އިންޑިއާގެ ބިލިއަނަރު ސިންހާނިއާ ރާއްޖޭގައި އެކްސިޑެންޓުވެ، އަނިޔާވި ވާހަކަ އިންޑިއާގެ ނޫސް ތަކުގެ ފަލަ ޞުރުޚީ އަށް

ރާއްޖޭގައި ހިނގި އެކްސިޑެންޓެއްގައި އިންޑިއާގެ ރޭމަންޑް ގުރޫޕުގެ ޗެއާމަން ގައުތަމް ސިންހާނިއާ އަށް އަނިޔާވި ވާހަކަ އިންޑިއާގެ ނޫސް ތަކުގެ ފަލަ ޞުރުޚީ އަށް އަރައިފި އެވެ.

މި ހާދިސާ ހިނގާާފައި ވަނީ ހުކުރު ދުވަހުގެ ރޭ ދަންވަރުގެ ވަގުތެއްގަ އެވެ. ލޯންޗެއް ބަންޑުން ޖަހާލައި ހިނގި އެ ހާދިސާގައި، އުމުރުން 60 އަހަރުގެ ސިންހާނިއާ އަށް ވަނީ އަނިޔާވެފަ އެވެ. އެކަމާ ގުޅޭ ގޮތުން ސިންހާނިއާގެ ތަރުޖަމާނު އިންޑިއާގެ މީޑިއާ ތަކަށް ބުނެފައި ވަނީ، އެ ހާދިސާގައި އޭނާ އަށް ލިބުނު އަނިޔާތަކާ ގުޅިގެން، ފަރުވާ ދިނުމަށް އިންޑިއާ އަށް ގެންގޮސްފައިވާ ކަމަށެވެ. އަދި މިހާރު އޭނާ އަށް ފަރުވާ ދެމުން އަންނަނީ އިންޑިއާގެ މުމްބާއީގައި ކަމަށް ބުނެފައިވެ އެވެ. 

ހުކުރު ދުވަހުގެ ރޭ މި ހާދިސާ ހިނގާފައި ވަނީ ވާވު އަތޮޅުގަ އެވެ. އެ ހާދިސާގައި ދެ މީހަކު ގެއްލިފައިވާއިރު، އެ މީހުން ހޯދުމުގެ މަސައްކަތް އެމްއެންޑީއެފް އިން ގެންދަނީ ކުރިއަށެވެ. އެ ހާދިސާގައި ބިލިއަނަރު ސިންހާނިއާ އަށް މާ ބޮޑު އަނިޔާއެއް ލިބިފައި ނުވާ ކަމަށް ބުނެފައިވެ އެވެ. އޭނާގެ ތަރުޖަމާނު ވަނީ، އޭނާ އަށް ހެޔޮ ދުއާ ކުރި ފަރާތް ތަަކަށް ޝުކުރު އަދާ ކޮށްފަ އެވެ. 

ސިންހާނިއާ އަކީ އިންޑިއާގެ މަޝްހޫރު ވިޔަފާރި ވެރިއެކެވެ. އޭނާ އަކީ ރޭމަންޑް ގުރޫޕުގެ ޗެއާމަން އެވެ. ހާދިސާގައި އޭނާގެ އަތާއި މޫނަށް ވެސް އަނިޔާ ތަކެއް ލިބިފައިވާ ކަމަށް ވަނީ މައުލޫމާތު ލިބިފަ އެވެ.