ވެރިކަން ކުރާ ޕާޓީ އާއި އިދިކޮޅު ޕާޓީ އަށް ވުރެ، ކުރަފި ޕާޓީގެ އިންސްޓަގްރާމް ފޮލޯވަރުން ގިނަވެއްޖެ

އިންޑިއާގެ ސުޕްރީމް ކޯޓުގެ އުއްތަމަ ފަނޑިޔާރު ދެއްކެވި ވާހަކައަކާ ގުޅިގެން، އެ ޤައުމުގެ ޒުވާނުން އުފެއްދި ކޮކްރޯޗް ޖަނަތާ ޕާޓީ (ސީޖޭޕީ) ޕާޓީ އަށް ކުޑަ ދުވަސް ކޮޅެއްގެ ތެރޭގައި އިންސްޓަގްރާމްގައި ގިނަ އަދަދެއްގެ ފޮލޯވަރުން ލިބިއްޖެ އެވެ.

ޒުވާނުންނަކީ ކުރާނެ ކަމެއް ނެތިގެން އުޅޭ ކުރަފި ތަކެއްގެ ގޮތުގައި އުއްތަމަ ފަނޑިޔާރު ސިފަ ކުރެއްވުމުން، އިންޑިއާގެ ޒުވާނުން ވަނީ އެ ނަމުގައި ޕާޓީ އެއް އުފައްދައިފަ އެވެ. އެ ޕާޓީގެ އިންސްޓަގްރާމްގައި ގިނަ އަދަދެއްގެ ފޮލޯވަރުން މިހާރު އެބަ ތިއްބެވެ. 

އެގޮތުން އިންޑިއާގައި ވެރިކަން ކުރާ ބާރަތިޔާ ޖަނަތާ ޕާޓީ (ބީޖޭޕީ) އާއި އިދިކޮޅު ކޮންގްރެެސް ޕާޓީ އަށް ވުރެ ވެސް، ސީޖޭޕީގެ ފޮލޯވަރުން އިންސްޓަގްރާމްގައި ގިނަ ވެއްޖެ އެވެ. އެ ޕާޓީގެ އިންސްޓަގްރާމް އެކައުންޓުގައި މިހާރު 14.5 މިލިއަން ފޮލޯވަރުން އެބަ ތިއްބެވެ.

އިންޑިއާގައި ވެރިކަން ކުރަމުން އަންނަ އަދި ބޮޑު ވަޒީރު ނަރެންދްރަ މޯދީ ނިސްބަތްވެ ވަޑައިގަންނަވާ ބީޖޭޕީގެ އިންސްޓަގްރާމްގައި ތިބީ 8.8 މިލިއަން ފޮލޯވަރުންނެވެ. އިދިކޮޅު ރާހުލް ގާންދީގެ ކޮންގްރެސް ޕާޓީގެ އިންސްޓަގްރާާމްގައި ތިބީ، 13.3 މިލިއަން ފޮލޯވަރުންނެވެ. 

ސީޖޭޕީގެ އެކްސް އެކައުންޓް އިންޑިއާގައި މިހާރު ވަނީ ބްލޮކް ކޮށްފަ އެވެ.  ސޯޝަލް މީޑިއާގައި މި ޕާޓީ އަށް ލިބިފައިވާ ބޮޑު ތާއީދާ އެކު، މި ޕާޓީގެ އެކްސް އެކައުންޓް އިންޑިއާގައި ބްލޮކް ކުރުމަކީ ސިޔާސީ ގޮތުން ބޮޑު ސުވާލު އުފައްދާ ކަމެއްގެ ގޮތުގައި ބައެއް ފަރާތް ތަކުން ދެކެ އެވެ.