ރެއާލްގެ ކޯޗަކަށް މޮރީނިއޯ ގެންނަން މަސައްކަތް ކުރަނީ

ސްޕެއިންގެ ރެއާލް މެޑްރިޑުގެ ކޯޗަކަށް، ޕޯޗުގަލްގެ ހޯސޭ މޮރީނިއޯ ގެންނަން މަސައްކަތް ކުރަމުން އަންނަ ކަމަށް މީޑިއާ ތަކުގައި ރިޕޯޓު ކޮށްފި އެވެ. 

ރެއާލްގެ ކޯޗުކަމުގައި ހުރި ޒަބީ އަލޮންސޯ މަގާމުން ވަކި ކުރުމަށް ފަހު، އެ މަގާމަށް ހަމަޖައްސާފައި ވަނީ އަލްވާރޯ އާބެލޯ އެވެ. ނަމަވެސް، އަންނަ ސީޒަންގައި އޭނާ ރެއާލްގައި ނުހުންނާނެ ކަމަށާއި، ރެއާލް އިން އައު ކޯޗެއް ހޯދާނެ ވާހަކަ މީޑިއާ ތަކުގައި ވަނީ ރިޕޯޓު ކޮށްފަ އެވެ.

ސްޕެއިންގެ މީޑިއާ ތަކުގައި ބުނެފައިވާ ގޮތުން، ރެއާލް އިން މިހާރު އަންނަނީ އެ ކުލަބުގެ ކޯޗަކަށް މޮރީނިއޯ ހަމަޖެއްސުމަށް މަސައްކަތް ކުރަމުންނެވެ. އެގޮތުން، އެކަމާ ގުޅުންހުރި މަޝްވަރާތައް ސީދާ މޮރީނިއޯގެ އެޖެންޓާ އެކު ކުރަމުން އަންނަ ކަމަށް ބުނެފައިވެ އެވެ. 

މީގެ އިތުރުން މީޑިއާ ތަކުގައި ބުނެފައި ވަނީ، މޮރީނިއޯ މިހާރު އިރުޝާދު ދެމުން އަންނަ ބެންފީކާ އިން އޮތީ އޭނާ ދޫކޮށްލާ ގޮތަކަށް ނޫނެވެ. ބެންފީކާ އިން މޮރީނިއޯ ބަހައްޓަން ބޭނުންވި ނަމަވެސް، ރެއާލް އިން ބޭނުންވާ ނަމަ މޮރީނިއޯ އެ ކުލަބާ ހަވާލުވާނެ ކަމަށް ވެސް މީޑިއާ ތަކުގައި ބުނެފައިވެ އެވެ. 

އުމުރުން 63 އަހަރުގެ މޮރީނިއޯ ވަނީ މީގެ ކުރިން ވެސް ރެއާލް އަށް އިރުޝާދު ދީފަ އެވެ. އެގޮތުން 2010 ވަނަ އަހަރުން ފެށިގެން، 2013 ވަނަ އަހަރަށް އޭނާ ވަނީ ރެއާލް އަށް އިރުޝާދު ދީފަ އެވެ. މޮރީނިއޯގެ އިރުޝާދުގެ ދަށުން ރެއާލް އިން 178 މެޗު ކުޅެފައިވާއިރު، 127 މެޗުން ވަނީ މޮޅުވެފަ އެވެ. 23 މެޗަކުން ބަލިވެފައިވާއިރު، 28 މެޗެއް ނިމުނީ އެއްވަރު ވެގެންނެވެ. އޭނާގެ އިރުޝާދުގެ ދަށުން ރެއާލް އިން ވަނީ ތިން ތައްޓެއް ވެސް ކާމިޔާބު ކޮށްފަ އެވެ.

ބެންފީކާ އިން ކޯޗިން ކެރިއަރު ފެށި މޮރީނިއޯ އަކީ، ދުނިޔޭގައި ތިބި އެންމެ މޮޅު ކޯޗުންގެ ތެރޭގައި ފާހަގަ ކޮށްލެވޭ މީހެކެވެ. އޭނާ ވަނީ ގިނަ ކުލަބު ތަކެއްގައި މަސައްކަތް ކޮށްފަ އެވެ. ބެންފީކާ އާއި ރެއާލްގެ އިތުރުން މޮރީނިއޯ ވަނީ. އިންޓަރ މިލާން، މެންޗެސްޓަރ ޔުނައިޓެޑު، ޓޮޓެންހަމް އަދި ރޯމާ އަށް ވެސް އިރުޝާދު ދީފަ އެވެ.