ކުރަފި ޕާޓީގެ ފުރަތަމަ މުޒާހަރާ ވެރި ރަށް ނިއު ދިއްލީގައި ބާއްވައިފި

އިންޑިއާގެ ވެރިކަން ބަދަލުކުރުމަށް ގޮވާލާ އޮންލައިން ހަރަކާތަކަށް ވެފައިވާ ކުރަފި ޕާޓީގެ އެތައް ސަތޭކަ ބަޔަކު ހޮނިހިރު ދުވަހު ޤައުމުގެ ވެރި ރަށް ނިއު ދިއްލީގައި އެއްވެ މުޒާހަރާ ކޮށް ފިއެވެ.

މިއީ ވަރަށް ގިނަ މީހުންގެ ތާއީދު ލިބިފައިވާ މި ސޯޝަލް މީޑިއާ ހަރަކާތް ފުރަތަމަ ފަހަރަށް މަގު މަތިން ފެނުނު ފަހަރެވެ.

ޤާނޫނު ހަދާ މަޖިލީހާ ކައިރީގައި ހުންނަ ޖަންތަރު މަންތަރު ސަރަހައްދުގައި ބޭއްވި މި މުޒާހަރާ އަކީ ވަރަށް ގިނަ ހަފުތާ ތަކެއް ވަންދެން ސޯޝަލް މީޑިއާގައި ވަރަށް ބޮޑަށް މަޝްހޫރުވެ، އެތައް މިލިއަން ބަޔަކު ފޮލޯކުރާ މި ހަރަކާތުގެ ފުރަތަމަ މުޒާހަރާ އެވެ. މި މުޒާހަރާގައި ބައިވެރިވީ އާންމުކޮށް އިންޑިއާގެ ޒުވާނުންނެވެ. މުޒާހަރާގެ ބައެއް ބައިވެރިން ތިބީ ކުރަފި ރަމްޒު ކޮށްދޭ މާސްކު އަޅައިގެންނެވެ. 

އޮންލައިން ހަރަކާތުގެ ފައުންޑަރު އަބްހިޖީތު ދިޕްކޭ، އެމެރިކާ އިން ހޮނިހިރު ދުވަހު ނިއު ދިއްލީ އަށް ވަޑައިގެން މި މުޒާހަރާގައި ބައިވެރިވި އެވެ. އޭނާ އެއާޕޯޓަށް ވަޑައިގަތް ވަގުތު، ފުލުހުން ވެސް ވަނީ އެ ސަރަހައްދުގައި ޙަރަކާތްތެރި ވެފައި އެވެ. 

ކުރަފި ޕާޓީ އިން މި މުޒާހަރާ ބާއްވަނީ އިންޑިއާގެ ތަޢުލީމީ ވަޒީރު ދަރްމެންދުރަ ޕްރަދާން އިސްތިޢުފާ ދެއްވުމަށް ގޮވާލައި އެވެ. މިއީ މެއި މަހު އިމްތިހާނު ތަކުގައި ދިމާވި މައްސަލަތަކާ ގުޅިގެން ފެށި ހަރަކާތަކަށް ވެފައި އޮތް އިރު، މިހާރު އެއީ އިންޑިއާގެ ތަޢުލީމީ ނިޒާމާއި ވަޒީފާގެ ފުރުސަތު ތަކުގެ ދަތިކަމާ ގުޅޭ ބޮޑު ހަރަކާތަކަށް ވެފައިވެ އެވެ.

މުޒާހަރާގައި ބައިވެރިންގެ ޝުއޫރު ތަކުގެ ތެރޭގައި ހިމެނުނީ "ކުރަފިތައް އަންނަނީ، ދަރްމެންދުރަ ޕްރަދާން ދަނީ" ފަދަ ޖުމްލަ ތަކެވެ. މުޒާހަރާގެ ބައިވެރިންނަށް އިންޑިއާގެ ޤައުމީ ދިދަ އާއި ފޮތެއް ގެންނަން ވަނީ ހިތްވަރު ދީފައި އެވެ. މިއީ ތަޢުލީމީ ހައްޤާއި ހުރިހާ މީހުންނަށް ހަމަހަމަ ފުރުސަތުގެ ރަމްޒެ އްކަމަށް އިސްވެރިން ބުނެ އެވެ.

މި ހަރަކާތް ފެށިފައި ވަނީ މީގެ ގާތް ގަނޑަކަށް ތިން ހަފުތާ ކުރިންނެވެ. އިންޑިއާގެ ޗީފް ޖަސްޓިސް ސޫރްޔާ ކާންތު، މެއި މަހު ބޭއްވި އަޑު އެހުމެއްގައި ބައެއް ވަޒީފާ ނެތް ޒުވާނުންނާއި، ފާޑުކިޔާ މީހުންނަކޯ ކުރަފި ތަކެއް ކަހަލަ ބައެއް ކަމަށް ވިދާޅުވެ އޭނާ ވަނީ ފާޑު ވިދާޅުވެފައި އެވެ.