ރެއާލް ބަލިކޮށް، ބަޔާން އިން ސެމީ ފައިނަލްގެ ފުރުސަތު ބޮޑު ކޮށްފި

ޔުއެފާ ޗެމްޕިއަންސް ލީގުގެ ކުއާޓާ ފައިނަލްގެ ފުރަތަމަ ލެގުގައި ސްޕެއިންގެ ރެއާލް މެޑްރިޑް ބަލިކޮށް، ޖަރުމަނުގެ ބަޔާން މިއުނިކް އިން މުބާރާތުގެ ސެމީ ފައިނަލްގެ ފުރުސަތު ބޮޑު ކޮށްފި އެވެ.

ރެއާލްގެ އަމިއްލަ ދަނޑުގައި އަންގާރަ ދުވަހުގެ ރޭ ކުޅުނު ފުރަތަމަ ލެގު ބަޔާން އިން ކާމިޔާބު ކުރީ 2-1 އިންނެވެ. މެޗުގެ ފުރަތަމަ ހާފުގައި ބަޔާން އިން އެއް ލަނޑު ޖެހިއިރު، އަނެއް ލަނޑު އެ ޓީމުން ޖެހީ ދެ ވަނަ ހާފުގަ އެވެ. މެޗުގައި ރެއާލް އިން އެ ޓީމުގެ ހަމައެކަނި ލަނޑު ވެސް ޖެހީ ދެ ވަނަ ހާފުގަ އެވެ.

މެޗު ފަށައިގެން ބަޔާން އިން ވަނީ ރަނގަޅަށް ކުޅެ ރެއާލް ކޮޅަށް ލަނޑު ޖަހަން މަސައްކަތް ކޮށްފަ އެވެ. އެގޮތުން މެޗުގެ ފުރަތަމަ ހާފުގެ ފުރިހަމަ ވަގުތު ހަމަވާން ހަތަރު މިނެޓަށް ވެފައި ވަނިކޮށް، ބަޔާން އަށް ލީޑު ނަގައިދިނީ ލުއިސް ޑިއާޒް އެވެ، އެ ލަނޑު ޖަހަން ޑިއާޒް އަށް ފުރުސަތު ތަނަވަސްކޮށްދިނީ ސާޖް ގްނަބްރީ އެވެ.

މެޗުގެ ދެ ވަނަ ހާފު ފަށައިގެން ފުރަތަމަ މިނެޓުގައި ބަޔާން އިން ވަނީ ދެ ވަނަ ލަނޑެއް ޖަހައި ލީޑު ފުޅާ ކޮށްފަ އެވެ. އެ ލަނޑު ބަޔާން އަށް ޖަހައިދިނީ އިންގްލެންޑުގެ ކެޕްޓަން ހެރީ ކޭން އެވެ. އެއީ މައިކަލް އޮލައިސޭ ތަނަވަސްކޮށްދިން ފުރުސަތެއްގައި ކޭން ޖެހި ލަނޑެކެވެ. ބަޔާން އިން ދެ ލަނޑު ޖެހި ފަހުން، މެޗުގައި ރެއާލްގެ ހަމައެކަނި ލަނޑު 74 ވަނަ މިނެޓުގައި ޖެހީ ފްރާންސްގެ ކެޕްޓަން ކީލިއަން އެމްބާޕޭ އެވެ. އެއީ ޓްރެންޓް އެލެގްޒެންޑާ އާނޯލްޑް ތަނަވަސްކޮށްދިން ފުރުސަތެއްގައި އެމްބާޕޭ ޖެހި ލަނޑެކެވެ.

މި މޮޅާއެކު ބަޔާން އިން ސެމީ ފައިނަލްގެ ފުރުސަތު ބޮޑު ކޮށްފައިވާއިރު، މި ދެ ޓީމު ބައްދަލު ކުރާ ދެ ވަނަ ލެގު އޮތީ އަންނަ ހަފުތާގައި ބަޔާންގެ އަމިއްލަ ދަނޑުގަ އެވެ. އެ މެޗުން ބަލި ނުވެ ފަރުޖައްސާލައިގެން ބަޔާން އަށް މުބާރާތުގެ ސެމީ ފައިނަލްގެ ޖާގަ ކަށަވަރު ކުރެވޭނެ އެވެ. ސެމީ ފައިނަލްގެ ފުރުސަތު ބޭނުންވާ ނަމަ، ރެއާލް އަށް ޖެހޭނީ ދެ ލަނޑުގެ ތަފާތުން ބަޔާން ބަލި ކުރާށެވެ.