ރެއާލް ބަލިކޮށް، ބާސެލޯނާ އިން ސްޕެނިޝް ލީގުގެ ޗެމްޕިއަންކަން ދިފާއު ކޮށްފި

ސްޕެނިޝް ލީގުގައި ވާދަވެރި ރެއާލް މެޑްރިޑާ ދެކޮޅަށް ކުޅުނު މެޗުން މޮޅުވެ، އެންމެ ފަހުގެ ޗެމްޕިއަން ބާސެލޯނާ އިން ލީގު ދިފާއު ކޮށްފި އެވެ.

ބާސެލޯނާ އިން ލީގުގެ ޗެމްޕިއަންކަން ކަށަވަރު ކޮށްފައި ވަނީ އާދީއްތަ ދުވަހުގެ ރޭ ކުޅުނު މެޗުން މޮޅުވެގެންނެވެ. ބާސެލޯނާގެ އަމިއްލަ ދަނޑުގައި ކުޅުނު މެޗު އެ ޓީމުން ކާމިޔާބު ކުރީ 2-0 އިންނެވެ. މެޗުގައި ބާސެލޯނާ އިން އެ ޓީމުގެ ދެ ލަނޑު ވެސް ޖެހީ މެޗުގެ ފުރަތަމަ ހާފުގަ އެވެ.

މެޗު ފަށައިގެން ނުވަ ވަނަ މިނެޓުގައި ބާސެލޯނާ އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު ބާސެލޯނާ އަށް ޖަހައިދިނީ މާކަސް ރަޝްފޯޑް އެވެ. އޭގެ ނުވަ މިނެޓު ފަހުން ފެރާން ޓޮރޭސް ވަނީ ބާސެލޯނާގެ ދެ ވަނަ ލަނޑު ޖަހައި ލީޑު ފުޅާ ކޮށްފަ އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ ޑެނީ އޮލްމޯ އެވެ. މީގެ އިތުރުން ވެސް މެޗުގައި ރަނގަޅަށް ކުޅެ އިތުރު ލަނޑު ޖަހާނެ ފުރުސަތު ތަކެއް ބާސެލޯނާ އިން ވަނީ ހޯދައިފަ އެެވެ.

މޮޅާއެކު ބާސެލޯނާ އިން ސްޕެނިޝް ލީގު ކާމިޔާބު ކުރީ މިހާތަނަށް އެ ޓީމު ކުޅެފައިވާ 35 މެޗުން 91 ޕޮއިންޓާ އެކު އެވެ. ހަމަ އެ އަދަދަށް މެޗު ކުޅެގެން ދެ ވަަނައިގައި ރެއާލް އަށް ލިބެނީ 77 ޕޮއިންޓެވެ. ލީގުގައި ބާސެލޯނާ އަށް ބާކީ ތިން މެޗު އޮތްއިރު، ތިން މެޗުން މޮޅުވެ 100 ޕޮއިންޓު ހަމަ ކުރުމުގެ ފުރުސަތު ވެސް އެ ޓީމަށް އެބަ އޮތެވެ.

މިއީ ބާސެލޯނާ އިން ސްޕެނިޝް ލީގު ކާމިޔާބު ކުރި 29 ވަނަ ފަހަރެވެ. މިދިޔަ ސީޒަންގައި ވެސް ބާސެލޯނާ އިން ސްޕެނިޝް ލީގު ކާމިޔާބު ކޮށްފައިވާއިރު، މިއީ ހަންސީ ފްލިކްގެ އިރުޝާދުގެ ދަށުން ބާސެލޯނާ އިން ސްޕެނިޝް ލީގު ކާމިޔާބު ކުރި ދެ ވަނަ ފަހަރެވެ.