރޭ ދަންވަރު އެސްޕަންޔޯލްގެ ދަނޑުގައި ކުޅުނު މެޗު ރެއާލް އިން ކާމިޔާބު ކޮށްފައި ވަނީ 2-0 އިންނެވެ. މެޗުގައި ރެއާލް އިން އެ ޓީމުގެ ދެ ލަނޑު ވެސް ޖެހީ ދެ ވަނަ ހާފުގަ އެވެ. އެސްޕަންޔޯލްއާ ދެކޮޅަށް ކުޅުނު މެޗުން ރެއާލް މޮޅުނުވި ނަމަ، ބާސެލޯނާ އަށް ލީގުގެ ޗެމްޕިއަންކަން ޔަޤީން ކުރެވުނީހެ އެވެ.

މެޗުގެ ފުރަތަމަ ހާފުގައި ވެސް ރެއާލް އިން ވަނީ ލަނޑު ޖަހަން ފުރުސަތު ތަކެއް ހޯދައިފަ އެވެ. މެޗުގެ ދެ ވަނަ ހާާފު ފަށައިގެން ދިހަ ވަނަ މިނެޓުގައި ރެއާލް އަށް ލީޑު ނަގައިދިނީ ވިނީޝިއުސް ޖޫނިއާ އެވެ. އެ ލަނޑު ޖަހަން ވިނީޝިއުސް އަށް ފުރުސަތު ތަނަވަަސްކޮށްދިނީ ގޮންޒާލޯ ގާސިއާ އެވެ. އޭގެ ފަހުން މެޗުގެ 66 ވަނަ މިނެޓުގައި ވިނީޝިއުސް ވަނީ ރެއާލްގެ ދެ ވަނަ ލަނޑު ޖަހައި ލީޑު ފުޅާ ކޮށްފަ އެވެ. އެއީ ޖޫޑް ބެލިންހަމް ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ.

މެޗުން މޮޅުވެ ރެއާލް ދެ ވަނައިގައި އޮތީ މިހާތަނަށް ލީގުގައި ކުޅެފައިވާ 34 މެޗުން 77 ޕޮއިންޓާ އެކު އެވެ. ހަމަ އެ އަދަދަަށް މެޗު ކުޅެގެން އެއް ވަަނައިގައި ބާސެލޯނާ އަށް ލިބެނީ 88 ޕޮއިންޓެވެ. ލީގުގައި އަންނަ އާދީއްތަ ދުވަހުގެ ރޭ އަމިއްލަ ދަނޑުގައި ރެއާލްއާ ދެކޮޅަށް ކުޅޭ މެޗުން ބަލި ނުވެ ފަރުޖައްސާލައިގެން ބާސެލޯނާ އަށް ލީގުގެ ޗެމްޕިއަންކަން ކަށަވަރު ކުރެވޭނެ އެވެ.