މެކްރޮން އިންޑިއާގައި، ފެނުނީ މޯދީއާ އޮންނަ ގާތް ގުޅުން

ފްރާންސްގެ ރައީސް އިމަނުއެލް މެކްރޮން، ރަސްމީ ދަތުރުފުޅެއްގައި އިންޑިއާ އަށް ވަޑައިގެން އެ ޤައުމުގެ ބޮޑު ވަޒީރު ނަރެންދްރަ މޯދީއާ ބައްދަލު ކުރައްވައިފި އެވެ.

މެކްރޮން އިންޑިއާ އަށް ކުރައްވާ މި ދަތުރުފުޅަކީ ތިން ދުވަހުގެ މުއްދަތަކަށް ކުރިއަށް ގެންދާ ދަތުރުފުޅެކެވެ. މެކްރޮންގެ ދަތުރުފުޅު މުމްބާއީ އިން ފެއްޓެވިއިރު، ބުދަ ދުވަހު އެމަނިކުފާނު ވަޑައިގަންނަވާނީ އިންޑިއާގެ ވެރި ރަށް ނިއު ދިއްލީ އަށެވެ.

މެކްރޮންގެ އިންޑިއާ ދަތުރުފުޅުގައި އެންމެ ފުރަތަމަ ވަނީ 2008 ވަނަ އަހަރު މުމްބާއީގައި ދިން ޓެރަރިސްޓް ހަމަލާގައި މަރުވި ފަރާތް ތަކަަށް އިޙުތިރާމްގެ ޒިޔާރަތެއް ކުރައްވައިފަ އެވެ. އޭގެ ފަހުން ބޮލީވުޑްގެ ބައެއް ތަރިންނާ ބައްދަލު ކުރެއްވިއިރު، ބޮޑު ވަޒީރު މޯދީއާ ވެސް ބައްދަލު ކުރައްވައި މަޝްވަރާ ކުރެއްވި އެވެ. 

ބޮޑު ވަޒީރު މޯދީ ވިދާޅުވީ މިއަދުގެ ދުނިޔޭގައި ގިނަ ކަންތައް ތަކެއް ހިނގަމުން އަންނައިރު، ސުުލްޙަ އާއި ރަނގަޅު ޙާލަތު ޤާއިމު ކުރުމަށް މުހިންމު ބައިވެރިވުމެއް ބޭނުންވާ ކަމަށެވެ. މޯދީ އާއި މެކްރޮން ވެސް ވަނީ ސޯޝަލް މީޑިއާގައި ދެ ބޭފުޅުންގެ ގާތްކަން ހިއްސާ ކުރައްވައިފަ އެވެ. އެގޮތުން ދެ ބޭފުޅުން އެއް ކާރު ކޮޅެއްގައި ދަތުރު ކުރައްވާ މަންޒަރު ވަނީ ހިއްސާ ކުރައްވައިފަ އެވެ. 

ފްރާންސްގެ ރައީސް މެކްރޮން ވަނީ ބައިނަލްއަޤުވާމީ ނިޒާމުގައި އަންނަ ބަދަލުތަކާ ގުޅިގެން ދެ ޤައުމުގެ ގުޅުމުގައި ފެންނަން ހުރި ފުރިހަމަ ކުރިއެރުމަށް ތައުރީފު ކުރައްވައިފަ އެވެ. އަދި ދެ ޤައުމުން ވެސް، ބާރު ގަދަ އެއްވެސް ޤައުމެއްގެ ދަށަށް ވެއްޓެން ބޭނުން ނުވާ ކަމަށް މެކްރޮން ވިދާޅުވި އެވެ. 

މިއީ 2017 ވަނަ އަހަރު ފްރާންސްގެ ރައީސް ކަމުގެ މަގާމަށް މެކްރޮން ވަޑައިގެންނެވި ފަހުން، އިންޑިއާ އަށް ކުރެއްވި ހަތަރު ވަނަ ދަތުރުފުޅެެވެ. މި ދަތުރުފުޅުގައި މެކްރޮންގެ އަރިހުގައި އޭނާގެ އަނބިކަނބަލުން ބްރިޖިޓް މެކްރޮން ވެސް ބައިވެރިވެ ވަޑައިގެންނެވި އެވެ.