އީރާނަށް ހަމަލާ ދިނުމަށް އިރާގުގައި އިޒްރޭލުން ސިއްރު އަސްކަރީ މަރުކަޒެއް އޮޕަރޭޓް ކުރިކަން ފަޅާ އަރައިފި

އީރާނާއި އިޒްރޭލާ ދެމެދު ކުރި ހަނގުރާމައިގެ ތެރޭގައި، އިރާގުގެ ސަރަހައްދެއްގައި ގާއިމުކޮށްފައިވާ އިޒްރޭލުގެ ސިއްރު އަސްކަރީ މަރުކަޒެއް އެ ސަރަހައްދުގެ ކަންބަޅި ހުއިހައްޕާ މީހަކަށް ފެނި، އެކަން ފަޅާއަރާފައިވާ ކަމަށް އަލް އަރަބިއްޔާއަށް ލިބިފައިވާ އާ މައުލޫމާތުތަކުން ހާމަވެއްޖެއެވެ. މި މައުލޫމާތުތަކުން އިރާގުގެ ފަސްގަނޑުގައި އިޒްރޭލުގެ ސިފައިން ހަރަކާތްތެރިވި ގޮތުގެ ތަފްސީލުތައް ވަނީ އެނގިފައެވެ.

ސައުދީ އަރަބިއްޔާގެ ނޫހެއް ކަމަށްވާ އަލް އަރަބިއްޔާ އަށް މައުލޫމާތު ދިން ފަރާތްތަކުން ބުނި ގޮތުގައި، މާރިޗު މަހުގެ 3 ވަނަ ދުވަހު، އިރާގުގެ ހުޅަނގުން އަންބާރު ޕްރޮވިންސްގެ އަލް-ނުޚައިބް ސަހަރާގެ ދެކުނުން އޮންނަ ޝަނާނާ ސަރަހައްދަށް ކަންބަޅި ހުއިހައްޕާ މީހަކާއި އޭނާގެ ބޭބެ ދިޔައީ މުސަޅު ހިފުމަށެވެ.

ސަލާމަތީ ބާރުތަކަށް ބަޔާން ދެމުން، 2001 ވަނަ އަހަރު އުފަންވި އެ މީހާ ބުނި ގޮތުގައި، ސަހަރާގެ ތެރޭގައި އޭނާއާއި އޭނާގެ ބޭބެ ހަރަކާތްތެރިވަމުން ދަނިކޮށް ޑްރޯންއަކުން އެމީހުންނަށް ފާރަލަމުންދިޔަ މަންޒަރު ފެނުނެވެ. މުސަޅުތަކުގެ ފަހަތުން ދަނިކޮށް، އެމީހުންނަށް ދެވުނީ ކާކުކަން ނޭނގޭ ސަލާމަތީ ބާރުތަކެއް ގާއިމުވެ ތިބި ސަރަހައްދަކަށެވެ.

އެ ވަގުތު އެ ސިފައިން ތިބި ދިމާލުން، މަތި ހާމައަށް އޮތް އަސްކަރީ އުޅަނދެއް އެމީހުންނާ ދިމާލަށް އައެވެ.

އެ އުޅަނދުގައި ތިބީ ކާކީ ކުލައާއި ސަހަރާގެ ކުލަތަކާ ގުޅޭ އަސްކަރީ ޔުނިފޯމް ލައިގެން ތިބި ސިފައިންނެވެ. އޭގެ ތެރެއިން އެކަކު އުޅަނދުން ފައިބައިގެން އައިސް، ލެވަންޓައިން އަރަބި ބަހުރުވައިން (ޝާމް ކަރައިގެ ބަހުރުވައިން) އެމީހުންނާ ސުވާލުކުރިއެވެ. އެތައް މިނެޓެއް ވަންދެން ސުވާލުކުރުމަށްފަހު، އެ ސަރަހައްދުން ދިއުމަށާއި އަލުން އެނބުރި ނައުމަށް އޭނާ އަމުރުކުރިއެވެ. އަދި އެ ސަރަހައްދާ ކައިރިވާ ކޮންމެ މީހަކު މަރާލާނެ ކަމުގެ އިންޒާރުވެސް ދިނެވެ.

އެ ސަރަހައްދުގެ ސަލާމަތީ އިދާރާތަކަށް މި މައުލޫމާތު ދެމުން، ކަންބަޅި ހުއިހައްޕާ މީހާ ބުނި ގޮތުގައި، އެ ސަރަހައްދުގައި ބޮޑެތި މަތިންދާބޯޓުތަކާއި ކުދި މަތިންދާބޯޓުތައް ބިމަށް ޖައްސާފައި ހުއްޓާ އޭނާއަށް ފެނުނެވެ.

މައުލޫމާތު ދިން ފަރާތްތަކުން ބުނާ ގޮތުގައި، އެތަނުން ފެނުނީ "ޗިނޫކް" އަދި "ބްލެކް ހޯކް" މަރުކާގެ ހެލިކޮޕްޓަރުތަކެވެ. އެތަނުގައި އެފަދަ ފަސް ހެލިކޮޕްޓަރު އޮތް ކަމަށް ރިޕޯޓުތައް ބުނެއެވެ.

މާރިޗު މަހުގެ 5 ވަނަ ދުވަހު، ކަންބަޅި ހުއިހައްޕާ މީހާ ދިން ބަޔާނާ ގުޅިގެން ސަލާމަތީ ބާރުތަކުން އެ ސަރަހައްދު ތަހުގީގުކޮށް ބަލައި ފާސްކުރަން ފެށިއެވެ. އެ ވަގުތު އިޒްރޭލުގެ ސިފައިން ދިން ހަމަލާތަކެއްގައި، އިރާގުގެ ސަލާމަތީ ބާރުގެ މީހަކު މަރުވެ، އިތުރު ބަޔަކު ޒަހަމްވިއެވެ. އަދި ސަލާމަތީ ބާރުތަކުގެ ބައެއް އުޅަނދުތައްވެސް މި ހަމަލާގައި ވަނީ ހަލާކުވެފައެވެ.

ޖެހިގެން އައި މާރިޗު މަހުގެ 6 ވަނަ ދުވަހު، އަލް-ނުޚައިބް ޑިސްޓްރިކްޓް ޕޮލިސް ސްޓޭޝަނަށް ހާދީ އަލީ ހަތާލް ނަމަކަށް ކިޔާ މީހަކު އިތުރު މައްސަލައެއް ހުށަހެޅިއެވެ. އޭނާ ބުނި ގޮތުގައި، 1999 ވަނަ އަހަރު އުފަންވި އޭނާގެ ދަރިފުޅު އައްވާދު، ޝަނާނާ ސަރަހައްދުގައި އުޅެނިކޮށް އެމެރިކާ ސިފައިން ކަމަށް ބެލެވޭ ބަޔަކު ވަނީ ބަޑިޖަހައި މަރާލާފައެވެ. އަދި އޭނާގެ ދަރިފުޅު ދުއްވި  ޓޮޔޯޓާ އުޅަނދުވެސް ވަނީ އަންދާލާފައެވެ.

އިންޓެލިޖެންސް އަދި ތަހުގީގީ ހޯދުންތަކުން ފަހުން އެނގުނު ގޮތުގައި، އައްވާދު މަރާލާފައިވަނީ އިޒްރޭލު ސިފައިން ތިބި ކަމަށް ރިޕޯޓުކުރި ސަރަހައްދުންނެވެ. އެހެންކަމުން އޭނާ މަރާލީވެސް އެ ސަރަހައްދުގައި ތިބި އިޒްރޭލު ސިފައިން ކަމަށް ބެލެވެއެވެ.

މައުލޫމާތު ލިބިފައިވާ ގޮތުގައި، މި ހާދިސާތަކާ ގުޅިގެން، އަލް-ނުޚައިބް ސަހަރާގައި ތިބި އިޒްރޭލުގެ ސިފައިން އެ ސަރަހައްދުން ފޭބުން ވަނީ އަވަސްކޮށްފައެވެ.

މައުލޫމާތު ދިން ފަރާތްތަކުން އިތުރަށް ބުނި ގޮތުގައި، އިރާގުގެ ސަލާމަތީ ބާރުތަކަށް މި ސިފައިންގެ ހަރަކާތްތައް ދެނެގަނެވިފައި ނުވަނީ، ދާދިފަހުން ކުރި ހަނގުރާމައިގެ ތެރޭގައި ޑްރޯން ހަމަލާތަކެއް ދީ އިރާގުގެ ރޭޑާ ސިސްޓަމްތަކަށް އަމާޒުކޮށްފައިވާތީއެވެ.

ސަލާމަތީ މަސްދަރުތަކުން ބުނާ ގޮތުގައި، އެ ޑްރޯންތައް ފޮނުވާލާފައިވަނީ އިރާގުގެ އެތެރެއިންނެވެ. އެއީ އިރާގުގެ ރޭޑާ ސިސްޓަމްތަކުން އީރާނުގެ މިސައިލާއި ޑްރޯންތަކާ ބެހޭ މައުލޫމާތު އެމެރިކާ ސިފައިންނަށް ފޯރުކޮށްދޭ ކަމަށް ބައެއް ފަރާތްތަކަށް ގަބޫލުކުރެވޭތީއެވެ. މިކަމުގެ ސަބަބުން، ރޭޑާ ސިސްޓަމްތަކަށް ހަމަލާދީފާނެ ކަމުގެ ބިރަށްޓަކައި، އިރާގުގެ ސަލާމަތީ ބާރުތަކުން ވަނީ ހުރިހާ ރޭޑާ ސިސްޓަމްތަކެއް ނިއްވާލާފައެވެ. އެއީ އެ ސިސްޓަމްތަކަކީ ދައުލަތުން ބޮޑު ހޭދައެއް ކޮށްގެން ހޯދާފައިވާ ތަކެތި ކަމަށްވާތީއެވެ.