ޚަރަދު ކުޑަ ކުރުމުގެ ގޮތުން ބޮޑު ވަޒީރު މޯދީގެ މޮޓޯކޭޑު ކުޑަ ކުރައްވައިފި

އިންޑިއާގެ ބޮޑު ވަޒީރު ނަރެންދްރަ މޯދީގެ ރަސްމީ މޮޓޯކޭޑުގައި ހިމެނޭ ކާރުތައް މަދު ކުރައްވައި، މޮޓޯކޭޑު ވަރަށް ބޮޑަށް ކުޑަ ކޮށްފި އެވެ.

އިންޑިއާ ސަރުކާރުގެ މަސްދަރު ތަކުން މައުލޫމާތު ދީފައިވާ ގޮތުގައި، ބޮޑު ވަޒީރުގެ މި ނިންމެވުމަކީ ޚަރަދު ކުޑަ ކުރުމުގެ މަޤުސަދުގައި ނިންމެވި ނިންމުމެކެވެ. ޚާއްސަކޮށް އެމެރިކާ އިން އީރާންއާ ދެކޮޅަށް ކުރަމުން އަންނަ ހަނގުރާމައިގެ ސަބަބުން ދުނިޔޭގެ ހަކަތައިގެ ބާޒާރަށް ކުރަމުން އަންނަ އަސަރުގެ ސަބަބުން، އިންޑިއާ އިން އަންނަނީ ޚަރަދު ކުޑަ ކުރުމަށް ގިނަ ފިޔަވަޅު ތަކެއް އަޅަމުންނެވެ. 

ބޮޑު ވަޒީރުގެ މޮޓޮކޭޑު ކުޑަ ކޮށްފައިވާއިރު، މިދިޔަ އާދީއްތަ ދުވަހު ބޮޑު ވަޒީރު މޯދީ ވަނީ އިންޑިއާގެ ރައްޔިތުންނަަށް ޚަރަދުތައް ކުޑަ ކުރުމަށް އިލްތިމާސް ކުރައްވައިފަ އެެވެ. ބޮޑު ވަޒީރު ވަނީ ބޭރުގެ ޤައުމު ތަކަށް ކުރާ ދަތުރުތައް މަދު ކުރުމަށާއި، އާންމު ދަތުރު ފަތުރުގެ ނިޒާމުން ބޭނުން ކުރުމަށާއި، ރަނާއި އަދި ކައްކާ ތެޔޮ ގަންނަ މިންވަރު މަދު ކުރުމަށް ރައްޔިތުންގެ ކިބައިން އެދިވަޑައިގެންފަ އެވެ. 

ދުނިޔޭގެ ބާޒާރުގައި ތެލުގެ އަގު އިންތިހާ އަށް ބޮޑުވުމުގެ ސަބަބުން އިންޑިއާގެ ބޭރު ފައިސާގެ ރިޒާވް އަށް ވަނީ ބޮޑު ބުރައެއް އުފުލަން ޖެހިފަ އެވެ. 

މީގެ ކުރިން ބޮޑު ވަޒީރު މޯދީގެ ރަސްމީ މޮޓޯކޭޑުގައި 12 އުޅަނދު ހިމެނެ އެވެ. ނަަމަވެސް، މިހާރު އެ އުޅަނދު ތަކުގެ އަދަދު މަދު ކޮށްފައިވާއިރު، ސޯޝަލް މީޑިިއާ އިން ފެންނަ ވީޑިއޯ ތަކުން ބޮޑު ވަޒީރުގެ މޮޓޯކޭޑުގައި މިހާރު ހިމެނެނީ އެންމެ ދެ އުޅަނދެވެ. 

މީގެ އިތުރުން އައު އުޅަނދުތައް ނުގަނެ، މިހާރު ހުރި އުޅަނދު ތަކުގެ ތެރެއިން އިލެކްޓްރިކް އުޅަނދުތައް މޮޓޯކޭޑުގައި ބޭނުން ކުރެވޭނެ އިންތިޒާމު ހަމަޖެއްސުމަށް ވެސް ބޮޑު ވަޒީރު މޯދީ ވަނީ އަންގަވައިފަ އެވެ. މިކަމާ ގުޅޭ ގޮތުން ބޮޑު ވަޒީރުގެ އޮފީހުން ރަސްމީކޮށް އެއްޗެއް ބުނެފައި ނުވެ އެވެ. 

ދުނިޔޭގެ ތިން ވަނަ އަށް އެންމެ ގިނައިން ތެޔޮ އެތެރެ ކުރާ އިންޑިއާ އަކީ، ސައުދީ އަރަބިއްޔާ އާއި އީރާންއާ ދެމެދު އޮންނަ ހޮރްމޫޒް ކަނޑު އޮޅި އަށް ވަރަށް ބޮޑަށް ބާރޯސާވާ ޤައުމެކެވެ. އެމެރިކާ އާއި އިޒްރޭލް އިން އީރާންއާ ދެކޮޅަށް ކުރާ ހަނގުރާމައިގެ ސަބަބުން އެ ސަރަހައްދުގެ މަސްރަހު ގޯސްވެ، ތެލާއި ގޭހުގެ އަގު ވަނީ އުފުލިފަ އެވެ.