އިރާގުގެ އައު ބޮޑު ވަޒީރު އަލް ޒައިދީ ރަސްމީކޮށް މަގާމާ ހަވާލުވެ ވަޑައިގެންފި

އިރާގުގެ އައު ބޮޑު ވަޒީރުގެ މަގާމާ އަލީ އަލް ޒައިދީ ރަސްމީކޮށް ހަވާލުވެ ވަޑައިގެންެފި އެވެ.

އިރާގުގެ ވެރި ރަށް ބަޣްދާދުގައި ބޭއްވި ރަސްމިއްޔާތެއްގައި މަގާމުގެ މަސްއޫލިއްޔަތުތަކާ ހަވާލުވެ ވަޑައިގެންނެވުމަށް ފަހު، ޤައުމުގެ އިޤްތިޞާދީ އަދި މާލީ ދާއިރާ އަށް ބޮޑެތި އިސްލާޙު ތަކެއް ގެންނަވާނެ ކަމަށް އަލް ޒައިދީ ވަނީ ވައިދުވެ ވަޑައިގެންފަ އެވެ. 

އިރާގުގެ ބޮޑު ވަޒީރުގެ މަގާމުގެ ހުވާ އަލް ޒައިދީ ކުރެއްވި ނަަމަވެސް، އޭނާގެ ކެބިނެޓު އޮތީ މުޅިން ފުރިހަމަ ނުވެ އެވެ. އެގޮތުން ސަރުކާރުގެ އެންމެ މުހިންމު ދެ ވުޒާރާ ކަމަށްވާ، އިންޓީރިއާ މިނިސްޓްރީ އާއި، ޑިފެންސް މިނިސްޓްރީ އަށް އައްޔަން ކުރައްވާ މިނިސްޓަރުންނަށް އެ ޤައުމުގެ ޤާނޫނު ހަދާ މަޖިލީހުން އަދި ރުހުން ދީފައި ނުވެ އެވެ. 

އިރާގުގެ ޤާނޫނު ހަދާ މަޖިލީހުން ކެބިނެޓުގެ ބައެއް މިނިސްޓަރުންނަށް ރުހުން ދިނުން ލަސްވަމުން ދަނީ، ސިޔާސީ ޕާޓީ ތަކުގެ މެެދުގައި އުފެދިފައިވާ ޚިޔާލު ތަފާތުވުން ތަކުގެ ސަބަބުންނެވެ. މީގެ ސަބަބުން އައު ސަރުކާރުގެ ފުރިހަމަ ކެބިނެޓެއް އެކުލަވާލުމަށް އިތުރ ވަގުތު ނަގާނެ ކަމަށް ބެލެވެ އެވެ. 

އައު ބޮޑު ވަޒީރު ވިދާޅުވީ އޭނާގެ އެންމެ ބޮޑު އަމާޒަކީ ޤައުމުގެ މާލީ ނިޒާމު ޚަރުދަނާކޮށް، އިޤްތިޞާދީ ގޮތުން ރައްޔިތުންނަށް ކުރިމަތިވެފައިވާ ގޮންޖެހުން ތަކަށް ޙަލެއް ހޯދައި ދިނުން ކަމަށެވެ. އަދި ސަރުކާރުގެ ހިންގުން ޚަރުދަނާ ކުރުމަށްޓަކައި، ވީ އެންމެ އަވަހަަކަށް ކެބިނެޓުގެ ހުސްވެފައިވާ މަގާމު ތަކަށް ބޭފުޅުން އައްޔަން ކުރުމުގެ މަސައްކަތް ކުރިއަށް ދާނެ ކަމަށް ވެސް އަލް ޒައިދީ ވިދާޅުވި އެވެ. 

އިރާގަށް ކުރިމަތިވެފައިވާ ސިޔާސީ އަދި އިޤްޞާދީ ދަތި ޙާލަތުން ސަލާމަތް ކުރުމަށް އަލް ޒައިދީގެ ސަރުކާރަށް ބޮޑެތި ޕްރެޝަރު ތަކެއް ކުރިމަތިވާނެ ކަމަށް ތަޖުރިބާކާރުން ދެކެ އެވެ. ބައެއް ފަރާތް ތަކުން ދެކޭ ގޮތުގައި އިރާގުގެ އައު ސަރުކާރުން އެންމެ ބޮޑު އިސްކަމެއް ދޭނީ ޤައުމުގެ ދިފާއީ ނިޒާމު ވަރުގަދަ ކުރުމަށެވެ.