ބޮސްނިއާ އަތުން ބަލިވެ، އިޓަލީ އަށް ވޯލްޑް ކަޕްގެ ފުރުސަތު މިފަހަރު ވެސް ގެއްލިއްޖެ

ފީފާ ވޯލްޑް ކަޕް ކޮލިފިކޭޝަންގެ ޕްލޭ އޮފްގައި ބޮސްނިއާއާ ދެކޮޅަށް ކުޅުނު މެޗުން ބަލިވެ، އިޓަލީ އަށް މިފަހަރުގެ ފީފާ ވޯލްޑް ކަޕް އިން ވެސް ފުރުސަތު ގެއްލިއްޖެ އެވެ.

އަންގާރަ ދުވަހުގެ ރޭ ކުޅުނު ޕްލޭ އޮފްގެ މެޗުގައި ބޮސްނިއާ ވަނީ ޕެނަލްޓީ ޖަހައިގެން އިޓަލީ ބަލިކޮށްފަ އެވެ. މެޗުގައި އިޓަލީ އިން ލަނޑު ޖަހައި ކުރި ހޯދާފައި ވަނިކޮށް، ބޮސްނިއާ އިން ވަނީ ފަހަތުން އަރައި ލަނޑު ޖަހައިގެން ނަތީޖާ ހަމަހަމަ ކޮށްފަ އެވެ. އޭގެ ފަހުން 15 މިނެޓުގެ ދެ ހާފުގައި ވެސް އެއްވެސް ޓީމަކަށް ލަނޑެއް ނުޖެހުމުން، ނަތީޖާ ނެރުމަށް ޖެހީ ޕެނަލްޓީ އެވެ.

މެޗު ފަށައިގެން 15 ވަނަ މިނެޓުގައި އިޓަލީ އަށް ލީޑު ނަގައިދިނީ މޮއިސް ކީން އެވެ. އެއީ ނިކޮލޯ ބަރެއްލާ ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ. އޭގެ ފަހުން ފުރަތަމަ ހާާފުގެ ފަހު ވަގުތުގެ ތެރޭގައި އިޓަލީގެ އަލެސަންޑްރޯ ބަސްޓޯނީ އަށް ސީދާ ރަތް ކާޑު ދެއްކުމުން، މެޗުގެ ބާކީ ބައި އިޓަލީ އިން ކުޅުނީ އެއް ކުޅުންތެރިޔަކު މަދުކޮށެވެ.

މެޗުގެ ދެ ވަނަ ހާފުގެ 79 ވަނަ މިނެޓުގައި ބޮސްނިއާ އިން ވަނީ އިޓަލީ ކޮޅަށް ލަނޑު ޖަހައި ނަތީޖާ ހަމަހަމަ ކޮށްފަ އެވެ. އެ ލަނޑު ބޮސްނިއާ އަށް ޖަހައިދިނީ ހަރިސް ޓަބާކޮވިޗް އެވެ. އެއާ އެކު 15 މިނެޓުގެ ދެ ހާފުގައި ވެސް އިޓަލީ އަށް ލަނޑު ޖަހަން ފުރުސަތު ލިބުނުއިރު، ފުރުސަތުގެ ބޭނުމެއް ނުކުރެވުނެވެ.

ނަތީޖާ ނެރުމަށް ޖެހި ޕެނަލްޓީގައި ބޮސްނިއާ އިން ވަނީ ހަތަރު ޕެނަލްޓީ ވެސް ކާމިޔާބު ކޮށްފަ އެވެ. އިޓަލީ އަށް އެންމެ ޕެނަލްޓީއެއް ކާމިޔާބު ކުރެވުނުއިރު، އަނެއް ދެ ޕެނަލްޓީ ވަނީ ނާކާމިޔާބުވެފަ އެވެ. އެއާ އެކު އިޓަލީ އަށް ވޯލްޑް ކަޕްގެ ފުރުސަތު ގެއްލުނުއިރު، މިއީ އިޓަލީ އަށް ވޯލްޑް ކަޕްގެ ފުރުސަތު ޖެހި ޖެހިގެން ގެއްލުނު ތިން ވަނަ ފަހަރެވެ. 

2018 ވަނަ އަހަރު ރަޝިޔާގައި އޮތް ވޯލްޑް ކަޕާއި، 2022 ވަނަ އަހަރު ޤަތަރުގައި އޮތް ވޯލްޑް ކަޕްގެ ޖާގަ ވެސް އިޓަލީ އަށް ލިބިފައި ނުވެ އެވެ.