ރެލިގޭޝަންގެ ބިރުވެރި ކަމުގައި އޮތް މަޔޯކާ އިން، ފަހު ވަގުތު ރެއާލް ބަލިކޮށްފި

ސްޕެނިޝް ލީގުގައި މަޔޯކާއާ ދެކޮޅަށް ކުޅުނު މެޗުން ފަހު ވަގުތު ބަލިވެ، ރެއާލް މެޑްރިޑް އިން ފަރަގު ކުޑަ ކުރުމަށް ލިބުނު ފުރުސަތު ގެއްލުވާލައިފި އެވެ. 

މަޔޯކާގެ އަމިއްލަ ދަނޑުގައި ހޮނިހިރު ދުވަހުގެ ރޭ ކުޅުނު މެޗުގައި އެ ޓީމުން ވަނީ 2-1 އިން ވަނީ ރެއާލް ބަލިކޮށްފަ އެވެ. މެެޗުގައި މަޔޯކާ އިން ލަނޑު ޖަހައި ކުރި ހޯދާފައި ވަނިކޮށް، ރެއާލް އިން ނަތީޖާ ހަމަހަމަ ވެސް ކުރި އެވެ. ނަމަވެސް މެޗުގެ ފަހު ވަގުތުގައި ލަނޑު ޖަހައިގެން މަޔޯކާ ވަނީ މެޗުން މޮޅުވެފަ އެވެ.

މެޗުގެ ފުރަތަމަ ހާފުގެ 41 ވަނަ މިނެޓުގައި މަޔޯކާ އިން ވަނީ ލަނޑު ޖަހައި ލީޑު ނަަގައިފަ އެވެ. އެ ލަނޑު އެ ޓީމަށް ޖަހައިދިނީ މަނޫ މޮލާންސް އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ ]ޕަބްލޯ މަފެއޯ އެވެ.

އޭގެ ފަހުން މެޗުގެ ފުރިހަމަ ވަގުތު ހަަމަވާން ދެ މިނެޓަށް ވެފައި ވަނިކޮށް، ރެއާލް އަށް ނަތީޖާ ހަމަހަމަ ކޮށްދިނީ އެޑާ މިލިޓާއޯ އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ ޓްރެންޓް އެލެގްޒެންޑާ އާނޯލްޑް އެވެ. ނަމަވެސް، މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި ވެޑާޓް މުރީގީ ވަނީ ލަނޑު ޖަހައި މަޔޯކާ މޮޅު ކޮށްދީފަ އެވެ.

މަޔޯކާ އަތުން ބަލިވެ ރެއާލް އިން ފުރުސަތު ނަގާލިއިރު، އެ ޓީމު ދެ ވަނައިގައި އޮތީ މިހާތަނަށް ކުޅެފައިވާ 30 މެޗުން 69 ޕޮއިންޓާ އެކު އެވެ.