ބަޔާން ވަރުގަދަ، ރެއާލް އޮތީ މޮޅުވުމުގެ އަޒުމުގައި އެކަނި

ޔުއެފާ ޗެމްޕިއަންސް ލީގުގެ ކުއާޓާ ފައިނަލްގެ ފުރަތަމަ ލެގުގައި ޖަރުމަނުގެ ބަޔާން މިއުނިކްއާ ދެކޮޅަށް ނިކުންނައިރު، އެ ޓީމަކީ ވަރުގަދަ ޓީމެއްކަން އިނގޭ ކަމަށް ރެއާލް މެޑްރިޑުގެ ކޯޗު އަލްވާރޯ އާބެލޯ ބުނެފި އެވެ.

މުބާރާތުގެ ކުއާޓާ ފައިނަލްގެ ފުރަތަމަ ލެގުގައި މި ދެ ޓީމު ބައްދަލު ކުރާ މެޗު އޮތީ ރެއާލްގެ އަމިއްލަ ދަނޑުގަ އެވެ. އެ މެޗުގެ ކުރިން އޮތް ނޫސްވެރިންގެ ބައްދަލުވުމުގައި ވާހަކަ ދައްކަމުން އާބެލޯ ބުނީ، އޭނާ ބޭނުންވަނީ އިދިކޮޅު ވަރުގަދަ ޓީމުތަކާ ދެކޮޅަށް މީގެ ކުރިން ފެނިފައިވާ ރެއާލް ފެންނަން ކަމަށެވެ. ހުރިހާ ގޮތަކުން ބަލާއިރު ވެސް، ބަޔާން އަކީ މި ސީޒަންގައި އެންމެ ރަނގަޅު ނަތީޖާ ނެރެމުން އަންނަ އެއް ޓީމު ކަަމަށް ވެސް އޭނާ ބުންޏެވެ. 

މީގެ އިތުރުން އާބެލޯ ބުނީ، މާޒީ އަށް ބަލާއިރު ބަޔާންއާ ދެކޮޅަށް ކުޅެފައިވާ މެޗުތައް ހަނދާން އެބަހުރި ކަމަށެވެ. ޚާއްސަކޮށް އެއީ ވަރަށް ބޮޑު ޗެލެންޖެއްކަން އިނގޭ ކަމަށް ވެސް އޭނާ ބުންޏެވެ. ބަޔާންއާ ދެކޮޅަށް ނިކުތުމަކީ ރެއާލް އަށް ޚާއްސަ ކަމެއް ކަމަށާއި، ރެއާލްގެ އަމިއްލަ ދަނޑުގައި ޗެމްޕިއަންސް ލީގުގެ ވާދަވެރި މެޗެއް އަނެއްކާ ވެސް ތަޖުރިބާ ކުރެވޭނެ ކަމަށް އާބެލޯ ބުންޏެވެ. ޚާއްސަކޮށް އެންމެ ފަހުން މެންޗެސްޓަރ ސިޓީއާ ދެކޮޅަށް ކުޅުނު ކަހަލަ ވާދަވެރި މެޗެއް އަލުން ތަކުރާރު ވާނެ ކަމަށް އޭނާ ވަނީ ބުނެފަ އެވެ.

އިތުރަށް ވާހަކަ ދައްކަމުން އާބެލޯ ބުނީ މުބާރާތުގެ ނޮކްއައުޓް ބުރުން މޮޅު ނުވެ، ކެޓުމާ މެދު ރެއާލް އިން ނުވިސްނާ ކަމަަށެވެ. ނަމަވެސް، ނޫސްވެރިންނާއި އެހެން ފަރާތްތަކުން ވެސް އެކި ޙާލަތްތައް ވަޒަން ކުރާނެކަން އިނގޭ ކަމަށް ފާހަގަކޮށް އާބެލޯ ބުނީ، ރެއާލް އަށް އޮތީ އެންމެ ޙާލަތެއް ކަމަށެވެ. އެއީ ކުއާޓާ ފައިނަލްގައި ބަޔާން ބަލިކޮށް، މުބާރާތުގެ ސެމީ ފައިނަލްގެ ޖާގަ ހޯދުން ކަމަށް އާބެލޯ ބުނެފައިވެ އެވެ. އެއާ އެކު އޭނާ ބުނީ ރެއާލްގެ ކުޅުންތެރިންނަށް އިތުބާރު އޮތް ކަމަށާއި، ކުޅުންތެރިން ނަތީޖާ ނެރޭނެ ކަމުގެ ފުރިހަމަ ޔަޤީންކަން އޮތް ކަމަށެވެ. 

އަންގާރަ ދުވަހުގެ ރޭ ރެއާލް އާއި ބަޔާން ބައްދަލު ކުރާ މެޗު ފަށާނީ ރާއްޖެ ގަޑިން ދަންވަރު 12 ޖަހާއިރު އެވެ.