ހޮރްމޫޒް ކަނޑުއޮޅިން ދަތުރު ކުރުމުގެ ފުރުސަތު ދިނުމާ އެކު، އިރާގުގެ ޝުކުރު އީރާން އަށް

އިރާގުގެ ތެޔޮ ޓޭންކަރު ތަކަށް ހޮރްމޫޒް ކަނޑު އޮޅިން ދަތުރު ކުރުމުގެ ފުރުސަތު އީރާން އިން ދީފައިވާތީ، އިރާގުގެ ސަރުކާާރުން އެކަމަށް ޝުކުރު އަދާ ކޮށްފި އެވެ. 

އިރާގުގެ ފޮރިން މިނިސްޓްރީ އިން ނެރެފައިވާ ބަޔާނެއްގައި ބުނެފައި ވަނީ، އެ ޤައުމުގެ ފޮރިން މިނިސްޓަރު ފުއާދު ޙުސެއިން އެކަމަށް ޝުކުރު އަދާ ކުރެއްވީ އީރާން އިން އިރާގަށް ކަނޑައަޅުއްވާފައި ހުންނަވާ ސަފީރު މުޙައްމަދު ކާޒިމް އަލް ޞާދިޤާ އެކު ބޭއްވެވި ބައްދަލުވުމެއްގައި ކަމަށެވެ. މި ބައްދަލުވުމުގައި ދެ ޤައުމުގެ ދެ މެދުގައި އޮތް ގުޅުމާއި، ސަރަހައްދީ މަސްލަޙަތާ ގުޅޭ ގޮތުން ފުޅާ ދާއިރާއެއްގައި މަޝްވަރާ ކުރެވުނު ކަމަށް ވެސް ބުނެފައިވެ އެވެ. 

މި ބައްދަލުވުމުގައި ވާހަކަ ދައްކަވަމުން ފޮރިން މިނިސްޓަރު ފުއާދު ޙުސެއިން ވަނީ، ހޮރްމޫޒް ކަނޑު އޮޅިން އިރާގުގެ ތެޔޮ ޓޭންކަރު ތަކަށް ރައްކާތެރިކަމާ އެކު ދަތުރު ކުރުމުގެ މަގު ފަހި ކޮށްދިނުމަކީ، އިރާގުގެ އިޤްތިޞާދަށް ލިބުނު ވަރަށް ބޮޑު އެހީތެރި ކަމެއްކަން ފާހަގަ ކުރައްވާފައި އެވެ. ދުނިޔޭގެ ބާޒާރަށް ތެޔޮ ބޭރު ކުރުމުގައި ހޮރްމޫޒް ކަނޑު އޮޅި އަކީ އިރާގަށް ނުހަނު މުހިންމު ސަރަހައްދެކެވެ. 

މީޣެ އިތުރުން ސަރަހައްދީ ހަމަޖެހުމާ ގުޅޭ ގޮތުން ވާހަކަ ދައްކަވަމުން ފުއާދު ޙުސެއިން ވަނީ، އިރާގުގެ ޚާރިޖީ ސިޔާސަތު އަލުން ތަކުރާރު ވެސް ކުރައްވައިފަ އެވެ. އެގޮތުން ހަނގުރާމަ އާއި ހަމަ ނުޖެހުން ތަކަށް އިރާގުން އަބަދު ވެސް ދެކޮޅު ހަދާ ކަމަށާއި، ކޮންމެ މައްސަލައެއްގައި ވެސް އިރާގުން އިސްކަން ދެނީ ސުލްޙަވެރިކަމާ އެކު މަޝްވަރާގެ އުސޫލުން ކަންކަން ހައްލު ކުރުމަށް ކަމަށް އޭނާ ވިދާޅުވި އެވެ. 

މި ބައްދަލުވުމުގައި އީރާންގެ ސަފީރު ވަނީ ދެ ޤައުމުގެ ދެ މެދުގައި އޮތް ގާތް ގުޅުން އިތުރަށް ޚަރުދަނާ ކުރުމަށް މަސައްކަތް ކުރައްވާނެ ކަމުގެ ޔަޤީންކަން ދެއްވައިފަ އެވެ. އަދި ސަރަހައްދީ ރައްކާތެރިކަމާއި، އިޤްތިޞާދީ ކުރިއެރުމަށް ދެ ޤައުމު ގުޅިގެން މަސައްކަތް ކުރުމުގެ މުހިންމުކަން ދެ ބޭފުޅުން ވެސް ފާހަގަ ކުރެއްވި އެވެ. 

އިރާގަކީ އޯޕެކްގެ ދެ ވަނަ އަށް އެންމެ ގިނައިން ތެޔޮ އުފައްދާ ޤައުމު ކަމަށްވާއިރު، އެ ޤައުމުގެ އާމްދަނީގެ ބޮޑު ބައެއް ބިނާވެފައި ވަނީ ތެޔޮ އެކްސްޕޯޓު ކުރުމުގެ މައްޗަށެވެ. އެހެންކަމުން ހޮރްމޫޒް ކަނޑު އޮޅި ފަދަ މުހިންމު ކަނޑުގެ މަގުތައް ބޭނުން ކުރުމުގައި ލިބޭ ލުއި ފަސޭހަ ތަކަކީ އެ ޤައުމުގެ އިޤްތިޞާދީ ދެމެހެއްޓެނިވި ކަމަށް ކޮންމެހެން ބޭނުންތެރި ކަމެކެވެ.