އެއްބަސްވުން ހަމަވުމުން، ރެއާލް ދޫކޮށްލަން އަލަބާ ނިންމައިފި

ސްޕެއިންގެ ރެއާލް މެޑްރިޑާ އެކު ސޮއި ކޮށްފައިވާ އެއްބަސްވުމުގެ މުއްދަތު ހަމަވުމާ އެކު، އެ ކުލަބު ދޫކޮށްލަން ޑޭވިޑް އަލަބާ ނިންމައިފި އެވެ.

އުމުރުން 33 އަހަރުގެ ޑިފެންޑަރު ރެއާލް އަށް ބަދަލުވީ 2021 ވަނަ އަހަރު އެވެ. ރެއާލް އާއެކު އޭނާ ސޮއި ކޮށްފައިވާ ފަސް އަހަރު ދުވަހުގެ އެއްބަސްވުމުގެ މުއްދަތު ހަމަވާނީ އަންނަ ޖޫން މަހުގެ ނިޔަލަށެވެ. ނަމަވެސް، އެއްބަސްވުން އައު ކުރުމުގެ ބަދަލުގައި އަލަބާ ނިންމާފައި ވަނީ ރެއާލް ދޫކޮށްލުމަށެވެ. އަލަބާ ރެއާލް ދޫކޮށްލަން އުޅޭ ވާހަކަ މީގެ ކުރިން ވެސް މީޑިއާ ތަކުގައި ވަނީ ރިޕޯޓު ކޮށްފަ އެވެ. 

ރެއާލް ދޫކޮށްލުމަށް ފަހު އަލަބާ ބަދަލު ވާނެ ކުލަބެއް ހާމަ ކޮށްފައި ނުވި ނަމަވެސް، ބައެއް ކުލަބު ތަކުން އަންނަނީ އޭނާ ހޯދުމަށް މަސައްކަތް ކުރަމުންނެވެ. ބައެއް މީޑިއާ ތަކުގައި ބުނެފައިވާ ގޮތުން އިޓަލީގެ އޭސީ މިލާން އާއި ޔުވެންޓަސް އިން އަންނަނީ އަލަބާ ހޯދުމަށް މަސައްކަތް ކުރަމުންނެވެ. އޭގެ އިތުރުން ރެޑް ބުލް ސަލްސްބާގް އިން ވެސް އޭނާ އަށް ޝައުޤުވެރިވާ ކަމަށް ރިޕޯޓުތައް ބުނެ އެވެ.

ރެއާލް އިން ވަނީ އަލަބާ އެ ކުލަބު ދޫކޮށްލާ ކަމަށް ހާމަ ކޮށްފަ އެވެ. ރެއާލް އިން ބުނެފައި ވަނީ، އެ ކުލަބުގެ ތާރީޚުގައި ވެސް އެންމެ ކާމިޔާބު އެއް ދުވަސްވަރު އެ ޓީމުގައި ހިމެނުނު އަަލަބާ އަށް އޮތީ ޝުކުރާއި ލޯބި ކަމަށެވެ. ރެއާލްގެ ރައީސް ފްލޮރެންޓީނޯ ޕެރޭޒް ވިދާޅުވީ، އަލަބާ އަކީ ޚިދުމަތްތެރިކަމާއި، ބުރަ މަސައްކަތް އަދި ކާާމިޔާބީގެ އުފާ ފާޅު ކުރުމުގެ ނަމޫނާއެއް ކަމަށެވެ. 

އަލަބާ ވަނީ ރެއާލްގައި ހޭދަ ކުރި ފަސް ސީޒަންގެ ތެރޭގައި އެ ޓީމަށް 131 މެޗު ކުޅެދީ ފަސް ލަނޑު ޖަހައިފަ އެވެ. ރެއާލް އާއެކު އޭނާ ވަނީ ނުވަ ތައްޓެއް ވެސް ކާމިޔާބު ކޮށްފަ އެވެ. އޭގެ ތެރޭގައި ސްޕެނިޝް ލީގު ދެ ފަހަރު ކާމިޔާބު ކުރުމުގެ އިތުރުން، ކޮޕާ ޑެލް ރޭ އާއި، ސްޕެނިޝް ސުޕަ ކަޕްގެ އިތުރުން ޔުއެފާ ޗެމްޕިއަންސް ލީގު ދެ ފަހަރު ކާމިޔާބު ކުރުން ހިމެނެ އެވެ. އޭގެ އިތުރުން ޔުއެފާ ސުޕަ ކަޕް އާއި، ފީފާ ކުލަބު ވޯލްޑް ކަޕް އަދި ފީފާ އިންޓަކޮންޓިނެންޓަލް ކަޕް ކާމިޔާބު ކުރުން ހިމެނެ އެވެ.

އަލަބާ އަކީ އޮސްޓްރިއާގެ ޤައުމީ ޓީމުގައި ވެސް ހިމެނޭ ކުޅުންތެރިޔެކެވެ. އޭނާ ވަނީ ޤައުމީ ޓީމަށް ކުޅެދީފައިވާ 111 މެޗުގައި 15 ލަނޑު ޖަހައިފަ އެވެ.